Yakobo 3 - KITABU KITAKATIFU

¹ Avaamitu vange, vanyingi kumunyi mutava avigizi mba. Kuli mumanyi vulahi ndi kunyi avigizi kulakanyoola likalagirwa linene kuvita avandi.

² Kunyi kwosi kokora vudamanu kazozo amanyingi. Navuzwa niiva umundu woosi siakolaa vudamanu agaveeye kovora, aveeye umundu umudukiru, kandi anyala kulinda liiva lilie liosi.

³ Kuvikaa lijamu mu munwa gwi ibarasi kogekola ikuhulira, kandi kunyala kogekola izie uwakwenyaa.

⁴ Anoho ganagana kigira emeli: kali neveeye enene, ihilwa ni imbuza enene, navuzwa inyala kugirung'anywa ni ingata engekeeke, kuzia hoosi hu vulaliri vwu muhiri wayo yenya.

⁵ Gaveeye ndio kandi nu lulimi: kali ni loveeye ekevero kekekeeke chu muviri, navuzwa lunyala kwikonya ku ivindu vinene. Muhenze kuli umulitu goveeye munene na gusambwa nesese ngekeeke yu umuliru.

⁶ Kandi ululimi loveeye kuli umuliru. Loveeye kivala chu vudamanu niloveeye kilala ku vivero vietu viu muviri. Lokolaa liiva liu mundu kuva lidamanu. Luviikaa livamwoyo lilie liosi mu umuliru gutulaa mu gehena.

⁷ Vandu vaveeye nu vunyali kutuga kandi amalakulaga zing'ano ziosi zie zinyama ziu mbulimu, amanyonyi, ni zinyama zimolanga, vilombe viosi viu mu inyanza, kuli zisuzi.

⁸ Navuzwa sihaveeye ho nu umundu kali mulala unyala kutuga ululimi mba. Loveeye ludamanu kandi ulutanyala kulindwa mba. Lwizuyi uvusungu vululu.

⁹ Kulutumikiraa kusandiza Mwami wiitu kandi Baba, kandi kulutumikiraa kulaama vandu vandi valombwa mu lifwana lia Nyasaye.

¹⁰ Amakuva gu kuhaana lisandiza kandi gu kulaama gaturaa mu munwa mulala mwere. Avaamitu vange, sivoveeye vulahi ivindu yivi viekoleke ndio mba!

¹¹ Kidaho ikilahi cha amazi kinyala kusinuka amazi malahi kandi amalulu?

¹² Avaamitu vange, umusaala gwu umukuyu sigunyala kwama mizeituni mba; anoho muzabibu sigunyala kwama amakuyu mba. Kandi kidaho kilulu sikinyala kusinuka amazi malahi mba.

Ovogeri kutura igulu

¹³ Nivwaha oveeye umugeri nuwilimanya hagati hinyu? Gamudukira avumanyie havulavu mu liiva lilie lilahi, kandi ivikolwa vivie ivilahi ivikolwa mu liegehiza no vogeri.

¹⁴ Navuzwa ni muva ni muveeye nembodoka, uvululu, uvwimani ni likayirwa mu mioyo jinyu, mutakola uvwoni ku agiligali ku liekonya kigira ovogeri kandi mutaveha ovovehi ku agiligali mba.

¹⁵ Ovogeri kuli yivu si vuturaa mwigulu mba. Voveeye vwu mu lirova, uvutaveeye vwa Roho, kandi vwamademoni.

¹⁶ Ahembodoka nu vwimani viveeye, hazana yaho haveeye ni ikivihiri kandi ni zing'ano ziosi ziu vudamanu.

¹⁷ Navuzwa ovogeri vuturaa igulu, voveeye vulahi mulitanga ku viosi; voveeye vwi mirembe kandi, vwovohocha, kandi vwu vulina; vwokoleeta avandi ahimbi, vwizuyi zimbavasi na kandi vwama amakuyu gi vikolwa vilahi; uvutaveeye ni lieriza kandi uvugadi.

¹⁸ Ligesa lia amakuyu gu vulungi limizwa mu mirembe na yavo avayaanzaa koleta mirembe.