Varumi 14 - KITABU KITAKATIFU

¹ Muvugiliri vandu vaveeye vadedekere mutahangalizana navo ku makuva gi zing'anagani ziavo mba.

² Lisuuvira lia vandu valala livugilira kulia vindu viosi; navuzwa mundu oveeye mudedekere mu lisuuvira alizaa vuzwa zinguza.

³ Vandu valiza vindu viosi vatachaya yava vatanyala kulia vindu viosi mba; kandi yavo vatalizaa vuzwa zinguza vatakalagira yavo vatalizaa vindu viosi mba, kigira Nyasaye umali kuvavugilira.

⁴ Ivi nivwaha uluviliraa kukalagira vatumikiri vu mundu wundi? Nivasingira anoho nivagwa, gaveeye ku Mwami wavo mwene. Valasingira vudinyu, kigira Mwami aveeye ni zinguru kuvakola vasingiri.

⁵ Vandu valala vaganagana ndi lidiku lilala liveeye lilahi kuvita gandi. Vandu vandi vaganagana ndi madiku goosi gafananaa. Mundu sa mulala atovole agumwoyo gwigwe guganagana.

⁶ Yavo vizominyaa lidiku lilala kuva linene na lidukiru vakora ndio ku likuminya Mwami; na yavo valiza chukulia choosi vakora ndio ku likuminya Mwami; kigira vahaana lisandiza ku Nyasaye. Yavo vavura kulia chukulia choosi vakora ndio ku likuminya Mwami, yavo kandi vahaana lisandiza ku Nyasaye.

⁷ Sihaveeyeho numundu ku vosi ku kunyi wekoleraa ageege mwene mu livamwoyo mba. Kandi siaveeyeho numundu wekoleraa ageege mwene mu likuza mba.

⁸ Nikuva nikoveeye mwoyo, koveeye mwoyo kigira Mwami; kandi nikuva nikukuza, kukuzaa kigira Mwami. Kunangwa nikuva nikoveeye mwoyo, anoho nikuva nikukuza, koveeye avu Mwami.

⁹ Kristo yakuza, nasimuguka kandi, aduuki kuva Mwami wa vaveeye mwoyo kandi wa vakuzu.

¹⁰ Kunangwa, kigira ki ivi ukalagiraa amwavo woovo? Na ivi, kigira ki uchayaa amwavo woovo? Kunyi vosi kulakasingiri imbiri wa Nyasaye kukalagirwa naye.

¹¹ Amang'oda Matakatifu gavoora, “Kuli inzi ligali mbeeye Nyasaye oveeye mwoyo, Mwami avoora; mundu sa mulala alakasigame imbiri wange, kandi mundu woosi alakiyame ndi inzi mbeeye Nyasaye.”

¹² Kunangwa, sa mulala ku kunyi alakivaale makuva geege mwene, imbiri wa Nyasaye.

Utikigitaliza vandu vandi

¹³ Kunangwa, kutakalagira vandu vandi mba. Navuzwa mu vogono yivwo, kuduuka mutovole kuvula kokora kindu kinyala kolomba amwavo woovo yikigitali anoho agwi muvwoni mba.

¹⁴ Manya kandi mbeeye nagiligali mu Mwami Yeso ndi, sihaveeyeho ni chukulia ku choosi ikitaveeye kilahi ku vwacho mba; navuzwa niiva mundu asuviraa ndi chukulia yiki sikeveeye kilahi kulia, maku sikeveeye kilahi kuye mba.

¹⁵ Niiva usaliriza amwavo woovo kigira chukulia cha uliizaa, siokola ndio kolondekana nu vuyanzi mba. Utaleka chukulia chicho kidivizi umundu wundi wa Kristo yakuzira mba.

¹⁶ Kunangwa, mutaleka cha muganaganaa kuva kilahi kevoolwe kuva uvudamanu mba.

¹⁷ Uvwami vwa Nyasaye sivoveeye lilia kandi linwa mba, navuzwa voveeye uvulungi, imirembe kandi uvuyanzi voleetwa na Roho Mutakatifu.

¹⁸ Uyu utumikira Kristo kuli ndio ayaanzwa na Nyasaye, kandi avugilirwa na vandu.

¹⁹ Kunangwa avaamitu vange, leki kolonde vindu viletaa mirembe kazozo, kandi ivikokonyaa kukudinyiriza aveene na vene mu lisuuvira.

²⁰ Kunangwa utononyia miyinzi ja Nyasaye amali kolomba kigira viukulia mba. Viukulia viosi ni vilahi kulia, navuzwa ni vudamanu kolomba mundu wundi akole vwoni kigira cha ivi uliizaa.

²¹ Ni vulahi kuvula kulia inyama, anoho kunwa iwaini, anoho kokora kindu choosi kinyala kokora amwavo woovo akole vwoni.

²² Kunangwa ulindi lisuuvira lia oveeye nalio ku makuva yaga hagati hoho na Nyasaye woovo. Aveeye nu vugasu umundu utikalagilaa ku yiki cha avugiliraa keveeye kilahi mba.

²³ Navuzwa umundu uhayahayiza ku chukulia cha alizaa, Nyasaye amukalagiraa lwa ava nalizaa ichukulia zana, kigira likora lilie sililondekanaa ni lisuuvira mba. Niiva kokora kindu ku choosi ikitalondekanaa ni lisuuvira, keveeye uvwoni.