Vakolosai 4 - KITABU KITAKATIFU

¹ Munyi avami, muhaane ku avatugwa vinyu viu vulungi kandi viduukanu. Mwizurizi kumanya ndi munyi kandi muveeye nu Mwami mwigulu.

Amigizu Gandi

² Mumenye ligali mu lisaala kazozo, muhongere mu lilinda nu mu lisandiza Nyasaye.

³ Mukusaaliri kunangwa Nyasaye aduuki kukwigulira kiliango chu kwilwaza likuva lilie liu kuvoola agaviswa ga Kristo. Yiki nicho kivuni kigira ni mbeeye muhambe.

⁴ Musaale, inzi nduuki kugavura vulahi kuli wa ga nduukiraa mbore.

⁵ Muve no vogeri ku vandu avatasuuvira. Mutumikiri vwiyangu ni ing'inga ya muveeye nayo vulahi.

⁶ Muleke livoora lienyu live ligasu nilio kuyaanziza madiku goosi, muduuki kumanya kuli gamuduukira kutivulira mundu sa mulala.

Mirembe ju kumaliriza

⁷ Tukiko alamuvolera vindu viosi viveeye ku inzi, aveeye amiitu muyanze wange, mutumwa musuuvirifu, kandi mutumikiri wache mu Mwami.

⁸ Yiki nicho kigira mutumi ku munyi; muduuki kumanya liiva llietu, kandi amuleminye mioyo

⁹ Yaazaa harara na Onesimasi, amiitu wiitu musuuvirifu nu muyanze, oveeye mulala ku munyi. Valamuvoolera vindu viosi iviekolekaa hano.

¹⁰ Arisitariko, oveeye muhambe harara na inzi umuchelizi kandi Mariko, musiala wa Baranaba wa mwahulira malago kigira ye; niiva aladuuka ku munyi; mumwingirizi.

¹¹ Joshua, ulangwa Jusito umuchelizi. Vavaga yava nivo Vayuda Vakrisitayo, avakolaa miyinzi harara ninzi kigira uvwami vwa Nyasaye; kandi vaveeye novokoonyi ku inzi ligali.

¹² Epafura, oveeye mulala ku munyi, mutumwa wa Kristo Yeso, amuchelizi. Madiku goosi, amwizulizaa mu lisaala lilie, munyi muduuki kuva avadukiru kandi avekelema mwoyo ligali mu vulaliri vwosi vwa Nyasaye.

¹³ Inzi mboraa nu vuluviliri ndi ayinziraa vudinyu kigira munyi kandi kigira yavo avaveeye mu Laodikia kandi avaveeye mu Hierapoli.

¹⁴ Luka mwahi wi zinyasi muyanze, na Dema vamuchelizi

¹⁵ Munjeliziri avaamitu vaveeye Laodikia, na Nifa, kandi likanisa livuganiraa munyumba yeeye.

¹⁶ Ibarwa yiyi nimali kosomwa mu munyi, mukore esomwe kandi mu likanisa lia vandu va Laodikia: kandi munyi musome ibarwa itulaa Laodikia.

¹⁷ Muvoolere Arikipo amakuva yaga, “Olole ndi udukizi muyinzi gwa wahevwa mu vutumiki vwu Mwami.”

¹⁸ Inzi Paolo ng'oda ibarwa yili nu mukono gwange mwene kuhaana mirembe. Mwizurizi livoora liange. Zimbavasi zia Nyasaye zive ni munyi.