Varumi 13 - KITABU KITAKATIFU

¹ Mundu sa mulala gamudukira yegehize ku vwamihi vwi kivala, kigira uvunyali vwosi vutulaa ku Nyasaye kandi avamihi vaviikwa na Nyasaye.

² Uyu uhing'anaa uvwamihi voveeye ho, ahing'anaa na ga Nyasaye yavika ho. Mundu woosi okolaa ndio, yeleeteraa likalagirwa mwene.

³ Avamihi sivaleeta litihiza ku vandu valahi mba navuzwa vatihiza vandu vadamanu. Wakayaanzi uvuli kuva nuvuti nayavo vamiiha? Maku okole gaveeye malahi, navo valakwizominya,

⁴ kigira, vaveeye vatumikiri va Nyasaye vatumika muduuki konyoora uvulahi. Navuzwa ivi niiva okolaa uvudamanu, ove nuvuti; kigira vaveeye nu vunyali vwu kuhaana amageri. Vaveeye vatumikiri va Nyasaye, navo vahaana mageri ga Nyasaye ku yavo avakolaa vudamanu.

⁵ Navuzwa gamudukira muhuliri vamiihi kigira mumakura gaveeye malahi kokola ndio. Sigaveeye kigira vutima vwa Nyasaye mba.

⁶ Yiki nicho kandi kivuni kilala chere kigira nimutuunga uvusuru; vaveeye nu vunyali kutumikiraa Nyasaye lwa vakora imiyinzi jaavo.

⁷ Muhaane ku vandu vosi cha vaduukana nacho. Mundu wu vusuuru ahevwe uvusuru; wenyaa atungwi, wenyaa luyali aheevwi luyali, kandi wenyaa lizominywa aheevwi lizominywa.

Agadukanaa kokolera vandi

⁸ Mutava ni ligovi liu mundu woosi mba, nilitaveeye iligovi liu kuyaanzana aveene naveene. Uyu uyanzaa wundi, umali kudukiza Lilaga.

⁹ Kigira amalago yaga, “Utaheya mba; utiita mba; utiva mba; utakayirwa mba,” na agandi goosi, gazuganyiywi mu lilago lilala yili: “Uyaanze umutende woovo kuli wiyanza umwene.”

¹⁰ Uyu uyanzaa mutende weve siamukoleraa uvudamanu mba. Kunangwa Lilaga liosi lidukizirwa mu vuyanzi.

¹¹ Kuduuka mukore ndio, kigira mu manya ndi ing'inga imali kuduuka ya munyi muvuuka mu zindoolo zienyu. Ovohonyi vwitu voveeye ahimbi ligali ku kunyi kuvita lwa kwatanga kusuuvira.

¹² Uvudiku vufezaa ligali, nu muvasu goveeye ahimbi. Kunangwa leki kuviiki ihale vikolwa vie kisundi, na kuvuguli viuma viu kulwaana mu vulavu.

¹³ Ligenda lietu kuduuka live lio vohocha kuli avandu vamenyi mu vulavu vwi lidiku; kutava mu lihuvaala nilisieva, mu lihambika, mu vohenyi, anoho kifavwi cho voheyi mu volembani nilikubana kandi nembodoka mba.

¹⁴ Navuzwa muvuguli viugi viu Mwami Yeso Kristo, kandi muleke kuganaganyia iliiva lienyu liu vwoni liukwigutiza likayirwa liavwo.