Varumi 15 - KITABU KITAKATIFU

¹ Kunyi ava koveeye ni zinguru mu lisuuvira, kuduuka kokoonye avadedekere vaduuki kuginga uvuliduhu vwavo. Kutiyanziza kunyi aveene mba.

² Muvwiyangu yivwo, sa mulala ku kunyi, gamudukira ayaanzize mutende weve ku vulahi vwivwe umwene. Gakuduukiraa kokole ndio kunangwa kuduuki kumwumbaka mu lisuuvira.

³ Kristo si yiyanziza mwene mba. Navuzwa, kuli Mang'oda Matakatifu ku maziambiri gavoora, “Amanyego goosi ga yavo vanyega ivi, gaaza ku inzi.”

⁴ Vindu viosi iviang'odwa mu Mang'oda Matakatifu viang'odwa kwigiza kunyi, kuduuki kuva nilisuuvirizwa kuvitira mu liekuzira ni lizuvwa lia Mang'oda Matakatifu gakoheezaa.

⁵ Nyasaye oveeye vutangiliru vwu vwikuziri nilizuvana, amuhe mwoyo gwu vuhambani mu livugilizana liduukiru hagati hinyu lwa muva nimulondaa Kristo Yeso.

⁶ Kunangwa munyi vosi, numwoyo mulala, muduuki kukuminya Nyasaye Baba wu Mwami wiitu Yeso Kristo.

Makuva malahi ku vandu vi zihiiri

⁷ Kunangwa, muvugilizane aveene naveene kuli Kristo amali kumuvugilira muduuki kwizominya Nyasaye.

⁸ Inzi muvooleraa ndi, Kristo yakolwa mutumwa wa Vayuda aduuki kumanyia ndi Nyasaye aveeye musuuvirifu, kandi kudinyiriza lisuuviriza lia Nyasaye yahaana ku vaguuga viitu liduuki kuva liagiligali.

⁹ Avandu vizihiiri navo vaduuki kukuminya Nyasaye ku zimbavasi zizie, kuli Mang'oda Matakatifu gavoora, “ Ndakwizominya hagati ha vandu vizihiiri. Kandi ndakwimbira zinyimbu ziu kukwizominya.”

¹⁰ Mang'oda Matakatifu gavoora “Musangare, vandu vizihiiri vosi, harara na vandu va Nyasaye!”

¹¹ “Mwizominyi Mwami vandu vizihiiri ziosi munyi avandu vosi, mumwizominyi!”

¹² Isaya avoora “Kisukururwi cha Jese kilaloleka; kilaaza kwamiiha vandu vizihiiri, kandi navo valaviika lisuuvirizwa liavo muye.”

¹³ Nyasaye oveeye uvutangiliru vwi lisuuvirizwa amukole mwizuli uvuyanzi vwosi ni mirembe kuvitira mu lisuuvira lienyu muye, kunangwa lisuuvirizwa zana liduuki kuzizagilira kuviruka mu zinguru zia Roho Mutakatifu.

Vutumwa vwa Paolo ku zihiiri

¹⁴ Avaamitu vange, mbeeye ni lisuuvira ndi munyi kandi mwizuyi uvulahi vwosi kandi, muveeye ni limanya liosi; kandi munyala kwigizana aveene naveene.

¹⁵ Navuzwa mu ibarwa yiyi, mbeeye nuvuluviliri ligali ku makuva malala agaamali kumwizuliza. Ngoli ndio kigira zimbavasi zia Nyasaye yamba,

¹⁶ nduuki kuva mutumikiri wa Yeso Kristo ku vandu vizihiiri. Ndumikaa kuli musaalisi mu lilwaza makuva malahi kutura ku Nyasaye, ku vandu vizihiiri vaduuki kuva isadaka ivugilirwa na Nyasaye, kandi kihanwa chatakaswa na Roho Mutakatifu.

¹⁷ Kunangwa, mbeeye ni kivuni chi lieyizominya mu Kristo Yeso kigira miyinzi ja ngolera Nyasaye.

¹⁸ Ndakaluviliri kovora kindu kindi choosi ni kitali vuzwa cha Kristo Yeso yakola kuvitira mu inzi kwimilira vandu vizihiiri vaduuki kuhulira Nyasaye. Yakola ndio mu makuva nu mu vikolwa,

¹⁹ kuzinguru zie vilolekizu ni viokogenyia, harara ni zinguru zia Roho Mutakatifu. Kunangwa, mu ligenda hoosi, kutura Jerusalemi kuduuka Iliriku, mali kwilwaza makuva malahi goosi ga Kristo.

²⁰ Likayirwa liange kazozo liveeye kwilwaza makuva malahi hoosi hi lieta lia Kristo likikiri kutalwa, gase ndumbaka ku musingi gwu mundu wundi.

²¹ Kuli Mang'oda Matakatifu govoora, “Avandu vosi vavura kovolerwa amakuva geege, valalola; kandi yavo avakikiri kuhulira valamanyiriza.”

Lilohiza lia Paolo kogeniha Rumi

²² Kunangwa, mali kwigalirwa haali kanyingi mburi kuuza ku munyi.

²³ Navuzwa, kigira kalunu maliyi miyinzi jange mu zimbega zinu, kandi kigira ni mihiga minyingi ningayilangwa ligali kuuza ku munyi,

²⁴ ndohizaa kokora ndio kalunu lwa nambe ninziza mu kivala cha Sipeini. Suuviraa ndakamugenihi lwa naambitili yaho, kandi nyenya mungonye ku logendo lwene yilwo nduhi nduuki Sipeini nindakamara kusangara ni munyi ku ing'inga ngekeeke yene yeyo.

²⁵ Navuzwa ku lwa kalunu, nziza Jerusalemi kutumikira avatakatifu vaveeye yo.

²⁶ Makanisa gaveeye mu Makedonia na Akaya gayaanzi kuhaana kihanwa chavo kokoonya avadaka hagati ha vatakatifu vamenyi mu Jerusalemi.

²⁷ Aveene vamali kotovola kokora ndio; navuzwa kuduuka vavakonye. Avayuda vaasanga navo ivihaanwa viu mu Roho, kunangwa kuduuka vandu vizihiiri navo vatumikiri imiandu jaavo kokoonya Avayuda.

²⁸ Lwa ndiva nindakamara muyinzi yigwo, na kuvaha vihaanwa via mabese goosi ga vaavungizirwa, ndakavitiri yaho nimbeeye ko logendo kuzia Sipeini.

²⁹ Manyi vulahi ndi lwa ndiza ku munyi, ndakaaze mu vuduukiru vwosi vwu vugasu kutura ku Kristo.

³⁰ Kunangwa avaamitu vange, mugoonyaa ligali imbiri wo Mwami wiitu Yeso Kristo, kandi mu vuyanzi vwa Roho ahaanaa, muhambane harara ninzi mu lisaala nu mwoyo gwu vugulu ku Nyasaye.

³¹ Musaale ndi inzi nduuki kukingwa kutura ku yava avatasuuvira, avaveeye mu Vuyuda, kandi uvutumiki vwange mu Jerusalemi vuduuki kuvugilirwa na vatakatifu vaveeye yo.

³² Kunangwa mu vulariri vwa Nyasaye, ndaaza ku munyi ninzizuuyi uvusangari vwosi, nduuki kusangara ligali ni munyi.

³³ Nyasaye oveeye uvutangiliru vwi mirembe ave harara ni munyi mwosi! Amini.