Vikolwa 28 - KITABU KITAKATIFU

¹ Lwa kwahononoka kuduuka ku lujinga kwavolerwa ndi kisulu yicho chalangwa Malita.

² Avandu va hene yaho vaali avalahi ligali ku kunyi. Imbura yaali nitangi kukuba, kandi vukindu vwali ku; vafaana muliru nivakwingiriza.

³ Paolo yateenya lukanya lokekeeke lwi zingu naziviika mu muliru. Kigira uvuhiu vwu muliru, enzoka yatura mu zingu niyevohanyila ku mukono gwa Paolo nihanda ku.

⁴ Lwa avandu vahene yaho valora enzoka yeyo yeleraa ku mukono gwigwe, vavolerana aveene, “Ligali mundu uyu nu mulumindi na kali niiva ahononokaa kutura mu inyanza, munyasaye ulangwa, ‘Vulungi’ sivulamuleka azizagiliri kuva mwoyo mba!”

⁵ Navuzwa Paolo yuuha enzoka yeyo mu muliru, kandi siyamusaliriza kali hakuzu mba.

⁶ Avandu yavo vamuhenza hawundi alavimba, anoho agwi hasi maakuzi, lwa vamala kohenzerera ing'inga indambi vugira kolola kindu kidamanu ni chekoleka ku Paolo, vagirung'anyia zing'anagani ziavo kuye, nivavoora, “Paolo aveeye nyasaye.”

⁷ Ahimbi na hazana yaho haali ni milimi ja Pubulio, munene wi kisulu zana yicho. Yakwingiriza kuli avalina, nikuva avageni veve madiku gavaga.

⁸ Galoleka ndi baba wa Pubulio yaali naagoni mu kidali, nalwalaa luhuuza kandi likengi. Paolo yazia kumulora, aviikaa makono geege ku mulwaye na lwa yamalakumusaala na amuhonyia.

⁹ Kigira kekolwa yiki, avalwaye vosi avaari mu kisulu yicho vaza kandi ma nivahonywa.

¹⁰ Avandu vakuha vihaanwa lugano lugano vinyingi, kandi lwa kwatanga logendo vaviika komeri vindu via kwenyaa.

Logendo lwu kutura Malita kuzia Rumi

¹¹ Inyima wi mieli jivaga kwatanga logendo lwiitu kandi mu meri ndala ya Alekisandaria, yalangwa, “Avanyasaye Amalongo.” Emeri yiyi yaali nemenyi mu kisulu ing'inga yoosi yu vukindu.

¹² Kwaduka mu lidaala lia Sirakusi, nikomenya mu madiku gavaga.

¹³ Kutura hene yaho kwazia nikuduuka Rejamu. Inyima wi lidiku lilala imbuza yaatanga kuhuuza kutura isavaalu, na inyima wa madiku gaviri kwaduka Puteoli.

¹⁴ Uwene yeyo kwanyoora yo avaamitu valala, vakusaala komenye navo lisiza lilala. Kunangwa kwaduka Rumi.

¹⁵ Avakristayo va Rumi lwa vahulira amakuva giitu, vaza kukwaganira ha Chiitu cha Apia ha Zihoteli Zivaga. Paolo lwa yavalola yasandiza Nyasaye, kandi alema mwoyo.

Paolo mu lidaala lia Rumi

¹⁶ Lwa kwaduka Rumi, Paolo yaavugilirwa komenya yenyine harara nu musikari mulala wu kumulinda.

¹⁷ Inyima wa madiku gavaga, Paolo yagenihiza aviimiliri va Vayuda vavugane harara. Lwa vavugana, Paolo yavavolera, “Avaamitu, kali niiva sindakola kindu kidamanu, anoho kuhing'ana ni miima ja avaguuga viitu, navuzwa ndaakorwa muhambe mu Jerusalemi kandi nimbikwa mu makono ga Varumi.

¹⁸ Lwa vandeveleriza nivanyoora simbeeye ni kindu choosi kidamanu kidukanaa nzitwi mba venya komboholola.

¹⁹ Navuzwa Avayuda vandi vambakana likuva yilio, ndaanigwa koteeva mbirwi ku Kaisari; kali niiva sindaali ni likuva liu kuyaaliraku avihiiri yange mba.

²⁰ Kigira yaga nyenyi kololana no komoloma ni munyi, kigira mboheywi ni minyororo yiji kurwi lisuuvirizwa lia Isiraeli.”

²¹ Navo vamuvolera, “Kunyi kukikiri konyoora ku ibarwa yoosi kutura Ivuyuda, anoho kovora kindu kidamanu ku ivi mba.

²² Navuzwa kwegomba kuhulira kutura ku ivi mwene agaveeye mu zing'anagani zizio. Kunyi kumanyi ndi muganda gwa oveeye mu yigu, avandu vaguhangalizaa havundu hoosi.”

²³ Kunangwa valagana naye lidiku liu kuvugana, na avandu avanyingi ligali vaduuka kuye aha yamenya. Kutura mugamba kuduuka mugolova, Paolo yavivaalira nu kuvavuulira amakuva gu Vwami vwa Nyasaye, nageriza kuvakola vavugiliri amakuva ga Yeso ku litumikira Lilaga lia Musa na amang'oda ga avaporofeti.

²⁴ Avalala kuvo vasuuvira amakuva geege, navuzwa avandi sivasuuvira mba.

²⁵ Kunangwa, sivahulirizanaa aveene mba. Lwa vaali nivazizaa, Paolo yavoola likuva yili: “Agiligali, Roho Mutakatifu yavolera avaguuga vinyu vulahi kuvitira mu muporofeti Isaya,

²⁶ navoora: ‘Zia ku vandu yava uvavoolere: Lihulira mulahulira, navuzwa simulimanya mba lihenza mulahenza, navuzwa simulilola mba.

²⁷ Mioyo ja avandu yava jigwiyi midinyu, amatu gaavo gahaani, vamwolizi zimoni ziavo. Galavula ndio, ngano valora ni zimoni ziavo, kandi ngano vahulira na amatu gaavo. Ngano vamanya ni mioyo jaavo nu kwiganira, Mwami avoora, na inze ndavahonyia.’ ”

²⁸ Maku Paolo yamaliriza navoora, “Kunangwa mumanye, amakuva ga Nyasaye agovohonyi gahiliywi ku vandu Avizihiiri. Aveene valagahulira!” [

²⁹ Lwa Paolo yamala kuvavoolera makuva yaga, Avayuda vazia, nivaveeye ni lihangalizana linene.]

³⁰ Paolo yamenya mihiga giviri munyumba ya yatungaa mwene, niyingiriza vosi avaazaa kumulora.

³¹ Yilwaza Uvwami vwa Nyasaye nu kwigiza amakuva gu Mwami Yeso Kristo nu vuluviliri, kandi vugira kwigalirwa.