Vikolwa 20 - KITABU KITAKATIFU

¹ Lwa ikivihiri chaali Efeso chakiring'ana, Paolo yalanga vandu, avasuuviraa harara na avadinyiriza. Maku yavasivula, natanga logendo kuzia Makedonia.

² Yavitira mu zimbega zie vivala yivio, nadinyiriza avandu na makuva manyingi. Inyima yaduuka Ivuguriki,

³ wa yamenya mieli jivaga. Lwa yaali niyetegeka kuzia Siria, yahulira ndi Avayuda vaali nivamugoneki vamwiti; ku lwa yago yamanya niyiirana navitira Makedonia.

⁴ Sopaturo mwana, wa Piriho wa Berea, yazia harara naye; kandi Arisitariko na Sekundo kutura Tesalonike, Gayo kutura Deribe, Timateo, Tukiko na Turofimo kutura Asia.

⁵ Yava vimilira imbiri wiitu nivakulindilira Turoasi.

⁶ Inyima wa madiku gi Migadi jitali na Mamera, kwanina mu liato kutura Filipi, na inyima wa madiku gatano kwaduka kuvo mu Turoasi. Kwamenya yo lisiza lilala.

Liagana liu kumaliriza na vandu vasuuvira va Turoasi

⁷ Ku lidiku lia Jumamosi hamugorova, kwavugana harara komeganyia mugadi. Kigira Paolo yaali niyenyaa kuzia mugamba golonda ku, yiilwazira avandu, nazizagilira kwilwaza kuduuka vudiku hagati.

⁸ Munyumba yi igulu ya kwavuganira mu, zitaya zinyingi ziali mu niziaduukaa.

⁹ Musoleri mulala walangwa Eutiko yaali niyikaye mwidirisha lwa Paolo yaali na azizagiliraa kwilwaza. Eutuko yaatanga kotengeza, na inyima zindoolo ziamukira, ma niyaguluka hasi kutura munyumba ya kavaga yigulu. Vamudola namali kukuza.

¹⁰ Navuzwa Paolo yika hasi nakumberera musoleri oyo, navoora, “Mutahenda mwoyo mba, kigira akikiri mwoyo.”

¹¹ Yanina igulu kandi, nameganyia mugadi, nalia. Yaazizagilira kwilwaza ku ing'inga indambi kuduuka lwa vwacha, ma nazia.

¹² Avandu yavo vaavugura muyaayi nivamuhila yengo naveeye mwoyo. Valema mwoyo ligali.

Paolo yatura Turoasi kuzia Mileto

¹³ Kwanina mu liato nikwimira kuzia Asosi, wa kwenya kuvugulira Paolo. Nindio yalohiza; kigira yenya kuduuka yo kuvitira mu kivala.

¹⁴ Lwa yakonyoola Asosi, nikumwingiriza mu liato, nikuzia Mitulene.

¹⁵ Kutura uwene yeyo kwazia nikuduuka Kiosi lidiku lialondaku. Lidiku lia kaviri kwasingira Samo, na mugamba gundi kwaduka Mileto.

¹⁶ Paolo yaali niyenyaa kuzizagilira no logendo lwi liato vugira kuvitira Efeso, avuli kuguunza mu Asia mba. Yenya azie vwangu aduuki Jerusalemi lidiku lia Pendekote niganyalika.

Paolo yasivulana na vakulundu va Efeso

¹⁷ Kutura Mileto Paolo yatuma mundu na makuva ku vakulundu vi likanisa lia Efeso navalanga vavugane naye.

¹⁸ Lwa vaduuka kuye, yavavolera, “Munyi mumanyi kuli ndamenya zing'inga ziosi harara nimunyi kutura lidiku liu kutanga lia ndaduuka Asia

¹⁹ Mumanyi kuli ndatumikira Mwami ni liegehiza liosi, na maliga goosi ndakora miyinzi jange kuli mutumwa wumwami mu ing'inga yu vudinyu vunyingi uvwangwira kigira vuhimwa vwa Vayuda.

²⁰ Mumanyi vulahi sindaaleka kali hakuzu kumwilwazira imbiri wa vandu vosi, kandi mu zinyumba zienyu; nimwigiza goosi aganyala kumukonya.

²¹ Ndiganihiza avandu vosi Vayuda, na vandu vi zihiiri, viganiri ma viirane ku Nyasaye, nu kusuuvira Mwami wiitu Yeso Kristo.

²² Kalunu, huliri! Mulitia Roho Mutakatifu, nziza Jerusalemi vugira kumanya agalingwira yo.

²³ Navuzwa icha manyi ni yiki, Roho Mutakatifu yanziganihizaa ndi mu madaala goosi livofwa ni lidambizwa nivio vinindiliyi.

²⁴ Navuzwa livamwoyo liange sindivalizaa kuva kindu ku inzi mba, nitali nduuki kuduukiza uvutumiki vwange, nu kumala miyinzi ju Mwami Yeso yamba kujikola, ijiveeye kulandiza Ivangeri yi zimbavasi zia Nyasaye.

²⁵ “Ndaavodong'anangi yiyi niyi mu munyi ninzilwaza Uvwami vwa Nyasaye. Navuzwa, kalunu siaveeyeho kali mulala ku munyi ulindola kandi.

²⁶ Kunangwa, muvooleraa lero ndi, mulala ku munyi naagota, simbeeye ni ligovi liosi mba.

²⁷ Sindaleka kali hakuzu kumulandizira makuva gi lienya liosi lia Nyasaye.

²⁸ Mwilindi aveene; kandi mulindi chayo choosi cha Roho Mutakatifu yavika munyi kuva avahenzi vacho. Muve avayi vi likanisa lia Nyasaye lia yenyolera kuvitira mu masahi gu Mwana weve.

²⁹ Inzi manyi vulahi ligali ndi, inyima wu litura liange, vivwi vilulu vilamwingilira, navio si vilavererera ichayo mba.

³⁰ Kali mu munyi valatura mu avandu, avavoora amakuva go vovehi, vaduuki kogotiza avandu nu kuvang'usa vavalonde.

³¹ Ku lwa yago, mulindi nimwizuliza ndi ku ing'inga yi mihiga jivaga, uvudiku na mbasu, sindaaluha kwigiza vuli mundu ku munyi na maliga.

³² “Kunangwa kalunu ndi muviika mu vulindi vwa Nyasaye kandi mu likuva lie zimbavasi zizie, liveeye nu vunyali vwu kumwumbaka nu kumuha vugasu vwa yavikira avandu veve.

³³ Inzi sindaakayirwa kali hakuzu ifeza yu mundu anoho zahabu anoho zinguvu.

³⁴ Munyi aveene mumanyi ndayinzira na makono gange mwene, nduuki konyoora lienya liange, ni lia yavo avaari harara ninzi.

³⁵ Inzi mali kumumanyia mu zinzira ziosi ndi, ku liyinzira vudinyu, gakuduukiraa kokoonye avadedekere, nikwizuliza amakuva gu Mwami Yeso mwene yavoola, ‘Lihaana liveeye nu vugasu kuvita livugula.’ ”

³⁶ Lwa yamala kovora yaga, Paolo yasigama harara navo vosi, nasaalaa.

³⁷ Vosi vaalira ligali nivamukumberera nivamuvuusa nivamusiivula.

³⁸ Kindu chavavereriza ligali mbitilira chaali likuva lia yavoola ndi sivalimulola kandi mba. Kunangwa, vamuhereka kuduuka mu liato.