Varumi 10 - KITABU KITAKATIFU

¹ Avaamitu vange, nzegomba numwoyo gwange gwosi avandu vange Isiraeli vanyoore vohonyi! Mbasaaliraa ku Nyasaye!

² Nyara kukusuuviriza ndi vaveeye nu vuha vonene vwu kwenya kutumikira Nyasaye; navuzwa uvuha yivwo sivwayumbakwa ku limanya liagiligali mba.

³ Sivamanya kuli Nyasaye akolaa vandu kuva valungi imbiri weve mba, kandi vamali kogerizaa kwiyumbakira uvulungi liiva liavo veene. Nandio sivihaana vene kuliiva lia Nyasaye liu kulungikiza vandu mba.

⁴ Kristo umali koheriza Lilaga, vuli mundu woosi oveeye ni lisuuvira alavalizwa kuva mulungi imbiri wa Nyasaye.

Ovohonyi voveeye ku vosi

⁵ Musa yang'oda kigira likolwa mulungi ku lihulira Lilaga, ndi, “Mundu uhulira amalago gi Lilaga, alava mwoyo.”

⁶ Navuzwa ku makuva ga Mang'oda Matakatifu ku likolwa valungi na Nyasaye kuvitira mu lisuuvira, ni yaga: “Oteteeva mu mwoyo gugwo, ‘ Ivwaha ulianigira kuduuka mwigulu?’ Agaveeye kovora, koleta Kristo yaaze hasi.”

⁷ Anoho oteteeva: “Ivwaha uliika kuduuka musi mu lirova?” Nago ni koleta Kristo kutura mu likuza.

⁸ Icha gavoora ni yiki: “Likuva lia Nyasaye liveeye ahimbi niivi, liveeye mu munwa gugwo, kandi mu mwoyo gugwo,” - nalio liveeye likuva lie lisuuvira lia kwilwazaa.

⁹ Kunangwa, nuuva nuwiyama nu munwa gugwo ndi, Yeso aveeye Mwami, nu kusuuvira mu mwoyo gugwo ndi, Nyasaye yamusimugukiza kutura mu likuza ulahonywa.

¹⁰ Gaveeye kigira lisuuvira lietu kokolwa valungi na Nyasaye, kandi gaveeye kigira lieyama niminwa jietu, kwahonywa.

¹¹ Mang'oda Matakatifu gavoora, “Ku vosi umusuuvira sialiduuka mu zisoni mba.”

¹² Likuva yili liveeye ku vandu vosi kigira sihaveeyeho ni liavukana hagati ha Vayuda na vandu vizihiiri mba; Nyasaye aveeye mwahuli mulala wavoosi kandi ahaanaa uvugasu vunyingi ku vosi avamwanira.

¹³ Mang'oda Matakatifu gavoora, “Ku vosi ulianira ku lieta liu Mwami mulienya vokonyi, alahonywa.”

¹⁴ Avandu valanira ndi ku uyu wa vakikiri kusuuvira? Valamusuuvira ndi nivakikiri kuhulira amakuva geege? Valahulira ndi amakuva geege vugira umwilwazi?

¹⁵ Valilwaza ndi nivatatumiywi? Kuli Mang'oda Matakatifu gavoora, “Voveeye vulahi ki kuliiza lia vatumwa valeta nukwilwaza amakuva malahi!”

¹⁶ Navuzwa sivaveeye vosi, avavugiliraa makuva malahi yaga mba. Isaya mwene yavoola, “Mwami, nivwaha umali kusuuvira makuva giitu?”

¹⁷ Kunangwa lisuuvira liizaa kutura ku lihulira amakuva; kandi kuhuliraa amakuva kuvitira mu lilwaza Kristo.

¹⁸ Navuzwa ndeva: Gaveeye agiligali yavo sivali nivahulira makuva? Nagiligali vahulira; kuli Mang'oda Matakatifu gavoora: “Lilangiliza liu mwoyo gwaavo liahulirika mu lirova liosi; amakuva gaavo gaduukaa kokeheri chi lirova liosi.”

¹⁹ Ndeva kandi: Avandu va Isiraeli vaali ni vakikiri kumanya? Musa mwene aveeye wu kutanga kutivula, “Ndakamukole mukendekere avandu vataveeye ihiiri yiligali; kandi ndatumikira ihiiri ya vandu vasiru kumukola muve nuvutima.”

²⁰ Isaya aluvilira ligali kovora, “Mali konyoolwa na yavo avaavura konyenyeriza; mali kwivuula mwene ku yavo avaavura kondeeva.”

²¹ Navuzwa ku Isiraeli avoora, “Umbasu gwosi ndegomba kuhambana na vandu vavura kuhulira kandi avibaali.”