Vikolwa 15 - KITABU KITAKATIFU

¹ Avandu valala vaza Andiokia kutura Ivuyuda nivatanga kwigiza avaamitu, nivavoora ndi: “Nimutakevwa kolondekana ni miima ji Lilaga lia Musa, simunyala kohonywa mba.”

² Paolo na Baranaba vaali na mahangali manene na vandu yavo kigira likuva yili. Lwa Paolo na Baranaba vaali nivamali kotevana navo, likalaga liavo liali ndi: Paolo na Baranaba harara na vandu vasuuvira valala kuvo vi Livugana lia Andiokia, vazie Jerusalemi kolola vatumwa na vakulundu ku likuva liene yili.

³ Kunangwa likanisa liavasivula nivavatuma vazie ku logendo lwavo. Vaali nivavitira mu Foenisia nu mu Samaria, nivivalira vandu avasuuviraa kuli avizihiiri zindi viganira kuuza ku Nyasaye. Amakuva yaga gayaanziza avaamitu yavo vosi ligali.

⁴ Lwa vaduuka Jerusalemi vingirizwa vulahi ni likanisa na avatumwa kandi navakulundu. Vavavolera kandi havulavu amakuva goosi agi ivindu via Nyasaye yaali naakori kuvitira muvo.

⁵ Navuzwa avalala ku vandu avasuuviraa avaatura ku muganda gwa Vafarisayo, vasingira nivavoora, “Gaduukiraa avandu vi Zihiiri vakevwe; kandi gadukanaa vigizwi kugumira Lilaga lia Musa.”

⁶ Avatumwa navakulundu vavugana harara kuganagana nokohenzeriza likuva yili.

⁷ Lwa vamala kotevana amateeva manyingi, Petero yasingira navoora, “Avaamitu vange, munyi mumanyi vulahi ndi ku zing'inga ziavita, Nyasaye yandovola kutuia hagati hinyu, nzilwaze Ivangeri ku vandu Avizihiiri kunangwa vaduuki kuhulira nukusuuvira.

⁸ Nyasaye umanya zing'anagani zie mioyo ja avandu, yalolekiza ndi, umali kuvavugilira mu lihaa Roho Mutakatifu vave kuli yaaha kunyi.

⁹ Siyalomba liavukanyia liosi hagati hiitu navo mba. Yasamiha uvwoni vwavo kigira vasuuvira.

¹⁰ Kunangwa kigira ki kalunu mwenya kogeriza Nyasaye ku lidwika vandu avasuuviraa yava umusigo ku migongo, kali ugwa vaguuga viitu, anoho kunyi vene sikunyala kuginga kali hakuzu?

¹¹ Gatava ndio! Kunyi kusuuvira kandi kuhonywaa ku zimbavasi ziu Mwami Yeso, kuli yava navo kandi vasuuvira.”

¹² Kiduma choosi chakiring'ana; nivahuliriza Baranaba na Paolo nivivalanga vilolekizu ni viokogenyia via Nyasaye yakola kuvitira muvo na amakono gaavo mu avandu vi Zihiiri.

¹³ Lwa vaali nivakamara komoloma, Yakobo yaatanga kovora: “Avaamitu vange, mbulirizi!

¹⁴ Simoni umali kwivaala kuli Nyasaye yaatanga kuyaanzilira kuluuta avandu vi Zihiiri, natovora avalala kuvo vaduuki kuva avandu veve.

¹⁵ Likuva yili liileng'ani na makuva ga avaporofeti, kuli Amang'oda Matakatifu gavoora:

¹⁶ Mwami ‘Inyima wi vindu yivi inze ndirana, avoora, na ndumbaka vuhia inyumba ya Daudi iyaali niyagwa, kandi ndumbaka ichanyi chayo ndagisingiriza vuhia kandi.

¹⁷ Hene yaho avandu vandi vosi, kandi avandu vi zihiiri vosi ava ndalanga vave avandu avange, valaza ku inzi.

¹⁸ Nindio Mwami, uwakola vindu yivi vimanyikane kutura kale, avoora ndio.’

¹⁹ “Kulwayago, likalaga liange ni yili, kutanyangiza Avizihiiri avagirung'ana kuuza ku Nyasaye.

²⁰ Navuzwa kuvang'odere ibarwa kuvavoolera ndi vatalia viukulia vikoleywi vidamanu ku lihaanwa ku misambwa ja vanyasaye mba; valeke ovoheyi; vatalia inyama yoosi imigiywi, kandi vatanwa amasahi.

²¹ Kutura kale, malago ga Musa gilwazwa mu madaala goosi, nigasomwa mu masinagogi goosi madiku gi Lisabato goosi.”

Ibarwa ku vandu Avizihiiri vasuuvira

²² Maku, Avatumwa, avakulundu, harara ni likanisa liosi, vayanzizwa kotovola avandu valala kuvo nukuvatuma kuzia Andiokia, harara na Paolo na Baranaba. Vamanya vatovole Yuda, uwalangwa kandi Barisaba, na Sila; vosi vaali avandu vamanyikana ligali hagati ha avaamitu.

²³ Vaavaha ibarwa yang'odwa kuli ndi: “Kunyi, avatumwa navakulundu, avaamitu vinyu. Kuchelizaa munyi avaamitu vi Zihiiri zindi avamuveeye mu Andiokia, Siria na Kilikia.

²⁴ Kunyi kuhuliyi ndi avandu vandi kutura mu muganda gwitu vamunyangiza na makuva gaavo, nivamuhendiza mioyo jinyu. Navuzwa vakora ndio vugira munwa kutura ku kunyi.

²⁵ Kunangwa kunyi kwosi kumali kukalaga nu mwoyo mulala, kotovola avandu valala nu kuvatuma ku munyi harara na avayaanze viitu Baranaba na Paolo.

²⁶ Avandu yava vihaana kogotiza livamwoyo liavo kuvitira mu vudinyu vwosi kigira lieta liu Mwami wiitu Yeso Kristo.

²⁷ Ku lwa yago, kutumaa yaho Yuda na Sila ku munyi; yava valamuvoolera aveene vindu vilala viele via kumali kung'oda.

²⁸ Galoleki amalahi ku Roho Mutakatifu kandi ku kunyi kutamudwika musigo guvitaa vindu vinene yivi mba:

²⁹ Mutalia viukulia vihaaniywi ku misambwa mba; mutanwa amasahi mba; mutalia inyama yu mutugu gumigiywi mba; na mwiyahuli ku voheyi. Mulava nimukoli vulahi niiva mulaleka kokora vindu yivi. Nyasaye amugasizi.”

³⁰ Maku lwa vamala kusiivulwa, avatumwa yavo vazia Andiokia nivalanga livugana lia vandu vasuuvira vosi, nivavaha ibarwa.

³¹ Lwa vasoma ibarwa yeyo, amakuva gayo gavaleminya mioyo, nivayaanza ligali.

³² Yuda na Sila, avaari avaporofeti vamoloma na avaamitu yavo ku ing'inga indambi nivavaleminya mioyo nu kuvadinyiriza.

³³ Lwa vamala komenya yo ing'inga iduuki, avaamitu va Andiokia vavasiivula ni mirembe, nivirana ku vatumwa. [

³⁴ Navuzwa Sila yatovola komenya yo]

³⁵ Paolo na Baranaba vamenya mu Andiokia ku ing'inga nivigiza nu kwilwaza likuva liu Mwami, harara na vandu vandi vanyingi.

Paolo na Baranaba vaavukana

³⁶ Inyima wa madiku gaduuki, Paolo yavolera Baranaba, “Kalunu kwirane kuzia kolola avaamitu mu madaala goosi ga kwilwaza mu likuva liu Mwami, kolole kuli vazizagilira.”

³⁷ Baranaba yenya vazie na Yohana walangwa Mariko.

³⁸ Navuzwa Paolo siyayaanza vazie na Mariko owaali navaleki kuzia Pamufilia, nasuura kusanga mu miyinzi jaavo.

³⁹ Maku vaali na mahangali manene hagati haavo, kuduuka nivavukana. Baranaba yavugula Mariko, nivaniina mu liato nivazia Saipurasi.

⁴⁰ Navuzwa Paolo yatovola Sila. Lwa avaamitu va ahene yaho vamala kumuviika mu vulindi vwi zimbavasi ziu Mwami, vatanga logendo.

⁴¹ Vavitira Siria na Kilikia nivadinyirizaa amakanisa.