Vikolwa 4 - KITABU KITAKATIFU

¹ Petero na Yohana vaali nivakamoloma ku vandu wa avalala ku vasaalisi, munene wa valindi vi Litembeli, kandi avalala ku Avasudukayo vaduuka.

² Vavihilirwa ligali kigira avatumwa vaviri yavo vaali nivigiza kandi ni vilwazira avandu ndi Yeso yasimuguka kutura mu vakuzu, amakuva gamanyia havulavu ndi avakuzu valakasimuguki.

³ Kunangwa vagumira Petero na Yohana, na kigira gwaali mugolova, vavavoha muvuhambe lidiku lialonda ku.

⁴ Navuzwa avanyingi avahulira likuva, vasuuvira kandi livaliza lia avasuuviri liali ahimbi zielefu zitano.

⁵ Mugamba gwi lidiku lialonda ku, aviimiliri va Vayuda, avakulundu na avigizi vi Lilaga vavunga mu Jerusalemi.

⁶ Vavugana harara na Anasi, Musaalisi Munene na Kayafa, Yohana, Alekisanda na avandi vosi avaari ku vinyumba yu Musaalisi Munene.

⁷ Vasingiriza avatumwa imbiri wavo ni vavateeva, “Munyi mukoli yaga kulwi zinguru ziamuveeye nazio, anoho ni ku lieta lia vwaha liamutumikiyi?”

⁸ Maku, Petero, niyizuuyi Roho Mutakatifu, yavativulira, “Munyi aviimiliri navakulundu va vandu;

⁹ niiva mukoteeva lero ndi ku kekolwa kilahi ichakolerwa mundu mulema, na kuli yahonywa

¹⁰ gamudukira munyi vosi mumanye, kandi gaduukiraa avandu vosi va Isiraeli, vamanye ndi, mundu uyu asingiraa hano imbiri winyu mulamu ligali kuvitira mu zinguru zie lieta lia Yeso Kristo wa Nazareti, uwa mwavaamba, kandi uwa Nyasaye yasimugukiza kutura mu likuza.

¹¹ Yeso niyie wa Mang'oda Matakatifu gavoora, ‘Ligina lia munyi avumbaki mwasuura, kalunu liveeye ligina lie kivuni ku goosi.’

¹² Ovohonyi vulanyoleka kuvitira muye yenyine, kigira mu lirova liosi, siali ho nu mundu wundi woosi wa Nyasaye yahaana unyala kukuhonyia mba. ”

Livoholorwa lia Petero na Yohana

¹³ Lwa avakulundu vi kiyaalo valora vuluviliri vwa Petero na Yohana, vagenya ligali, kigira vamanya ndi vaveeye avandu va kazozo avatali ni lisoma liosi. Kandi vamanyiriza ndi avandu yava vaali harara na Yeso.

¹⁴ Navuzwa lwa valora mundu wahonywa uyu nasingiyi harara navo, si vaali vanyara kovora kindu choosi mulihing'ana mba.

¹⁵ Kunangwa vavavolera vatuli mu kiyaalo, navo vatigara ni vavolerana aveene ku vene.

¹⁶ Vateevana, “Kokora ki ku avandu yava? Avandu vosi avamenyi mu Jerusalemi vamanyi ndi kelolekizu kenene yiki kekoleki, kandi kunyi si kunyala kwambakana mba.

¹⁷ Navuzwa nikwenya kwigalira makuva yaga gavuli kulaanda mu avandu, kuviganihizi vavuli komoloma ku mundu woosi mu lieta lia Yeso mba.”

¹⁸ Kunangwa vavalanga viirane mu kandi ni vaviganihiza vavuli komoloma anoho kwigiza mu lieta lia Yeso mba.

¹⁹ Navuzwa Petero na Yohana vavativulira, “Kalagi munyi aveene niiva agaveeye malungi imbiri wa Nyasaye, kutia munyi anoho kutia Nyasaye.

²⁰ Kigira kunyi si kunyala koleka kovora amakuva gi vindu via kwalola kandi via kwahulira mba.”

²¹ Kunangwa, avakulundu vi kiyaalo vavatihiza nukuviganihiza vudinyu, mani vavalakuula. Valora ndi nivudinyu ligali kuvaha amageri, kigira avandu vosi vaali ni vizominyaa Nyasaye kigira kekolwa yicho.

²² Mundu wahonywa oyo yaali uduuka mihiga kuvita arubaini.

Avasuuviri vasaala Nyasaye avahe uvuluviliri

²³ Nonoho, lwa Petero na Yohana valakulwa, virana ku muganda gwaavo, nivavivaalira goosi aga avasaalisi vanene na vakulundu vaali nivavooye.

²⁴ Lwa vandu vasuuvira vahulira makuva yaga, vosi vaza harara, vasaala Nyasaye nu mwoyo mulala, ni vavoola, “ O, Mwami, kandi Mulombi wi ligulu ni lirova, inyanza ni vindu viosi iviveeye mu!

²⁵ Kuzinguru zia Roho Mutakatifu ivi wamoloma kuvitira mu mutumikiri woovo Daudi, guuga wiitu, lwa wavoola, ‘Kigira ki avizihiiri vizuyi uvutima; kigira ki avandu valohiza muvwivisu zing'anagani zia vuzwa?

²⁶ Avami vi lirova vetegeka aveene, kandi avamihi vaagana harara kuhing'ana nu Mwami kandi na Mesia weve.’

²⁷ “Kigira ligali, nindio Herodi Pontio Pilato, vavugana harara mu lidaala yili na Avizihiiri kandi avandu va Isiraeli, kuhingira Yeso, Mutumikiri woovo mutakatifu wa wakola ave Mesia.

²⁸ Yee, vavugana harara vaduuki kokora vindu viosi via Ivi wasaavira kokora vindu viosi mu zinguru zizio kandi mu vulaliri vuvwo.

²⁹ Navuzwa kalunu, Mwami, henza ku litihiza liavo lia vamali kokora, ukuvugiliri kunyi avatumikiri vovo kwilwaze likuva liilio nu vuluviliri vwosi.

³⁰ Nyira mukono gugwo ohonyie avandu kandi okole vilolekizu ni viokogenyia viloleke mu lieta liu Mutumikiri woovo Mutakatifu Yeso.”

³¹ Lwa vamala kusaala, havundu ha vavuganira harara hadegerizwa. Vosi vizura Roho Mutakatifu kandi ni vatanga kwilwaza likuva lia Nyasaye nuvuluviliri.

Avasuuviri vasanga vindu viavo harara

³² Kiduma choosi cha vandu vasuuviri vaali harara nu mwoyo mulala kandi niziganagani zindala. Sihaaliho nu mundu kali mulala kuvo uwalola kindu cha aveeye nacho kuva ni chiche yeng'ine mba. Navuzwa vasanga nukugavulana vindu viosi via vaali navio keleng'ani.

³³ Avatumwa valolekiza ni zinguru zinene lisimuguka liu Mwami Yeso, na Nyasaye yavaha vugasu vonene.

³⁴ Sihaaliho nu mundu ku vosi wadaka kindu, kigira vosi avaari ni vaveeye ni milimi anoho zinyumba vaziguliza,

³⁵ ni valetera avatumwa mabese gi vindu viagulizwa, ni zigavulirwa vandu vosi, samulala kolondekana ni lienya lilie.

³⁶ Yaali ho nu mundu mulala wi ihiiri ya Levi, walangwa Josefu, waali niyivulirwa Saipurasi wa avatumwa vagulika Baranaba, iliveeye kovora, “Mundu wo koleminya mioyo.”

³⁷ Mwene uyu kandi yaali nu mulimi gwigwe, naaguguliza. Yavugula mabese gagwo nagaleta kuvatumwa.