Yakobo 5 - KITABU KITAKATIFU

¹ Kalunu, munyi avandu avatugi, mumbulirizi! Mukubi zikwiri kandi musiome, kigira ikivi kiiza kumugwila.

² Uvutugi vwinyu vumali kuguunda, kandi zinguvu zienyu ziliviywi na amaguyaguyi.

³ Izahabu yinyu ni feza yinyu vikubi zisisinia, likuba zisisinia ziavio lilava kelolekizu ku munyi, kandi zilalia izinyama zie imiviri jinyu kuli umuliru. Munyi vamwivungiziiyi vutugi mu madiku gu kumaliriza yaga.

⁴ Mukikiri kutunga imituungu josi ja avandu avayinziraa mu milimi jinyu. Huliri ku lielilira liavo kigira munyi! Lilira liayavo avagesaa mumilimi jinyu, Nyasaye Wuvunyali kuhulira.

⁵ Livamwoyo lienyu hano ku lirova limali kwizura nu vweremerizi, ni lienyaanziza. Mwayekomeriza munyi aveene kwetegekera lidiku liukwitwa.

⁶ Mumali kukalagira kandi kwita avandu avataveeye nimbara navo sivahingiraa munyi mba.

Uvwikuziri kandi lisaala

⁷ Kunangwa avaamitu vange, muve aviikuziri kuduuka liza liu Mwami. Heenzi kuli umulimi alindiliraa mu liekuzira, ivitagwa vivie viduuki kwama amakuyu amalahi. Alindiliraa nu vwikuziri imbura yu kutanga kandi yinyima.

⁸ Munyi kandi kuduuka mwikuziri kuli ndio, muve nilisuuvirizwa linene kigira liza liu Mwami liveeye ahimbi.

⁹ Avaamitu vange, mutililira nokomonyana aveene ku vene, kunangwa Nyasaye avuli kumukalagira. Mukalagi aveeye ahimbi, yetegeki kwingira.

¹⁰ Avaamitu vange, mwizurizi avaporofeti avamoloma mu lieta liu Mwami. Muvavuguli kuli kelolero chu vusaliri nu vwikuziri.

¹¹ Henza, kuvavalizaa kuva avuvugasu kigira viikuzira. Mwamala kuhulira amakuva gu vwikuziri vwa Ayubu, kandi mumanyi kuli Mwami yamukolera mu limalirika. Kigira Mwami yizuuyi zimbavasi kandi livererera.

¹² Navuzwa kuvita viosi, avaamitu vange, mutatumikira liesuuha ku ligulu anoho ku lirova, anoho liesuuha ku kindu choosi lwa mulomba lilagana. Muvoore vuzwa, “Yee” niiva ikivuni chiinyu keveeye, yee, kandi “Awa” winyu ave vuzwa awa, Nyasaye avuli kumukalagira.

Lisaala lie lisuuvira

¹³ Aveeye ho nu mulala ku munyi oveeye mu vudinyu? Gamudukira asaale. Aveeye ho nu mulala ku munyi oveeye nu vusangali? Gamudukira yimbi zinyimbu ziu kwizominya.

¹⁴ Aveeye ho nu mulala ku munyi oveeye mulwaye? Gamudukira alange avakulundu vilikanisa vamusaliri nu kumuvaka amaguta ga muzeituni mu lieta liu Mwami.

¹⁵ Lisaala lie lisuuvira, lilahonyia umulwaye. Mwami alamuvukiza, nu kumwilanyira vulamu, kandi uvwoni vwa yakola vulasamiifwa.

¹⁶ Kunangwa, mwiyamirane uvwoni vwinyu aveene naveene kandi musaalirane aveene naveene, ku muduuki kohonywa. Lisaala liu umundu umulungi likonya ligali mu likora lie zinguru lialio.

¹⁷ Elija yaali umundu wi liiva lilala liere kuli kunyi. Yasaala nu mwoyo gwosi ndi imbura ivuli kukuba, niimbura yavula kukuba ku lirova ku mihiga jivaga ni imieli sita.

¹⁸ Yasaala, kandi ligulu liasundura imbura, kandi lirova liama iviamo.

¹⁹ Avaamitu vange, mulala ku munyi naagota no koleka agiligali, kandi wundi amwilanye,

²⁰ mwizurizi yaga ndi: mundu woosi ugirung'anyia mwoni kutura munzira yeeye mdamanu, alahonyia mwoyo gwu umwoni oyo kutura mu likuza, kandi alaleeta lisamiifa liu uvwoni vunyingi.