Varumi 11 - KITABU KITAKATIFU

¹ Kunangwa, ndeva: Nyasaye yasura avandu veve? Sigaveeye ndio mba! Inzi mwene mbeeye mundu wa Isiraeli wi kisukururwi cha Aburahamu, wihiiri ya Benjamini.

² Nyasaye siyasuura avandu veve, avayatovola kutura mu litanga mba. Mwamanya cha Mang'oda Matakatifu gavoora kigira Elija, kuli yagoonya Nyasaye kigira Isiraeli:

³ “Mwami, vamali kwita avaporofeti vovo; vamali kutigula uvwali vuvwo. Ninzi wengine utigaye, kandi vageriza kunzita.”

⁴ Nyasaye yamutivulira ki? Yamuvolera, “Mali kwivikira haloveg inzi mwene avandu zielefu saba avavura kusigamira kifananyi Baali.”

⁵ Kunangwa nindio kandi gaveeye ing'inga ya kalunu. Vaveeye ho vandu vakekeeke avatigaye ava Nyasaye amali kotovola kigira zimbavasi zizie.

⁶ Navuzwa litovola lilie liali ku zimbavasi zizie, sigaveeye kigira ku vikolwa viavo mba. Niiva litovola lia Nyasaye liakaveeye ku vikolwa via vandu, maku zimbavasi zizie si ziakaveeye zimbavasi ziagiligali mba.

⁷ Kunangwa ni kindiki? Avandu va Isiraeli sivamanya nivanyoora cha venya mba. Na vandu vakekeeke vuzwa ava Nyasaye yatovola avakenyoola; avatigara vosi vamanya nivagwa zidimbidi ku lilangwa lia Nyasaye.

⁸ Kuli Mang'oda Matakatifu gavoora, “Nyasaye yavaha zing'anagani ziavo ni mioyo jaavo kugwa linagandi; kali kuduuka lidiku lia kalunu sivanyala kolola ni zimoni ziavo, anoho kuhulira na matu igaavo mba.”

⁹ Daudi avoora, “Lilia liavo ligwiyi uvuliva; kandi ligwiyi mutego gwu kuvagumira, kandi ligwiyi liu kwikigitariza vaduuki kugwa; kandi vanyoore amaduywa gaavo aveene!

¹⁰ Zimoni ziavo zimali kuvakula kunangwa vavuli kolola; imigongo jaavo jilingi mihiga ni mihiga.”

¹¹ Kunangwa ndeva: lwa Avayuda vikigitara, vaagwa kuduuka ku lidiva ligali? Awa. Sigaveeye ndio mba! Navuzwa kigira vayona, ovohonyi vumali kuduuka ku vandu vizihiiri kolomba Avayuda vaduuki kuvakendekera.

¹² Vwoni vwa Vayuda vwaleeta uvutugi vwu vugasu ku lirova liosi, kandi ovogeheru vwavo vwaleeta vugasu vunyingi ligali ku vandu vizihiiri. Kulwayago, vulava vugasu vonene ki ligali lwa vandu vosi vi Vuyuda valiviikwa harara!

Ovohonyi vwa vandu vizihiiri

¹³ Kalunu molomaa kumunyi vandu vizihiiri. Lwa ngikiri mutumwa ku munyi nziyizominyaa ku miyinzi jange.

¹⁴ Suuviraa nyara kokora avandu vi ihiiri yange vakendeke, na ndio nduuki kohonyia valala kuvo.

¹⁵ Lwa Nyasaye yavasuula, Nyasaye yagilung'anyia vandu vu mu kivala, avaari vasigu veve, nivagwa valina veve. Maku galakaveki lwavalakavugililwi? Galakave lisimuguka ku vakuzu.

¹⁶ Niiva kedonye chu kutanga chu mugadi kihanwa ku Nyasaye, kunangwa mugadi gwosi goveeye gwa Nyasaye, kandi niiva imiliju musaala jihaanwa ku Nyasaye, iziisia nazio ni zia Nyasaye.

¹⁷ Yee, zindala ku zisia ziu muzeituni gwu mulimi gwa vasembeleraa zimali kuvunagwa, na mu vwiyangu vwazio, munyi iziisia zia muzeituni gwu mu mulitu zimali kuhambanywa kugwo, munyi avandu vi zihiiri zindi ni munyi avaveeye kuli iziisia zia muzeituni gwu mulitu, na kalunu musangaa harara na Vayuda livamwoyo liumu Roho lie zinguru.

¹⁸ Kunangwa, sigamuduukira mulegelizi yavo avaatemagwa kuli zisia. Munyala kwelola kigira ki? Munyi muveeye vuzwa iziisia. Munyi simukonyaa miri mba, kigira imiri nijo jiduukanaa jimukonye.

¹⁹ Navuzwa ulavoola, “Yee, iziisia ziahalulwa, nduuki konyoora vwiyangu.”

²⁰ Nagiligali! Ziahalulwa kigira livula kusuuvira liavo, navuzwa ivi usingiraa vudinyu kigira lisuuvira, utiyizominya mba, navuzwa wilindi.

²¹ Niiva Nyasaye siyavererera Avayuda vaveeye iziisia zieligali, uganaganaa alavererera ivi?

²² Kunangwa, wizulizi uvulahi, kandi uvululu vwa Nyasaye. Aveeye mululu ku yavo avamali kugwa, navuzwa uvulahi vwa Nyasaye voveeye ku ivi niiva ulazizagilira mu vulahi vwivwe. Nigataveeye ndio, ivi kandi ulahalulwa.

²³ Kali avandi nivatahongera mulivula kusuuvira liavo, valahambanywa mu, kigira Nyasaye aveeye nu vunyali kuvahambanyia mu kandi.

²⁴ Munyi vandu vizihiiri, muveeye kuli ulusia lwa muzeituni lwu mu mulitu ugwatemwa navuzwa litaveeye lilahi mwahambanywa ku muzeituni mulahi gwu mu mulimi, havundu hataali ahinyu. Avayuda vaveeye kuli iziisia ziakale zia muzeituni gwasembelerwa yigu; na vulava vodoto ku Nyasaye kuhambanyia iziisia ziavunika yizi ku musaala gwa gwo gwene kandi.

Zimbavasi zia Nyasaye ku vandu vosi

²⁵ Gaveeye agiligali gumuvuvisi, aganyenyaa munyi avaamitu vange mumanye; galamukola muvuli kuganagana ndi kuli muveeye avageri. Uvudinyu vwi mioyo ja vandu va Isiraeli sivoveeye vwukuhindira mihiga, navuzwa vulava ho vuzwa kuduuka lwa vandu vi zihiiri vosi vaza ku Nyasaye.

²⁶ Kandi nindio vandu va Isiraeli vosi valihonywa. Kuli Mang'oda Matakatifu gavoora, “Muhonyi alatula Ziyoni, kandi alatuliza uvudamanu vwosi kutura ku visukululwi vosi via Yakobo.”

²⁷ “Ndakalombe lilagana liange yili navo, lwa ndituliza ho vwoni vwavo.”

²⁸ Kigira vasuura makuva malahi, Avayuda vaveeye vasigu va Nyasaye kigira munyi vandu vizihiiri. Navuzwa kigira litovola lia Nyasaye, vaveeye avalina veve kigira avaguuga vaavo.

²⁹ Nyasaye namali kugasiza avandu ni vihaanwa kandi namali kuvalanga, si agirung'anaa mu zing'anagani zizie kandi mba.

³⁰ Kulwa munyi vandu vizihiiri, mwavura kutia Nyasaye maziambiri, navuzwa kalunu mumali konyoora zimbavasi zia Nyasaye kigira Avayuda sivaatia Nyasaye mba.

³¹ Munzira ndala nzere, kigira zimbavasi zia munyi mumali konyoora, Avayuda kalunu sivatizaa Nyasaye mba, kunangwa navo kandi vaduuki konyoora zimbavasi zia Nyasaye.

³² Nyasaye umali kokora avandu vosi vahambe vi livula kutia, kunangwa aduuki kuva nizimbavasi kuvo vosi.

Lizominya Nyasaye

³³ O, Vutugi, vogeri, kandi vutugi vwa Nyasaye, voveeye vonene ligali. Oh vogeri vwivwe kandi limanya lilie linyingi, liveeye linene ligali. Aa nivwaha unyala kwivaala likalaga lilie! Nivwaha unyala kumanyiriza zinzira zizie!

³⁴ Kuli Mang'oda Matakatifu gavoora, “Nivwaha umanyi zing'anagani ziu Mwami? Nivwaha unyala kuva mulungikizi wi zing'anagani zizie?

³⁵ Anoho, nivwaha wamuha ku ikihaanwa, kunaye aduuki kumwiranyira ikihaanwa zana?”

³⁶ Vindu viosi vialombwa naye, kandi viosi viveeye ho mwoyo kuvitira mu zinguru zizie; kandi viosi viirana kuye. Uvukumi vove kuye mihiga ni mihiga! Amini.