Varumi 5 - KITABU KITAKATIFU

¹ Kunangwa kumali kokolwa avalungi imbiri wa Nyasaye kuvitira mu lisuuvira, koveeye ni mirembe na Nyasaye kuvitira mu Mwami wiitu Yeso Kristo.

² Kuvitira mu Kristo, kumali konyoora zimbavasi zia Nyasaye zia koveeye mu kalunu. Kusangaliraa mu lisuuvirizwa lia koveeye nalio liu kusanga mu vukumi vwa Nyasaye!

³ Kunyi kandi kusangaliraa ikivi chietu, kigira kumanyi ndi ikivi keleetaa vwikuziri,

⁴ uvwikuziri voletaa livugilirwa na Nyasaye, na livugilirwa lilie liletaa lisuuvirizwa.

⁵ Lisuuvirizwa yili silinyala kukuvihiliriza mba, kigira Nyasaye yamala kuviika mu mioyo jietu uvuyanzi vwivwe kuvitira ku Roho Mutakatifu oveeye kihanwa chiche ku kunyi.

⁶ Lwa kwaali nikukiri avadedekere, Kristo yakuzira kunyi avadamanu ing'inga ya Nyasaye yatovola.

⁷ Sivoveeye vodoto umundu kukuzira mundu wundi mulungi mba. Hawundi ganyala kuva mundu anyala kuluvilira kukuzira mundu mulahi!

⁸ Navuzwa Nyasaye yamanyia ndi yakuyaanza, kigira lwa kwaali nikukiri avoni, Kristo yakukuzira.

⁹ Kalunu kumali kokolwa avalungi kuvitira mu masahi ga Kristo, agaveeye kovora havulavu ndi kunyi kumali kohononoka kutura ku vutima vwa Nyasaye.

¹⁰ Kigira lwa kwaali nikukiri avasigu va Nyasaye, kwahambanywa naye kuvitira mu likuza liu Mwana weve; kuvita ligali, kalunu kumali kuhambanywa na Nyasaye, kulakahonywi ni livamwoyo lilie.

¹¹ Si gaveeye yaga geng'ine, navuzwa kandi kusangara mu Nyasaye kuvitira mu Mwami wiitu Yeso Kristo, umali kukuhambanyia na Nyasaye.

Adamu na Kristo

¹² Kunangwa, uvwoni vwingira mu lirova kuvitira mu mundu mulala, na uvwoni vwivwe vwaleeta likuza. Likuza lialanda mu vandu vosi, kigira vosi vaakora vwoni.

¹³ Lilaga nilikikiri kuhaanwa, vwoni vwali ho mu lirova, navuzwa si vuvalizwa kuva vwoni vugira Lilaga kuvaho mba.

¹⁴ Nitali kutura ing'inga ya Adamu kuduuka ing'inga ya Musa, likuza liamiiha kali ku yavo avavura kokora uvwoni kuli lihiolo lia Adamu yakola ku lihing'ana Nyasaye. Adamu yaali kelolero cha uyu uliza inyima.

¹⁵ Navuzwa viviri yivi siviveeye vilala viere, kigira kihanwa cha Nyasaye yahaana vuzwa sikeveeye kuli vwoni vwa Adamu mba. Gaveeye giligali avandu vanyingi vakuza kigira vwoni vwu mundu mulala oyo. Navuzwa zimbavasi zia Nyasaye ziveeye zinene kuvita, kandi, kihanwa chiche cha vuzwa ku vandu vanyingi kuvitira mu zimbavasi ziu mundu mulala uyu, Yeso Kristo.

¹⁶ Kihanwa cha vuzwa zana yiki sikeveeye kuli amakuyu gu vwoni vwu mundu mulala oyo mba. Kigira, likalaga inyima wilihiola lilala lialeta likalagirwa kivi, navuzwa kihanwa cha vuzwa cha Nyasaye yahaana inyima wa mahiolo manyingi, keleetaa uvulungi.

¹⁷ Gaveeye giligali ndi kuvitira mu vwoni vwu mundu mulala, likuza liatanga kwamiiha mu kivala. Navuzwa kekolwaki kenene ligali chakolwa nu mundu mulala, naye ni Yeso Kristo! Avandu vosi vanyoola zimbavasi zia Nyasaye zinene ligali kandi vaveeye vavoholole muye. Valamiha mu livamwoyo liavo kuvitira mu Kristo.

¹⁸ Kunangwa kuli lihiola liu mundu mulala lialeta likalagirwa ku vandu vosi, kandi ndio, ku kekolwa kilala chu vulungi chu mundu mulala kihaanaa livoholorwa lia vandu vosi harara ni livamwoyo.

¹⁹ Kuli vandu vanyingi vakolwa avoni kigira livula kutia liu mundu mulala, nindio kandi avanyingi valakolwa valungi ku lihulira liu mundu mulala.

²⁰ Lilaga liaza liduuki komeeda vudamanu; navuzwa hu vwoni vwameedeka, zimbavasi zia Nyasaye ziamedeka ligali kuvita.

²¹ Kuli vwoni vwamiiha ku lileeta likuza ku vandu, kandi ndio iliamiiha lie zimbavasi zia Nyasaye kuvitira mu vulungi lilakwimilira kuduuka mu livamwoyo litahera mba, kuvitira mu Yeso Kristo, Mwami wiitu.