Varumi 7 - KITABU KITAKATIFU

¹ Avaamitu vange, suuviraa mulamanyiriza amakuva ga nyenya kovora, kigira munyi mwosi mwamanya Lilaga. Lilaga liamiihaa vuzwa ku mundu ing'inga yaveeye mwoyo.

² Mukali waletwa yavofwa ni Lilaga ku musaza weve ing'inga yoosi yu musaza oyo aveeye mwoyo. Navuzwa musaza weve naava nakuza, mukali oyo aveeye muvoholore kutura ku Lilaga liamuvohaa ku musaza weve.

³ Kulwayago, niiva mukali oyo alamenya nu musaza wundi ing'inga yu musaza weve akikiri mwoyo, alalaangwa muheyi. Navuzwa musaza weve nakuza, mukali oyo aveeye muvoholore ku Lilaga, naye naleetwa nu musaza wundi sianyala kulangwa muheyi mba.

⁴ Ni ndio kandi gaveeye ku munyi avaamitu vange. Munyi mwakuza ku Lilaga kuvitira mu muviri gwa Kristo. Kalunu muveeye ava uyu wasimugukizwa kutura mu vakuzu kunangwa kuduuki kuva avovokoonyi mu vutumiki vwa Nyasaye.

⁵ Lwa kwamenya kolondekana ni liiva liakale liang'odwa mu Lilaga mba, navuzwa mu liiva lietu liu muviri, likayirwa lietu liu vwoni, ilialeetwa ni Lilaga, liakora miyinzi mu miviri jietu, ma nilikoleetera ilikuza.

⁶ Navuzwa kalunu koveeye avavoholore kutura ku Lilaga, kigira kukuzi ku Lilaga liakokola avahambe ku ing'inga ndala. Si kutumikira Nyasaye kolondekana ni liiva lia kale liang'odwa mu Lilaga mba, navuzwa mu liiva lihia lia Roho Mutakatifu.

Lilaga nuvwoni

⁷ Kunangwa, kunyala kovora ki, Lilaga liveeye liu vwoni? Si gaveeye ndio mba! Navuzwa liali Lilaga liakola inzi kumanya uvwoni ni ki. Kigira sindaali manye likayirwa vugira Lilaga kovora, “Utakayirwa mba.”

⁸ Navuzwa kuvitira ku Lilaga yili, uvwoni vwanyoola vwiyangu kuvuukiza zing'ano ziosi zie likayirwa liu vwimani mu inzi. Vugira Lilaga, uvwoni vuukuzi.

⁹ Ku ing'inga ndala, inzi ndaali mwoyo vugira Lilaga; navuzwa lwi Lilaga liaza, uvwoni vwasimuguka, na ndaakuza.

¹⁰ Lilaga lilala liere yilio lienyekaa lileete livamwoyo ku inzi, lialeta likuza.

¹¹ Uvwoni vwanyoola vwiyangu vwavwo kuvitira mu Lilaga zana, vwangada, ma ni vunzita.

¹² Kunangwa, Lilaga liveeye litakatifu, kandi malago gaveeye amatakatifu, amalungi, kandi amalahi.

¹³ Navuzwa yaga gamanyiaa ndi agaveeye malahi gaandetela likuza? Sigaveeye ndio mba! Vwali vwoni vwakola agene yaga; uvwoni vwavitira mu vulungi nivondeetera likuza kunangwa agiligali gu vwoni gaduuki kumanyikana kigira Lilaga. Nandio mu liiva lie Lilaga uvwoni vuduuki kumanywa ndi voveeye vudamanu ligali.

Vulwani mu mundu

¹⁴ Kumanyi ndi Lilaga liveeye lia Roho, navuzwa inzi mbeeye wi liiva lio muviri, wagerizwa kuli mutugwa ku vwoni.

¹⁵ Simanyirizaa ligali aga ngolaa mba, kigira singolaa aga nyenya kokora mba, navuzwa mu vogono yivwo, ngolaa aga inzi ndunyiraa.

¹⁶ Aga ngolaa sigaveeye nigo aga nyenya kokora mba. Yaga gamanyia ndi inzi mbugilira ndi Lilaga liveeye lirungi.

¹⁷ Kunangwa siaveeye ninzi mwene okolaa kindu yiki, navuzwa nuvwoni vomenyaa mu inzi

¹⁸ Inzi manyi ndi uvulahi sivomenyaa mu inzi mba, iliveeye kovora, mbeeye mu liiva liu muviri. Kali nimba ningayilwa kokora amalahi, sinyalizaa kokora ndio mba.

¹⁹ Singolaa amalahi ga nyenya ngole mba, mu vogono yivwo, uvudamanu vwa inzi suraa nivwo vwa ngolaa.

²⁰ Ku lwa yago, niiva ningoraa aga ndeenya kokora, siaveeye ninzi ugakolaa, navuzwa nuvwoni vomenyaa mu inzi.

²¹ Kunangwa nyooraa ndi, Lilaga yili liveeye ku miyinzi. Lwa nyenya kokora uvulungi, agaveeye madamanu nigo aga ndovora kokora.

²² Sangaliraa Lilaga lia Nyasaye mugati musi mwu mwoyo gwange.

²³ Navuzwa ndolaa Lilaga lindi liu lugano ni liyinzira mu vivero viu muviri gwange Lilaga ililwanaa ni Lilaga lio vogeri vwange vuvugiliraa. Liene yili lingolaa kugwa muhambe ku Lilaga liu vwoni, vomenyaa mu muviri gwange.

²⁴ O, vaani! Inzi mbeeye umundu waadiva! Niwaha ulimbonyia kutura mu muviri gumbiraa mu likuza yigu?

²⁵ Lisandiza liveeye ku Nyasaye, kuvitira mu Yeso Kristo Mwami wiitu! Kunangwa yili nilio liiva liange: Inzi nyara kutumikira Lilaga lia Nyasaye mu zing'anagani ziange, navuzwa mu liiva liu muviri gwange, ndumikiraa Lilaga liu vwoni.