Varumi 8 - KITABU KITAKATIFU

¹ Kalunu siahaveeye ni likalagirwa ku yavo avaveeyeho mu Kristo Yeso,

² kigira Lilaga lia Roho, oleetelaa kunyi livamwoyo mu lihambanywa harara mu Kristo Yeso, limali komboholola kutura mu Lilaga liu vwoni kandi lie likuza.

³ Nyasaye umali kokora agi Lilaga liali livuli kokora kigira ovodedekere vwi liiva liu muviri. Yakalagira uvwoni voveeye mu mundu kulwu kutuma Mwana weve mwene, waza mu liiva liu mundu mwoni kuli kihanwa chu vwoni.

⁴ Nyasaye yakola yaga kunangwa uvulungi vwi Lilaga lienyaa vuduuki kuduukizwa mu kunyi avamenyaa kolondekana ni liiva lia Roho, kandi sigaveeye kolondekana ni liiva liu muviri mba.

⁵ Yavo avamenyaa kuli liiva liu muviri livavoolera, vamiihangwa ni zing'anagani ziu muviri gwenyaa. Navuzwa yavo avamenyaa kolondekana ni lienya lia Roho, zing'anagani ziavo ziamifwa na ga Roho yenya.

⁶ Ukwamiifa na Roho koleta livamwoyo kandi mirembe.

⁷ Oyo wamiifwa ni zing'anagani ziu muviri aveeye musigu wa Nyasaye; siatizaa Lilaga lia Nyasaye, kandi sianyala kulitia mba.

⁸ Yavo avamiifwa ni lienya lie miviri jaavo, sivanyala kuyaanziza Nyasaye mba.

⁹ Navuzwa munyi si mumenyi kuli liiva lienyu liu muviri limuvoolera mba; navuzwa mumenyaa kuli Roho amuvoleraa mumenye, niiva Roho wa Nyasaye amenyaa mu munyi. Ku vosi utaveeye na Roho wa Kristo, mwene oyo siaveeye weve mba.

¹⁰ Navuzwa niiva Kristo amenyaa mu munyi, Roho aveeye livamwoyo ku munyi kigira mwakolwa avalungi na Nyasaye, kali niiva imiviri jinyu jizizaa kukuza kigira vwoni.

¹¹ Niiva Roho wa Nyasaye, wasimugukiza Yeso Kristo kutura mu vakuzu, amenyaa mu munyi, hene yaho, uyu wasimugukiza Yeso Kristo kutura mu vakuzu alahaana livamwoyo mu miviri jinyu kuvitira mu Roho weve, omenya mu munyi.

¹² Kunangwa, avaamitu vange, koveeye ni linigwa, navuzwa si liveeye lio komenya kuli liiva lietu liu vwoni liu muviri gwenyaa mba.

¹³ Nimuva nimumenya kolondekana ni liiva lienyu liu muviri, mulakuza; navuzwa niiva mu Roho, muliita vikolwa vienyu viu vwoni, mulava mwoyo.

¹⁴ Ku vosi ava Roho wa Nyasaye yimiliraa yava nivo avana va Nyasaye.

¹⁵ Roho wa Nyasaye umali kuhona ku munyi siamukolaa vatugwa kandi kumukola muve nuvuti mba. Mu vogono yivwo, Roho amukolaa muve avana va Nyasaye; na kuzinguru zia Roho uyu, kwanira ku Nyasaye, “Abba, Baba” iliveeye kovora, Baba! Baba wange!

¹⁶ Roho wa Nyasaye alolekizaa harara na roho jietu ndi koveeye avana va Nyasaye.

¹⁷ Na kigira koveeye avana va Nyasaye, kulanyoola imiandu josi ja Nyasaye yavikira avandu veve, kulasanga harara na Kristo miandu ja Nyasaye; kigira nikuva nikusanga mu vusaliri vwa Kristo, kulasanga kandi mu vukumi vwivwe harara.

Uvukumi vuzaa

¹⁸ Ndolaa ndi uvusaliri vwitu vwi ing'inga ya kalunu yiyi si vunyala koleng'anywa nu vukumi vwa kulilola kali hakuzu mba.

¹⁹ Vindu viosi via Nyasaye yalomba vilindilira nuvuha vonene ndi, Nyasaye avuri avana veve.

²⁰ Vindu viosi vialagirwa vigotizi kivuni chavio, sigaveeye ku vulaliri vwavio viene mba, navuzwa kigira Nyasaye yenya gave kuli ndio. Navuzwa kali ndio lisuuvirizwa yili liali ni liveeyeho

²¹ ndi vindu viosi, lidiku lilala navio vilakavohololwi kutura mu vutugwa vwu vwoneku, kandi viduuki kusanga mu vukumi vwo vovoholore vwa vana va Nyasaye.

²² Kumanyi ndi kuduuka lero, vindu viosi vikenyaa kigira vusaliri vwi lizuunwa kuli lia uyu oveeye ni lilumwa liu mwana.

²³ Si viveeye vindu viosi vienyine ivikenyaa nilizunwa; navuzwa kali kunyi ava koveeye na Roho oveeye kuli vihaanwa via Nyasaye viukutanga. Kokenya aveene musi, nikulindirira Nyasaye akokole avana veve, kandi akovoholore mu liiva lietu liosi.

²⁴ Kwahonywa kigira ilisuuvirizwa navuzwa nikolola cha kusuuvira mucho, siliveeye ilisuuvirizwa liali ligali mba. Nivwaha oheenzereraa ikindu cha oyo alolaa?

²⁵ Navuzwa niiva kohenzerera kindu cha kutalolaa, ahene yaho kukilindilira nu vwikuziri vwosi.

²⁶ Munzira ndala nzere Roho yazaa akokonyaa mu vodedekere vwitu, kigira sikumanyi kuli gakuduukiraa kusaala mba. Navuzwa Roho mwene akusaaliraa ku Nyasaye mu likenya lietu linene litanyala kutivulwa mu makuva ga kazozo.

²⁷ Nyasaye, ololaa kuduuka mugati mwi mioyo jietu, amanya zing'anagani zia Roho kuli ziveeye; Roho agonyaa Nyasaye havogono havandu veve, kolondekana nuvulaliri vwivwe.

²⁸ Kunyi kumanyi ndi ivindu viosi viyinzira harara koleta uvulahi ku yavo avayaanzaa Nyasaye; yavo avayalanga kolondekana nu vulaliri vwivwe.

²⁹ Yavo ava Nyasaye yatovola kutura mu litanga nivo ava yaahula vaduuki kuva kuli Mwana weve, kunangwa Mwana aduuki kuva wu kutanga hagati ha vamwavo vanyingi.

³⁰ Kunangwa yavo ava Nyasaye yaahula, yavalanga; navo avayalanga, yavakola vave avalungi harara naye, kandi yaasanga uvukumi vwivwe harara navo.

Uvuyanzi vwa Nyasaye mu Kristo Yeso

³¹ Kunangwa ku vindu yivi kovoole ki'? Nyasaye naveeye kolovega lwiitu, nivwaha unyala kukuhingira'?

³² Nyasaye siyigalira Mwana weve mwene muderwa, navuzwa yamuhaana kuli kisiuviriru kigira kunyi kwosi. Niiva yakola ndio, sialakuha ivindu viosi harara naye?

³³ Ivwaha uliyaala avatovole va Nyasaye? Nyasaye mwene avakolaa kuva valungi imbiri weve!

³⁴ Nivwaha ulikalaga? Ni Kristo Yeso wakuza yee, wasimugukizwa kutura mu vakuzu, oveeye ha mukono mulungi gwa Nyasaye, ukusaaliraa?

³⁵ Nivwaha ulikwavukanyia kutura ku vuyanzi vwa Kristo? Ni kivi, anoho ni vusaliri, anoho ni lidambizwa, anoho inzara, anoho ichahonyo, anoho vuhiimwa, anoho kivavi?

³⁶ Kuli Mang'oda Matakatifu gavoora, “Kigira ivi, kwitwa umbasu beyi; koveeye kuli amagondi gu kwitwa.”

³⁷ Awa, mu vindu yivi viosi, koveeye vaguuti ligali, kuvitira mu uyu wakuyanza!

³⁸ Kigira manyi ligali ndi si keveeye ho ni kindu kinyala kukwavukanyia kutura ku vuyanzi vwa Nyasaye; kali niliva ni likuza, anoho livamwoyo, anoho zingelosi anoho avamihi vumuvwerefu anoho zinguru ziu mwigulu, anoho vindu viveeye ho anoho viza kokoleka,

³⁹ anoho kivala chi igulu, anoho cha hasi ligali, anoho kelombe ku vilombe viosi ikinyala kukwavukanyia nu vuyanzi vwa Nyasaye, ovoveeye vwitu kuvitira mu Kristo Yeso, Mwami wiitu.