Vikolwa 6 - KITABU KITAKATIFU

¹ Mu madiku yago lwi livaliza lia vandu vasuuvira yaazizagilira komeedeka, lirembana liatulira hagati ha avasuuviri Vayuda avamolomaa Luguriki na yavo avamolomaa Luheburaina. Avayuda avamolomaa Luguriki vamonya ndi avakunzakali vaavo vivilirangwa mu ligavula lie viukulia via kase.

² Kunangwa, avatumwa avaari likomi na vaviri valanga kiduma choosi cha vandu avasuuviraa, ni vavoola, “Si vuli vulahi kunyi koleke kwilwaza likuva lia Nyasaye kutumiki mu ligavula lia mabese mba.

³ Kunangwa, avaamitu, mutovole avandu saba ku munyi avaveeye nilizominywa lilahi, aviizula Roho Mutakatifu novogeri, kuvaviiki ku miyinzi yigu vagulindi.

⁴ Navuzwa kunyi kulahongera mu lisaala kandi mu lilwaza likuva lia Nyasaye.”

⁵ Livoora yili liayaanziza kiduma choosi cha vandu avasuuviri. Vatovora Sitefano, mundu wi lisuuvira linene kandi wizura Roho Mutakatifu, Filipo, Purokoroni, Nikanora, Timona, Paramena na Nikolao, uwatula Andiokia, uwaali ni yavugula lisuuvira lia Vayuda mu litanga.

⁶ Muganda gwa vasuuviri yavo, vavaviika imbiri wa avatumwa navo ni vavasaalira ni vaviika makono gaavo kuvo.

⁷ Likuva lia Nyasaye liazizagilira kulaanda. Livaliza lia vandu avasuuviraa vameedeka ligali mu Jerusalemi; kandi avasaalisi vanyingi vavugilira lisuuvira yili.

Ligumirwa lia Sitefano

⁸ Sitefano, mundu wa Nyasaye yagasiza ligali kandi wizura zinguru zinyingi, yakola vilolekizu kandi vindu viokogenyia hagati ha avandu.

⁹ Navuzwa avandu valala vatanga kuhangala na Sitefano. Valala ku avandu yavo vaali avi lisinagogi lilala ilialangwa, “Lisinagogi lia Avandu Vavoholore” navo vaatura Kurene na Alekisandaria. Avandi vaatula Kilikia na Asia.

¹⁰ Navuzwa sivali vanyara kumuguuta mba, kigira ovogeri vwivwe kandi kigira Roho Mutakatifu wamwimilira mu livoora lilie.

¹¹ Kunangwa, vaaha avandu viambeti vavoole, “Kunyi kuhuliyi Sitefano navoora amakuva go konyega Musa kandi agokonyega Nyasaye.”

¹² Munzira yiyi vagemehiza avandu, avakulundu na avigizi vi Lilaga. Maku vazia ku Sitefano, ni vamugumira, kandi ni vamuhira imbiri wi kiyaalo kenene.

¹³ Maku valeta mu kiyaalo avaloli vo vovehi avavoora, “Mundu uyu sialekaa kovora amakuva go konyega Litembeli litakatifu, kandi Lilaga lia Musa mba.

¹⁴ Kwamuhulira navoora ndi, ‘Yeso uyu wa Nazareti giasambula Litembeli, kandi alatuliza ho imiima ja kwavugula kutura ku Musa.’ ”

¹⁵ Avandu vosi avaari mu chikalo chi kiyaalo vuumika Sitefano, nivalora mumoni mwimwe muveeye kuli mumoni mwe engelosi.