Yakobo 2 - KITABU KITAKATIFU

¹ Avaamitu vange, kuli avasuuviri mu Mwami wiitu Yeso Kristo, oveeye Mwami wu vukumi, mutayanzilira avandu kolondekana ku ligondo liavo mba.

² Niiva umundu mutugi wiviki imingiri yi zahabu ni zinguvu zindahi zinzesereru, yingira mu livugana lienyu, kandi ahene yaho, mundu oveeye mudaka uwiviiki amadali naye kandi yingira,

³ niiva mulahaana uluyali ligali ku uyu uwiviiki inguvu indahi na mumuvolere, “Hamba wikale ahalahi hano,” navuzwa muvoolere umudaka, “Ivi, singira yira,” anoho “Yikala hasi ha virenge viange”

⁴ ahene yaho muteeti liavukana hagati hinyu, kandi mumali kolomba likalaga kutura ku zing'anagani zindamanu.

⁵ Muhuliri, avaamitu vange avayaanze! Nyasaye yatovola avadaka vu mukivala vave avatugi mu lisuuvira, kandi vanyoore vwami vwa yasuuviriza yavo ava muyanzaa.

⁶ Navuzwa munyi muchayaa avadaka! Vatugi nivo vamudambizaa kandi vamuhira mu viyaalo imbiri wa avakalagi. Avatugi!

⁷ Yava nivo avanyegaa lieta lilahi lia mumali koheevwa.

⁸ Mulava ni mukoraa vulahi niiva mutia lilaga liu vwami kuli Amang'oda Matakatifu gavoora, “Uyaanze umutende woovo kuli wiyanza umwene.”

⁹ Navuzwa niiva mukolera avandu kolondekana ni ligondo liavo, mukoraa uvwoni, kandi lilaga limukalagiraa kuli muveeye avavunanyie vi Lilaga.

¹⁰ Mundu woosi uvunaga lilago lilala, umali kuvunaga amalago goosi.

¹¹ Oyo uwavoola, “Utaheya mba,” yavoola kandi, “Utiita mba.” Kulwayago, kali nuvula koheya, navuzwa ni wita, ivi umali kuvunaga amalago.

¹² Mumolome, kandi mukore kuli avandu avalikalagirwa ni lilaga ilikovoholoraa.

¹³ Nyasaye sialimanyia livererera lwa alikalagira umundu uyu uwavula kuva ni zimbavasi; navuzwa zimbavasi ziveeye ni liguuta ku likalaga.

Lisuuvira ni vikolwa

¹⁴ Avaamitu vange, gakonyaa ki umundu navoora aveeye ni lisuuvira, navuzwa ivikolwa vivie sivilolekizaa ndio? Lisuuvira yilio linyala kumuhonyia?

¹⁵ Niiva vaveeye ho avamwavo anoho avavozwa avaveeye chahonyo kandi sivaveeye ni iviukulia via kase,

¹⁶ niiva mulala ku munyi avavoolera, “Nyasaye avagasize! Munyore uluuya kandi mulie vulahi mwiguti!” Niiva simuvaheeye ivindu ividukanaa ni livamwoyo?

¹⁷ Kunangwa gaveeye ndio ni lisuuvira: niiva liveeye lisuuvira litalondekanaa ni vikolwa, hene yaho liakuza.

¹⁸ Navuzwa mulala alavoora, “Umundu mulala aveeye ni lisuuvira, nu wundi aveeye ni likora.” Manyia kuli mulala anyala kuva ni lisuuvira vugira ivikolwa, ninzi ndakumanyia lisuuvira liange ku vikolwa viange.

¹⁹ Usuviraa Nyasaye aveeye mulala yenyine? Vulahi! Amademoni nago kandi gasuuviraa ni gadegeraa nu vuti.

²⁰ Umusiru ivi! Wenyaa umanywe ndi lisuuvira vugira ivikolwa liakuza?

²¹ Aburahamu guuga wiitu, yakolwa ndi umulungi ku Nyasaye? Gaali kuvitira mu vikolwa vivie lwa yahaana Isaka umwana weve ku vwali?

²² Ivi si olola? Lisuuvira lia Aburahamu ni vikolwa vivie viayinzira harara. Lisuuvira lilie liakolwa liduukiru kuvitira mu vikolwa.

²³ Mang'oda Matakatifu gaduukizwa agavoora ndi, “Aburahamu yasuuvira Nyasaye, kandi kigira lisuuvira, Nyasaye yamuvugilira kuva umulungi.” Kandi ya langwa umulina wa Nyasaye.

²⁴ Kunangwa muloraa, gaveeye kigira ivikolwa vivie umundu akolwaa umulungi imbiri wa Nyasaye na sigaveeye kigira lisuuvira lienyine mba.

²⁵ Gaali malala mere na Rahabu uwaali liraya. Yakolwa kuva umulungi imbiri wa Nyasaye kuvitira mu vikolwa vivie, kigira yingiriza avatunyirizi va Isiraeli kandi naavakonya virukiri kunzira yindi?

²⁶ Kunangwa, kuli umuviri vugira umwoyo gwakuzi, kandi ndio, lisuuvira vugira vikolwa liakuza.