Vikolwa 8 - KITABU KITAKATIFU

¹ Saolo yalora kekolwa navugilira ku liitwa lia Sitefano. Ku lidiku liene yilio lidambizwa linene liaduuka ku likanisa liali mu Jerusalemi. Avandu vasuuvira vosi nitali avatumwa venyine, vasalanywa mu zimbega ziosi zie Vuyuda na Samaria.

Avandu vasuuvira vadambizwa

² Avandu valala avatia Nyasaye numwoyo gwosi, vazia kuyavira Sitefano, nivamusiomera vudinyu ni liverera linene.

³ Navuzwa Saolo yageriza kudiviza Likanisa ligali. Yingira mu vuli inyumba, natuliza vandu avasuuviraa, avasaza na vakali, navahira muvuhambe.

Ivangeri yilwazwa mu Samaria

⁴ Kigira yaga vandu avasuuviraa vasalanywa, nivavodong'ana havundu hoosi ni vilwaza likuva yili.

⁵ Filipo naye yingira mu lidaala lia Samaria, ni yilwaazira avandu valio amakuva ga Kristo.

⁶ Avandu vavunga viduma nivahuliriza amakuva ga Filipo nu mwoyo mulala, ni valora vilolekizu via yakola.

⁷ Kigira mademoni gaali ni gagumira avandu vanyingi, gaturaa nigahanzuka nigalira; kandi avanyingi avaari nivafogoya, na avalema, vahonywa.

⁸ Maku vwali uvuyanzi vonene mu lidaala yilio.

⁹ Mundu mulala yaali mu lidaala yilio, uwalangwa Simoni. Yakola ivindu nuvusigitiri vwivwe ku maziambiri iviagenyia avandu va Samaria ligali. Yiganagana mwene ndi aveeye mundu munene.

¹⁰ Avandu vosi, kutura ku mukekeeke kuduuka ku munene, vamuhuliriza ligali ni vavoola, “ Simoni uyu aveeye nizinguru zia Nyasaye ulangwa, ‘Zinguru Zinene.’ ”

¹¹ Vamuhuliriza ligali, kigira yavagenyia nu vusigitiri vwivwe ku ing'inga indambi.

¹² Navuzwa lwa vandu vasuuvira amilwazo ga Filipo agi Ivangeri yu Vwami vwa Nyasaye kandi gi lieta lia Yeso Kristo, vabatizwa avasaza na avakali.

¹³ Kali Simoni mwene yasuuvira. Lwa yamala kubatizwa yamenya na Filipo, nagenya ku viokogenyia ni vilolekizu via Filipo yakola.

¹⁴ Kunangwa lwa avatumwa vaali ni vaveeye Jerusalemi vanyoola amakuva ndi avandu va Samaria navo vavugiliyi likuva lia Nyasaye. Vavatumira Petero na Yohana.

¹⁵ Lwa vaduuka yo, vasaalira vandu avasuuviraa yavo vaduuki konyoora Roho Mutakatifu,

¹⁶ kigira Roho Mutakatifu yaali na akikiri kwika kuvo. Vaali ni vabatizwa vuzwa ku lieta liu Mwami Yeso.

¹⁷ Kunangwa Petero na Yohana vaviika amakono gaavo ku vandu vasuuvira yavo, ma nivanyoora Roho Mutakatifu.

¹⁸ Kunangwa Simoni yalora ndi ng'ani Roho Mutakatifu amali kuhaanwa ku vandu vasuuvira lwa vatumwa vaviika ku makono gaavo kuvo. Maku yahaana ku Petero na Yohana mabese navoora,

¹⁹ “Inze kandi mumbe zinguru yizi, ku vosi wambika ku makono gange aduuki konyoora Roho Mutakatifu.”

²⁰ Navuzwa Petero yamutivulira, “Udivi harara na mabese googo kigira uganaganaa unyala kugura kihanwa cha Nyasaye na mabese!

²¹ Ivi sioveeye ni lisanga liosi anoho mugavwa ku muyinzi yigu, kigira mwoyo gugwo si goveeye mulahi imbiri wa Nyasaye mba.

²² Kigira yaga wiganiri uvudamanu vuvwo yivu, usaale Mwami, aduuki kukusamiiha mu liganagana kindu kuli yiki.

²³ Ngolola ni wizuyi embodoka ligali, kandi oveeye muvohe wu vwoni!”

²⁴ Simoni yativura navoora, “Mugoonyaa mwaza musaliri ku Mwami, kunangwa ivindu via muvooraa yivi vitangwira kali kilala mba.”

²⁵ Kunangwa lwa Petero na Yohana vamala kololekiza nu kwilwaza likuva liu Mwami, virana Jerusalemi. Lwa vaali ni viranga vagenda ni vilwaza Ivangeri ya Nyasaye ku tudaala tunyingi twa Samaria.

Filipo yabatiza Munene mulala wa Ezopia

²⁶ Engelosi wu mwami yavolera Filipo, “Wetegeke uzie mu lovega lwi isavaalu, uvitiri kunzira itulaa Jerusalemi nizia Gaza.” Inzira yene yeyo ivitiraa mu changalangwi.

²⁷ Kunangwa Filipo yatura natanga logendo. Ahene yaho yalora mundu mulala kutura Ezopia waali kiziri, musingiriri wi zinguru ku vutugi vwosi vwa Kandaki, Mwami wi kikali wa Ezopia. Mundu uyu yaali naaziyi Jerusalemi kusigamira Nyasaye.

²⁸ Lwa yaali niyiranaayengo, yaali niyikaye mu ligare nasomaa kitabu chu muporofeti Isaya.

²⁹ Roho Mutakatifu yavolera Filipo, “Yisundi ahimbi ku ligare ogende nalio.”

³⁰ Filipo yanyagula naduuka himbi ni ligare, naahulira mundu oyo nasomaa kitabu chu muporofeti Isaya. Filipo yamuteeva, “Uhuliraa aga osoma yaga?”

³¹ Mundu oyo yamutivulira, “Nyara kuhulira ndi nindaveeye nu mundu wu kunzivaalira?” Kandi yavolera Filipo, “Niina wikala ninzi mu ligare.”

³² Kunangwa zimbaso zia Mang'oda Matakatifu zia yaali nasomaa ziali yizi: “Yaali kuli ligondi lihilwaa kwitwa kuli Mwana wi Ligondi akiring'ani Lwa kalagangwa uvwoya naye kandi si yakunura munwa gwigwe kali hakuzu mba.

³³ Yalegwa nukunyagwa uvulungi. Sihaveeye ho numulala unyala kovora amakuva gi visukululwi vivie mba. Kigira livamwoyo lilie ku lirova liheri.”

³⁴ Kiziri oyo yavolera Filipo, “Mbolera, muporofeti uyu amolomaa ku vwaha? Avoora amakuva yaga ku mwene anoho ku wundi mundu?”

³⁵ Maku Filipo yatangila ku zimbaso zia Mang'oda Matakatifu yizio, namwilwaazira amakuva malahi ga Yeso.

³⁶ Lwa vaali ni vakizizagilira no logendo, vaduuka havundu ha amazi gaali. Kiziri oyo yavoola, “Henza amazi ngaga yaaha, ni kindu ki ikinzigalira mburi kubatizwa?” [

³⁷ Filipo yavoola, “Nu usuviraa nu mwoyo gugwo gwosi, unyala kubatizwa.” Naye yativura, “Yee, suuviyi ndi Yeso Kristo nu Mwana wa Nyasaye.”]

³⁸ Kunangwa yalaga ligare lisingiri; navo vombi, Filipo ni kiziri viika mu mazi; Filipo yaamubatiza.

³⁹ Lwa vaatura mu mazi, Roho wu Mwami yavugula Filipo vwangu, kiziri oyo si yamulola kandi mba, navuzwa yaazizagilira nologendo lwilwe ni yizuuyi uvusangari.

⁴⁰ Filipo yizukanira vuzwa naveeye mu lidaala lia Azota; yaazizagilira kuvitira mu madaala goosi ni yilwaza Ivangeri mu madaala goosi kuduuka lwa yaduuka Kaisaria.