Vikolwa 22 - KITABU KITAKATIFU

¹ “Avaamitu na vababa, mumbulirizi kalunu lwa nyenya kumutivulira kindu!”

² Lwa vahulira namolomaa kuvo mu Luheburaina, vakiring'anira ligali. Paolo yavoola.

³ “Inzi mbeeye Muyuda, wivulirwa Tariso lidaala lia Kilikia. Navuzwa ndavirukira mu lidaala lia Jerusalemi, ninzigizwa hasi hu mwigizi Gamalieli. Ndigizwa vulahi ligali kolonda ligali Lilaga lia avaguuga viitu. Ndihaana nu mwoyo gwosi ku Nyasaye, kuli munyi mwosi muveeye kalunu.

⁴ Ndadambiza avandu valonda amigizu gu Mwami Yeso yaga. Ndaagumira, avasaza na vakali, nimbahila mu vuhambe.

⁵ Musaalisi Munene ni kiyaalo choosi cha vakulundu vanyara kondolekiza ndi mboraa agiligali. Ndaavugura zibarwa kutura kuvo, ziang'oderwa avaamitu Vayuda vache vange avaari Damasiko. Ndaazia Damasiko kugumira avandu yavo, kandi ni mbaleeta Jerusalemi nivavoheywi vaduuki kohevwa mageri

Paolo yamoloma ku lieganira lilie

⁶ “Kunangwa, lwa ndaali ninziza Damasiko, nimbeeye himbi kuduuka yo, niyenyaa kuduuka mbasu hagati, nonoho vulavu vonene vwatula mwigulu nivong'ereng'ana ku inzi zimbega ziosi.

⁷ Ndaagwa hasi. Nimbulira mwoyo nigombolera, ‘Saolo, Saolo! Kigira ki undambizaa?’

⁸ Ndavoora, ‘Ivi nivwaha, Mwami?’ Naye yambolera, ‘Inzi ni Yeso wa Nazareti wa ivi udambiza.’

⁹ Avache vange vandaali navo valora uvulavu yivwo navuzwa sivahulira mwoyo gwa uyu wamoloma ninzi mba.

¹⁰ Ndateeva, ‘Ngola ki, Mwami?’ Mwami yambolera, ‘Vuka uzie Damasiko; na ulavoolerwa vindu viosi via Nyasaye yenya okole.’

¹¹ Kigira uvwaku vwu vulavu yivwo, sindaali nyara kolola mba; kunangwa ganiga avache vange kunzimilira nivang'umiyi mukono kuduuka ninduuka Damasiko.

¹² “Yaali yo mundu mulala walangwa Anania, mundu watia Nyasaye, uwatia Lilaga lietu, kandi waali nu luyali lonene imbiri wa Vayuda vosi avamenyaa Damasiko.

¹³ Mwene uyu yaza kondola, na asingiraa ahimbi ninzi, navoora, ‘Amiitu Saolo! Lola kandi.’ Ing'inga yene yeyo ndalora kandi, nimuhenza.

¹⁴ Anania yavoola, ‘Nyasaye wa avaguuga viitu umali kokotovola uduuki kumanya uvulariri vwivwe, no kolola Mutumikiri mulungi weve, nu kumuhulira na amolomaa numwoyo gwigwe.

¹⁵ Ulamulolekiza ku vandu vosi; uvavoolere vindu via walola nu kuvihulira.

¹⁶ Kalunu kigira ki ulindagira kandi? Singira ubatizwi, kandi wogizwi uvwoni vuvwo ku lieyama lieta lilie.’

Lilangwa lia Paolo kwilwazira avandu avizihiiri

¹⁷ “Lwa ndirana Jerusalemi, na lwa ndaali nisaara mu Litembeli, ndaalora malola.

¹⁸ Ndaalora Mwami niyambolera, ‘Kola vwangu! Tula mu Jerusalemi zimbiru, kigira avandu va hano sivalavugilira lilolekiza liilio ku inzi mba.’

¹⁹ Ndaamutivulira, ‘Mwami, yavo aveene vamanyi vulahi ligali ndi inzi niyie uwavodong'ana mu masinagogi nimboha nu kukuya vandu avasuuviraa mu ivi.

²⁰ Lwa masahi ga Sitefano, mulolekizi woovo gasundulwa, inzi mwene ndaasingira ho, nimbugiliraa kekolwa yicho; kandi ndaalinda zinguvu zia yavo avaari nivamwita.’

²¹ Navuzwa Mwami yambolera, ‘Zia, kigira ndakutuma ihale ku avandu vi Zihiiri zindi.’ ”

Paolo aveeye wi ihiiri ya varumi

²² Avandu yavo vahuliriza Paolo kuduuka lwa yavoola likuva liu kuzia ku avandu vi zihiiri. Navuzwa vatanga kuhanzuka nivavoora, “Tulizi mundu ku lirova; mundu wu lugano yilu siaduukanaa kuva mwoyo mba; mwiti.”

²³ Vazizagilira kuhanzuka, nukusung'usa zinguvu ziavo kandi nivaduuminya luguchi mwigulu mu vutima.

²⁴ Munene wa Avasikari va varumi yalaga Paolo ahilwi munyumba yalindwa imbinga mwa Avasikari vamenya. Yahaana munwa vamutevelerize nilikuya kuduuka aduuki kovora kivuni kigira avayuda vamuhanzukira nukumuvoolera kuli ndi.

²⁵ Navuzwa lwa vaali nivakamara kumuvoha akuywi nizingova, Paolo yateeva munene wa avasikari mia, uwaali nasingiyi ahene yaho, “Ni lilago ku munyi kukuya mundu Murumi nakikiri kukalagirwa ku vudamanu vwa yakola?”

²⁶ Lwu munene wa vasikari mia yahulira ndio, yazia vwangu ku munene wa vasikari va Varumi navoora, “Okolaa kindiki? Mundu uyu aveeye Murumi.”

²⁷ Kunangwa munene wa vasikari wa Varumi oyo yazia ku Paolo namuteeva, “Mbolera, hene ivi oveeye Murumi?” Paolo yativura, “Yee, inzi mbeeye”.

²⁸ Munene wa vasikari oyo yavoola, “Inzi ndaagwa mulala ku Avarumi mu litunga mabese manyingi ligali.” Paolo yativura, “Navuzwa inzi ndivulwa Murumi.”

²⁹ Na ahene yaho avasikari yavo, avenya koteveleriza Paolo vamuleka. Lwu munene wa avasikari oyo yamanya ndi Paolo nu Murumi, yatia ligali, kigira yaali naamuvohi ni minyororo.

Paolo imbiri wi kiyaalo kenene cha Vayuda ichalangwa Sanhedrini

³⁰ Ku lidiku lialonda ku, munene wa avasikari va Varumi yenya kumanya kivuni kigira Avayuda ni vayaala Paolo. Yamuvoholora minyororo, nalaga avasaalisi vanene vi kiyaalo choosi kuvugana harara. Maku yavugula Paolo, naamusingiriza imbiri wavo.