Vikolwa 18 - KITABU KITAKATIFU

¹ Inyima wa yaga, Paolo yatura Azene, nazia Korinzo.

² Wene yeyo yanyoora yo Muyuda mulala walangwa Akwila wivulwa mu Ponto. Akwila harara nu mukali weve walangwa Berisila, vaali nivirani kutura Italia ing'inga yene yeyo, kigira Umwami Munene wa Rumi walangwa Kilaudia yaali natulizi lilago ndi Avayuda vosi vakungwi kutura mu kivala cha Rumi. Paolo yazia kuvalola.

³ Kigira vaali avasiza vu kunava amahema kuli Paolo, yamenya navo, nivakora miyinzi harara.

⁴ Yamoloma nizinguru mu lisinagogi Masabato goosi, nageriza kokora Avayuda na Avaguriki vandu Vasuuvira.

⁵ Lwa Sila na Timateo virana kutura Makedonia, Paolo yatumikira vwiyangu vwivwe vwosi ku lilwaza, niyivaalira Avayuda ndi Yeso niyie Mesia.

⁶ Lwa vahing'ana naye nivatanga kumunyega, yavungula luguchi kutura kuzinguvu zizie imbiri wavo navavoolera, “Masahi ginyu gave ku munyi aveene. Inzi mbula imbara mu makuva yaga. Na kutura kalunu nziza ku avandu vi Zihiiri zindi.”

⁷ Kunangwa yavaleka nazia komenya munyumba yu mundu mulala uwatia Nyasaye, uwalangwa Tito Jusito. Inyumba yeeye yaali ahimbi ni lisinagogi.

⁸ Krisipo, munene wi lisinagogi, yasuuvira mu Mwami, oyo harara na avinyumba yeeye vosi. Avandu va Korinzo avanyingi avahulira likuva lia Paolo vasuuvira, kandi nivabatizwa.

⁹ Lidiku lilala mu vudiku, Mwami yavolera Paolo mu maloto, “Utatia mba, uzizagiliri kwilwaza vugira kukuza umwoyo,

¹⁰ kigira inzi mbeeye harara nivi. Sihaveeye nu mundu ukusaliriza mba, kigira mu lidaala yili mbeeye mu na avandu vanyingi.”

¹¹ Paolo yamenya mu ku ing'inga yu muhiga mulala ni nusu, niyigiza likuva lia Nyasaye.

¹² Navuzwa ing'inga ya Galio yaali mwamihi wa Akaya, Avayuda vingilira Paolo nu mwoyo mulala nivamuhila mu kiyaalo chi likalaga.

¹³ Vavoola, “Mundu uyu agoonyelizaa avandu vasigamiri Nyasaye munzira yukuhing'ana ni Lilaga lietu.”

¹⁴ Navuzwa lwa Paolo yaali naveeye himbi kutanga komoloma, Galio yavolera Avayuda, “ Huliri, munyi Avayuda niiva amakuva yaga gakaveeye agu kuhing'ana ni Lilaga anoho uvwoni vudamanu, ngano ndakamuhulirizi.

¹⁵ Navuzwa kigira mahangali ga amakuva na amita ga Malago ginyu, munyi aveene mukalage. Inzi sinyenyanga kuva mukalagi wa makuva yaga mba!”

¹⁶ Kunangwa, yavakunga kutura mu kiyaalo chi likalaga.

¹⁷ Vosi vagumira Sosizenesi, uwaali munene wi lisinagogi, nivamukuyira imbiri wi kiyaalo chi likalaga. Navuzwa Galio si yahenda mwoyo ku kekolwa yiki kali hakuzu mba.

Paolo yirana Andiokia

¹⁸ Inyima wa yaga, Paolo yaazizagilira komenya na vandu avasuuviraa mu Korinzo madiku manyingi. Inyima yavasivula, naniina mu liato kuzia Siria harara na Berisila na Akwila. Naveeye mu Kengurea, yavega liisu lilie kigira yaali na aviiki lilagana liokwisuuha ku Nyasaye.

¹⁹ Vaduuka Efeso, aha Paolo yaleka Berisila na Akwila. Yingira mu lisinagogi, natanga komoloma na Vayuda.

²⁰ Lwa vamuteeva amenye navo madiku gandi manyingi, siyavugilira mba.

²¹ Navuzwa lwa yaali navasiivulaa, yavoola, “Niiva Nyasaye nayanza ndaaza nzizi ku munyi kandi vwangu.” Yanina muliato natura Efeso.

²² Lwi liato lia yaali mu liaduuka ha Kaisaria, Paolo, yanigira Jerusalemi kucheliza likanisa, ma nazia Andiokia.

²³ Yamenya yo ing'inga engekeeke, ma na azizagiliraa no logendo lwilwe, na avitira mu kivala cha Galatia na Furija naadinyiriza vandu avasuuviraa vosi.

Apolo yilwaza mu Efeso na Korinzo

²⁴ Muyuda mulala, uwalangwa Apolo, wivulwa kutura Alekisandaria, yaza Efeso. Yaali mundu wamanya komoloma vulahi, kandi yaali uwamanya Mang'oda Matakatifu vulahi.

²⁵ Yaali niyigizwa amakuva gu Mwami Yeso; yaali nu vugulu mu lilwaza ni yigiza amakuva ga Yeso vulahi kali niiva yaali niyamanya libatiza lia Yohana lienyine.

²⁶ Lwa Berisila na Akwila vahulira namolomaa nu vuluviliri mu lisinagogi, vamuvugura nivamuhila yengo uwavo, nivamwivaalira miigizu ga Nyasaye vulahi ligali

²⁷ Lwa Apolo yenya kuzia Akaya, vamiitu avasuuviraa mu Efeso vamuzuva nivang'odera vandu avasuuviraa mu Akaya vamwingirizi. Lwa yaduuka yo, yakoonya ligali avaamitu vaali nivasuuvira kuvitira mu vunyali vwi zimbavasi zia Nyasaye.

²⁸ Yaazizagilira komoloma nu vuluviliri nu kuguuta Vayuda imbiri wa avandu, navamanyia kuvitira mu Mang'oda Matakatifu ndi Yeso aveeye Mesia.