Vikolwa 13 - KITABU KITAKATIFU

¹ Mu likanisa liali ha Andiokia vaali ho avandu valala avaari avaporofeti kandi avigizi. Baranaba, Simioni walangwa kandi Nigeri, Lukia wa Kurene, Manaeri waali niyavirukizwa harara nu Mwami Herodi, na Saolo.

² Lwa vaali nivasigamiraa Mwami, kandi nivahonga lilia, Roho Mutakatifu yavavolera, “Muviiki halovega Baranaba na Saolo kigira miyinzi ja mbalangiraa.”

³ Lwa vamala kusaala, nivahonga lilia, vaviika amakono gaavo kuvo, nivavatuma vazie.

Avatumwa vilwaza mu kisulu cha Saipurasi

⁴ Lwa Baranaba na Saolo vaali nivakatumwa na Roho Mutakatifu vasulunguta kuduuka Seleukia; kutura uwene yeyo vanina mu liato nivazia mu kisulu chinyanza ichalangwa Saipurasi.

⁵ Lwa vaduuka ha Salami, vilwaza likuva lia Nyasaye mu masinagogi ga Vayuda. Yohana walangwa Mariko yaali mutumikiri wavo.

⁶ Vagenda kutura kolovega lulala lwi kisulu kuduuka Pafo lovega lwa kaviri, nivanyoora yo musigitiri mulala Muyuda, walangwa Bari-Yeso, uwilangaa muporofeti.

⁷ Uyu yaali mulina wu mwami Serigo Paolo, uwaali mundu mugeri ligali. Yaali munene wi kisulu yicho. Serigo Paolo yalanga Baranaba na Saolo aduuki kuhulira likuva lia Nyasaye.

⁸ Navuzwa vahangalizwa nu musigitiri Elima kuli yalangwa mu Luguriki, uwageriza kwigalira munene wikisulu avuli koyeeka ku lisuuvira lia Kristo.

⁹ Maku, Saolo uwalangwa kandi Paolo, niyizuuyi Roho Mutakatifu, yumika musigitiri oyo,

¹⁰ navoora, “Henza! Mwana wa Setani ivi! Ivi uwizula vugadi ni kirage choosi! Oveeye musigu wu vulungi; si oleka ku lulala kuchaminya zinzira zinungi ziu Mwami?

¹¹ Kalunu Mwami alaleeta maduywa ku ivi: ulavakula, na si ulalola vulavu vwi liuva ku ing'inga iduuki mba.” Nonoho lilumbi ni kisundi viamukunika, natanga kuhunahuna niyenya umundu wu kumugumira mukono amwimiliri.

¹² Lwu munene wi kisulu oyo yalora yaga, yasuuvira nagenya ligali ku amigizu gu Mwami ga yahulira.

Baranaba na Paolo mu lidaala lia Andiokia mu Pisidia

¹³ Kutura Pafo, Paolo na avache veve vanina mu liato nivazia kuduuka Periga lidaala mu Pamufilia. Navuzwa Yohana uwalangwa kandi Mariko, yavaleka niyirana Jerusalemi.

¹⁴ Navuzwa yavo vazizagilira nologendo kutura Periga, nivaduuka mu lidaala lia Andiokia mu kivala cha Pisidia. Lidiku lie Lisabato vingira mu lisinagogi nivikara.

¹⁵ Inyima wi lisoma mu kitabu chi Lilaga lia Musa kandi mu mang'oda ga vaporofeti, avanene vi lisinagogi vaatuma mundu kuvo kovora ndi: “Avaamitu, nimuveeye ni likuva liu kudinyiriza vandu, muvavoolere.”

¹⁶ Kunangwa Paolo yasingira navagerera mukono, natanga kovora: “Avandu va Isiraeli, na Avizihiiri vosi avasigamiraa Nyasaye; mbulirizi!

¹⁷ Nyasaye wa avandu va Isiraeli yatovola avaguuga viitu navakola vave ihiiri enene lwa vamenya mu kivala cha Egebeti. Nyasaye yavatuliza mu ni zinguru zizie zinene.

¹⁸ Yikuzira navo mihiga arubaini mu changalangwi.

¹⁹ Yadiviza zihiiri saba zie kivala cha Kanaani, nahaana ku avandu veve kivala yicho keve umwandu gwaavo.

²⁰ Yaga goosi gavugula mihiga zimia zine naamusini. “Inyima wayaga yavaha avakalagi vavimiliri kuduuka ing'inga yu muporofeti Samweli.

²¹ Maku vateva vave nu Mwami, na Nyasaye yavaha Saolo mwana wa Kishi, mundu wi ihiiri ya Benjamini, ave mwami wavo kuduuka ing'inga yi mihiga arubaini.

²² Lwa Nyasaye yamala kutuliza Saolo, yatovola Daudi ave mwami wavo. Yalolekiza livugilirwa lilie navoora: ‘Ndoli Daudi mwana wa Jese; nu mundu wu lugano lwu mwoyo gwange muyanzaa; mundu ulikola goosi agu vulaliri vwange.’

²³ Kuturana ku kisukururwi cha mundu uyu, Nyasaye, kuli yalaga, yaleetera avandu va Isiraeli Muhonyi, naye ni Yeso.

²⁴ Ing'inga ya Yeso yaali na akikiri kuuza, Yohana yaza imbiri weve niyilwazira avandu vosi va Isiraeli ndi, gavadukiraa viganiri kandi vabatizwi.

²⁵ Lwa Yohana yaali niyenyaa kumala lilwaza lilie, yavolera avandu, ‘Munyi muganaganaa inzi nivwaha? Inzi si mbeye ni oyo wa mulindiliraa mba. Oyo uzaa inyima wange, ninzi sindukana kali kovoholora migoye ji vilato vivie mba.’

²⁶ “Avandu va Isiraeli vache vange, munyi kisukururwi cha Aburahamu, na avizihiiri vosi avasigamiraa Nyasaye! Likuva lio vohonyi yili lileeteywi ku kunyi.

²⁷ Kigira yava avamenya Jerusalemi, na avanene vaavo, sivamuvugilira aveeye Muhonyi mba. Sivamanya kandi amakuva ga avaporofeti agasomangwa mu amasabato goosi mba. Kali ndio, vaduukiza amakuva ga avoporofeti lwa vakalagira Yeso amaduywa gi likuza.

²⁸ Kali niiva sivanyoola kuye kivuni kigira vamwiti, vateva Pilato amukalagiri likuza.

²⁹ Lwa vamala kuduukiza amakuva goosi agaali nigang'odwa kuye, vamwikiza kutura ku musalaba, nivamuviika mu kilindwa.

³⁰ Navuzwa Nyasaye yamusimugukiza kutura mu vakuzu.

³¹ Naye, ku amadiku manyingi yaloleka ku yavo avaazia harara naye kutura Galilaya kuduuka Jerusalemi. Yavo nivo avaveeye avalolekizi veve kalunu ku avandu va Isiraeli.

³² Kunyi kandi kuuzi hano kumuletera Ivangeri indahi ya Nyasaye: likuva lia Nyasaye yalaga avaguuga viitu.

³³ Amali kuliduukizira kunyi kalunu, ava koveeye visukululwi viavo, ku lisimugukiza lya Yeso kutura mu vakuzu. Kuli gang'odwa mu zaburi ya kaviri, ‘Ivi oveeye Mwana wange, inzi ngwiivuuyi lero.’

³⁴ Yiki nicho kandi cha Nyasaye yavoola, ku makuva gu kumusimugukiza kutura mu vakuzu, avuli kugundira mu kilindwa; ‘Ndakuha uvutakatifu nuvugasu vwiligali vwa ndasuuviriza Daudi.’

³⁵ “Yee, kuli avoora ligali mu zimbaso zindi zie zaburi, ‘Si ulaleka Mutakatifu woovo kugundiri mu kilindwa mba.’

³⁶ Daudi yaduukiza vulaliri vwa Nyasaye mu madiku geege; ma yakuza, na ateevwa ahimbi na avaguwga veve, nu muviri gwigwe gwagunda.

³⁷ Navuzwa uyu wa Nyasaye yasimugukiza kutura mu vakuzu siyagunda mba.

³⁸ Kulwa yaga, avaamitu vange, nyenya mumanye ndi kuvitira mu Yeso Kristo lisamiifwa liu vwoni lilwaazwaa ku munyi.

³⁹ Kuvitira kandi mu Yeso, mundu woosi usuviraa avohololwa kutura mu vwoni vwi, Lilaga lia Musa siliali linyala kumuvoholora mba.

⁴⁰ Kunangwa muhenze vulahi, gase galamugwira aga vaporofeti vavoola:

⁴¹ ‘Huliri, munyi avachayi, mugenye ma mudivi! Kigira icha ngolaa kalunu mu madiku ginyu, ni cha munyi mutanyala ligali kusuuvira, kali lwu mundu ava namuvolera.’ ”

⁴² Lwa Paolo na Baranaba vaali nivakaturaa mu lisinagogi, avandu vi zihiiri vavagoonya viirane lidiku lie Lisabato lialonda ku, vavavoolere kandi amakuva yaga.

⁴³ Lwi livugana liafwa, Avayuda vanyingi na avandu vi Zihiiri avaari nivavugura lisuuvira lia Vayuda valonda Paolo na Baranaba. Avatumwa yavo vavolerana navo, nivavadinyiriza vazizagiliri komenya mu zimbavasi zia Nyasaye.

⁴⁴ Lidiku lie Lisabato lialonda ku, ahimbi avandu vosi avi lidaala yilio vaza kuhuliriza likuva liu Mwami Nyasaye.

⁴⁵ Navuzwa Avayuda lwa valora viduma via avandu, vizura embodoka, nivahangaliza makuva ga Paolo yavoola, nivamunyega.

⁴⁶ Navuzwa Paolo na Baranaba vamoloma nu vuluviliri vonene, nivavoora, “Liali linigwa likuva lia Nyasaye litange kuduuka ku munyi; navuzwa, kigira mulisuuyi, nu kwelola simuduukana ni livamwoyo litahera mba, heenzi, kunyi koleka munyi nu kuzia ku avandu vi Zihiiri zindi.

⁴⁷ Kigira Mwami yakulaga navoora ndi: ‘Mali kukotovola ove uvulavu vwi Zihiiri, uduuki koleta vohonyi ku lirova liosi.’ ”

⁴⁸ Avandu vi Zihiiri lwa vahulira amakuva yaga vayaanza, nivizominya likuva lia Nyasaye; yavo avaari nivatovolwa konyoora livamwoyo litahera mba, vasuuvira.

⁴⁹ Likuva liu Mwami lialanda hoosi mu kivala yicho.

⁵⁰ Navuzwa Avayuda vagemehiza avakali vi igulu avasigamira Nyasaye, avi Zihiiri zindi, kandi avasaza vanene vi lidaala yilio. Vatanga kudambiza Paolo na Baranaba, nivavakunga mu kadaala kavo yako.

⁵¹ Navuzwa avatumwa vavungulura luguchi lwali mu virenge viavo love kelolero chi likalaga kuvo, ma nivazia Ikoniamu.

⁵² Navuzwa avalondi vizura uvuyanzi na Roho Mutakatifu.