Vikolwa 23 - KITABU KITAKATIFU

¹ Paolo yumika avandu vi kiyaalo, ma navoora, “Avaamitu vange, inzi menyanga imbiri wa Nyasaye mu zing'anagani kandi numwoyo mulahi kuduuka lero.”

² Na ahene yaho, Musaalisi Munene Anania yalaga yavo avaari nivasingiyi himbi ku Paolo vamukuyi olokovi ku munwa.

³ Ku Paolo yamuvolera, “Nyasaye alakukuya, ivi oveeye kuli lidiji liavakwa lidohi lilavu! Ivi wikala yaho kungaragira kolondekana ni Lilaga, navuzwa ivi mwene uvunaga Lilaga lwa ulaga ndi inzi nguywi!”

⁴ Avandu vasingira himbi ku Paolo vavoola, “Ivi onyegaa Musaalisi Munene wa Nyasaye!”

⁵ Paolo yativura, “Avaamitu vange, inzi sindaali kumanyanga ndi, aveeye Musaalisi Munene mba. Mang'oda Matakatifu gavoora, ‘Si ulavoola uvudamanu ku mwamihi wa avandu vovo mba.’ ”

⁶ Navuzwa lwa Paolo yalora ndi kiduma kilala nicha Avasadukayo ni ikindi cha Avafarisayo, yahanzuka imbiri wi kiyaalo navoora, “Avaamitu vange, inzi nu Mufarisayo, umwana wu Mufarisayo. Inzi mali koleetwa mu kiyaalo kigira lisuuvira liambeeye nalio ndi avakuzu valakasimuguki.”

⁷ Lwa yamala kovora ndio, lirembana liatulira hagati ha Avafarisayo na Avasadukayo kandi muganda gwavukana.

⁸ Kigira Avasadukayo vavoola ndi, siaveeye ho ni lisimuka lia avandu kutura mu vakuzu, anoho zingelosi anoho miroho mba, navuzwa Avafarisayo vasuuvira mu viosi vivaga.

⁹ Liyoga ni lihanzuka linene liameedeka ligali na avalala ku avigizi vi Lilaga vu muganda gwa Avafarisayo vasingira kuhing'ana mu liekinga nizinguru, nivavoora, “Sikololaa kindu kidamanu ku mundu uyu mba! Hawundi roho, anoho engelosi yavolerana naye ligali.”

¹⁰ Lwi lihing'ana lia mahangali manene liameedeka ligali kuvita, munene wa vasikari wa Varumi yatia ligali gase valatandula Paolo mu vidonye. Kulwayago yalaga avasikari vazie mu kiduma vamutulize hagati haavo kuzinguru vamuleete mu mbinga.

¹¹ Uvudiku vwalonda ku; Mwami Yeso yasingira himbi na Paolo navoora, “Uleme mwoyo, kandi uluviliri; kigira kuli ulolekizi inzi mu Jerusalemi ulandolekiza kandi mu Rumi.”

Avayuda valohiza kwita Paolo

¹² Lwa vwacha, Avayuda vavugana harara nivalohiza kuli vita Paolo. Visuuhizana nivavoora ndi, “Sikunyala kulia anoho kunwa niiva kukikiri kwita Paolo mba.”

¹³ Vaali avandu kuvita arubaini avalohizaa yaga mu vwivisu.

¹⁴ Maku vazia ku avasaalisi vanene na vakulundu nivavoora, “Kumali kwisuuha liesuuha linene ndi kutalia kindu nikukiri kwita Paolo mba.

¹⁵ Kunangwa na munyi, harara ni kiyaalo, mutumi amakuva ku munene wa avasikari va Varumi, aleete Paolo ku munyi, nimwigadaa ndi mwenya kumanya amakuva giligali geege kutura kuye. Navuzwa kunyi kwetegeki kumwita kali nakikiri kuduuka hano.”

¹⁶ Navuzwa muyaayi wa mbozo Paolo, yahulira amakura gi ligoneka liavo, ma yazia mu limbinga ya avasikari navolera Paolo.

¹⁷ Paolo yalanga mulala ku vanene va avasikari mia namuvolera, “Hila muyaayi uyu ku Munene wa Avasikari elefu, kigira aveeye ni likuva liu kumuvolera.”

¹⁸ Ku munene wa avasikari mia yamuvugula naamuhira ku munene wa avasikari elefu navoora, “Paolo, umuhambe, yanaanga nandeeva ndete umuyaayi uyu ku ivi, kigira aveeye ni likuva liu kokovoolera.”

¹⁹ Munene wa avasikari elefu yagumira muyaayi oyo mukono, naamuhira halovega ahivisu namuteeva, “Ni kindu ki cha wenya kombolera?”

²⁰ Naye yavoola, “Avanene va Avayuda vavugirizani koteeva ivi oleete Paolo mu kiyaalo chavo kenene, mugamba nivigadiza ndi venya kumuvolera amakuva giligali geege.

²¹ Navuzwa utavavugilira mba, kigira avandu kuvita arubaini vamugoneki. Vamali kwisuuha sivalalia anoho kunwa nivakikiri kumwita mba. Kalunu vamali kwetegeka kumwita navuzwa valindilira likaala ga liilio.”

²² Munene wa avasikari elefu yalakuula muyaayi oyo namwiganihiza, “Utavoolera mundu kali mulala ndi umali kombolera makuva yaga mba.”

Paolo yahilwa ku mwamihi Felikisi

²³ Maku, munene wa avasikari elefu yalanga avanene vaviri va vasikari mia mbiri, navavoolera “Mwetegekizi avasikari mia mbiri, kandi avandi sabwini avaniina ku zibarasi na avasikari va matimu mia mbiri vazie Kaisaria zisa zivaga ziu vudiku.

²⁴ Mwetegekizi zibarasi zindi zigingi Paolo, kunangwa Paolo aduuki kuhilwa vulahi kuduuka ku Gavana Felikisi.”

²⁵ Kunangwa munene wa avasikari elefu yang'oda ibarwa kuli ndi:

²⁶ “Inzi Kilaudia Lisiasi, Ngong'odera ivi Felikisi, mwamihi wu luyali. Mirembe.

²⁷ Mundu uyu, yagumirwa na Avayuda na yaali ahimbi kwitwa. Lwa ndanyoora ndi aveeye murumi, ndaazia kuvo vwangu navasikari kumuhonyia.

²⁸ Ndeenya kumanya kivuni cha vamuyaalira, ku ndamuleeta mu kiyaalo chavo kenene.

²⁹ Ndanyoora ndi vamuyaara kolondekana na amateeva ku amalago gaavo, navuzwa sihaveeyeho ni kindu kuye cha vamuyaalira ikiduukanaa yiitwi anoho avofwe mba.

³⁰ Lwa ndavuulirwa ndi Avayuda vandi valohizi kwita mundu uyu, ahene yaho ndaatovora kumuleeta ku lvi; Mali kulaga avandu vamuyaara valeete mayaalo gaavo imbiri woovo.”

³¹ Avasikari vaakora kuli vahevwa malago. Vaavugura Paolo kutura Jerusalemi nivamuhila mu vudiku kuduuka Andipaturi.

³² Lidiku lialonda ku avasikari vukuvirenge valeka avasikari vanina ku zibarasi, kuzia naye, nivirana mumbinga.

³³ Lwa vaduuka Kaisaria, vahaana ibarwa ku mwamihi kandi nivavaviika Paolo imbiri weve.

³⁴ Lwu Mwamihi yasoma ibarwa, yateeva Paolo atulaa mu kivala ki. Lwa yamanya ndi Paolo atulaa mu kivala cha Kilikia,

³⁵ yavoola, “Ndakakuhulizi lwa avandu vakuyaala vaduuka.” Yahaana malago ndi Paolo alindirwi munyumba yu vwami ya Herodi.