Vikolwa 24 - KITABU KITAKATIFU

¹ Inyima wa madiku gatano, Musaalisi Munene Anania, yasulunguta kuzia Kaisaria harara navakulundu valala kandi mulala uwalangwa Taritulo uwaza komolomela Avayuda imbiri wa Felikisi. Valeta amayaalo gaavo gavayaliraa Paolo ku mwamihi Felikisi.

² Lwa Paolo yalangwa yingiri mu kiyaalo, Taritulo yaatanga kumuyaara navoora: “Umwami wu Luyali Felikisi! Kigira ivi oveeye mwimiliri wo vogeri, kunyi kumali konyoora mirembe minene ku ing'inga indambi, kandi lilola imbiri liilio limali koletera kivala chiitu uvugasu vwi limeedeka mu vutugi.

³ Kunyi kuvugilira ligirung'ana yili kazozo munzira yoosi kandi havundu hoosi, nilisandiza linene ligali ku ivi, O, Felikisi.

⁴ Navuzwa vugira kukuluhiza, ngusaala, nuyanza ukuhulirizi ku ing'inga ngekeeke.

⁵ “Kunyi kumali konyoora mundu uyu kuva wikivihiri kuvita kegero, umugemehizi mu Vuyuda, mu lirova liosi, kandi mwimiliri munene wu muganda gwa Avanazareti.

⁶ Kali yageriza kwononyia Litembeli, navuzwa kwamugumira, [nikwenya kumukalagiri kolondekana na malago giitu.

⁷ Navuzwa Lisiasi, munene wa avasikari, yaza naakunyaga kutura mu makono giitu kuzinguru.

⁸ Maku Lisiasi yamanya nahaana amalago ndi vandu avayaalaa Paolo vaze ku ivi.] Ivi mwene ulamanya agiligali kutura kuye gi ivindu via kumuyalira.”

⁹ Avayuda vahambana kandi kudinyiriza amayaalo yago kuva agiligali.

Liekinga lia Paolo imbiri wa Felikisi

¹⁰ Lwu mwamihi yasima Paolo kuhaana munwa amolome, Paolo yativura, “Inzi mbeeye nu vuyanzi kwikinga umwene imbiri woovo nimanyi vulahi ndi, ivi wakava mukalagi wi ihiiri yiyi ku ing'inga indambi.

¹¹ Kuli ivi umwene umanyi vulahi ndi gaveeye agiligali gakiri kuvita madiku likomi na gaviri kutura ninzia Jerusalemi kusigamira Nyasaye.

¹² Avayuda yava sivanyoola nimbangalizanaa nu mundu woosi mu Litembeli mba; kandi sivanyoola neng'emehizaa kiduma mu masinagogi gaavo anoho havundu handi hoosi mu lidaala mba.

¹³ Sivanyala kololekiza imbiri woovo ndi amayaalo gavanzaalira ku ivi gaveeye agiligali mba.

¹⁴ Nitali inzi mbugilira yaga imbiri woovo: Inzi sigamira Nyasaye wa avaguuga viitu. Ku lilonda muganda gwa miigizu gumwami Yeso ugwa yavo vavoola sigoveeye gwiligali mba. Navuzwa inzi suuvira vindu viosi viang'odwa mu vitabu vie Lilaga lia Musa kandi vitabu via vaporofeti.

¹⁵ Mbeeye nilisuuvirizwa lilala liere mu Nyasaye kuli avandu vene yava vaveeye nalio ndi, avandu vosi, vombi avalungi na avadamanu valakasimugukizwi.

¹⁶ Ku yaga, nzidinyirizaa kazozo mbula nduuki kuva numwoyo kandi ni zing'anagani zitali nimbala imbiri wa Nyasaye kandi imbiri wa avandu.

¹⁷ “Inyima wokomenya ihale kutura Jerusalemi ku ing'inga indambi, ndirana yo nimbilana ovokonyi vwa mabese ku avandu vi ihiiri yange kandi kuhaana visiuviliru ku Nyasaye.

¹⁸ Lwa ndaali nindakamara kutakaswa mu Litembeli, yilwo nilwo lwa vanyoola. Si ndaali ni kiduma kandi sindaali niligoyana liosi mba.

¹⁹ Navuzwa vaali ho avayuda kutura Asia; yava nivo va gaduukiraa vave hano imbiri woovo valeete amayaalo gaavo, nivava vaveeye ni kindu cha vanzaliraa ku.

²⁰ Nigataveeye ndio, avandu yava vene vavoole uvudamanu vwa vanyoola ningoraa lwa ndaasingira imbiri wi kiyaalo kenene chavo.

²¹ Nikitali kindu kilala yiki cha ndaagamba lwa ndasingira hagati haavo: ‘Nzalwa imbiri winyu lidiku lia kalunu kigira suuviraa ndi avakuzu valakasimuguki.’ ”

²² Navuzwa Felikisi, uwaali niyamanya vulahi ligali imiima ja amigizu gu Mwami Yeso yasingiriza kiyaalo yicho navavoolera: “Sundaa likalaga lie kiyaalo yiki kuduuka lwa Lisiasi, munene wa Avasikari yaza hano.”

²³ Kunangwa yahaana malago ku musikari uwalindaa Paolo, ndi alindwi vulahi mu vuhambe, navuzwa ahevwe vovoholore vuduukana, kandi ahaane ku avalina va Paolo munwa gwu kumudenda nukumutumikira munzira yoosi ya venya.

Paolo imbiri wa Felikisi na Durusila

²⁴ Inyima wa madiku makekeeke, Felikisi yaza harara nu mukali weve Durusila uwaali mukaana wa Herodi Aguripa 1. Yalanga Paolo aleetwe; naahuliriza Paolo namolomaa ku makuva gi lisuuvira mu Kristo Yeso.

²⁵ Navuzwa lwa Paolo yaatanga kwivaala ku uvulungi, uvwilindi kandi likalaga lizaa, Felikisi yizula uvuti vunyingi, kandi yativura navoora, “Tanga uzie kulwa kalunu. Lwa nanyoole vwiyangu, naangulange.”

²⁶ Ku ing'inga ndala nzere, Felikisi yasuuvira ndi Paolo alamuha mabese. Kigira agene yaga, yahongera kulanga Paolo vuli ing'inga amolome naye.

²⁷ Navuzwa lwi mihiga giviri jaali nijakavita Porokio Fesito yavugula vwiyangu vwa Felikisi kuli mwamihi. Kigira Felikisi yenya kuyaanziza Avayuda, yaleka Paolo mu vuhambe.