Vakalagi 8 - KITABU KITAKATIFU

Liguutwa liu kumaliriza lia vandu va Midiani

¹ Maku avandu va Efuraimu vavoolera Gidioni, “Kigira ki siwakulanga lwa waazia kulwaana vandu va Midiani? Kigira ki wakola ndi?” Na vililira ligali kigira ageene yaga.

² Navuzwa yavativulira, “Agandakunyaliza kokora sigaveeye aga Inzi nyara kufananyia ku aga munyi mumali kokora mba. Kali amakuzuzu ga munyi avandu va Efuraimu mumali kokora gaaviti ginyumba yange yoosi imali kokora.

³ Kali ndio, kuvitira mu zinguru zia Nyasaye, munyi mumali kwita vimiliri vaviri va vandu va Midiani; Orebu na Zebu. Inzi ngoli kindiki ikigiraa nzifananyie na aga munyi mumali kokora?” Lwayavoola yaga, uvutima vwavo vwageha.

⁴ Kuduuka ing'inga yiyi, Gidioni na vandu veve miatatu vaali nivakaduuka ha Mugera gwa Jorodani, kandi nivaakambuka. Vaali nivaluhi ligali, navuzwa vaali nivakikuunga vasigu.

⁵ Lwavaduuka ha Sukozi, yavolera avandu vi lidaala yili, “Mwaza haani imigadi ku vandu vange. Vaaluhi ligali, kandi Inzi ngungaa Zeba na Zalimuna, avami va vandu va Midiani.”

⁶ Navuzwa aviimiliri va Sukozi vateva, “Kigira ki kunyi kuhaane ichukulia ku liihi liilio? Ivi ukikiri kugumira Zeba na Zalimuna.”

⁷ Maku Gidioni yavoola, “Goosi gaveeye malahi! Lwa Yahova aviikaa Zeba na Zalimuna mu mukono gwange, ndamukuya na mafa gu muchangalangwe ni zindavati!”

⁸ Gidioni yazia kandi Penueli nateeva ovokonyi vulala vwere kutura ku vandu yavo, navuzwa avandu va Penueli vaahana amativuli malala kuli aga vandu va Sukozi vaali nivahaani.

⁹ Kunangwa Gidioni yavavolera, “Nziza kwirana ni mirembe, ma lwanzirana, ndasambura umunaara gwinyu!”

¹⁰ Zeba na Zalimuna vaali ha Karikori harara ni liihi liavo. Iliihi lie zihiiri ziu mwigendanyama liatigala na vandu 15,000. Avaari ni viitwa ni 120,000.

¹¹ Gidioni yaavitira kunzira ahimbi ku lwako lwu mwigendanyama, ivugwi wa Noba na Jogibeha, niyingilira iliihi yilio vugira yavo kumanya.

¹² Avami va vandu va Midiani vaviri, Zeba na Zalimuna, vamanya niviiluka, navuzwa Gidioni yavalonda navagumira, yaga galombaa iliihi lia vandu va Midiani kodegera.

¹³ Lwa Gidioni yaali naturaa mu vulwani kuvitira mu Lung'afa lwa Heresi,

¹⁴ yagumira umusoleri mulala kutura Sukozi, ma namuteeva amateeva. Musoleri uyu yang'odera Gidioni amita ga aviimiliri sabwini na saba.

¹⁵ Kunangwa Gidioni yazia ku vandu va Sukozi navavoolera, “Mwizulizaa ulwamwasula kongonya? Mwavoora simunyala kuhaana ichukulia choosi ku liihi liange iliali ni liluhi ligali mba kigira ndaali ningikiri kugumira Zeba na Zalimuna. Kalunu mbeeye navo!”

¹⁶ Kunangwa yavugula amafa gi vigunzanguva ni zindavati kutura mu changalangwe navitumikila kuhaana amageri ku aviimiliri va Sukozi.

¹⁷ Kandi yasambula umunaara gwa Penueli, niyiita avandu vu mu lidaala liene yilio vosi.

¹⁸ Maku Gidioni yateeva Zeba na Zalimuna, “Vaali vandu ki avamwita ha Tabori?” Vaativura nivavoora, “Vafana kuli munyi; vuli mulala yafanaa kuli umwana wu mwami.”

¹⁹ Gidioni yavoola, “Vaali avamwavo vange, avana va mama wange mwene. Inzi nzisuha, mugiligali mulavula kuviita, sindakamwiti mba.”

²⁰ Maku yavolera Jezeri, umuyaayi weve wimbiri, “Singira witi yava!” Navuzwa umuyaayi uyu yasura kutuliza ikivavi chiche. Yatia kigira yaali nakiri umusoleri.

²¹ Maku Zeba na Zalimuna vavoolera Gidioni, “Hamba ukwiti ivi umwene, kigira oveeye ni zinguru ziu mundu musaza.” Maku Gidioni yaviita kandi navugura imigasa jaali ku magoti gi zing'amia ziavo.

²² Agene yaga nigakavita vandu va Isiraeli vavoolera Gidioni, “Ivi ukwamiihi harara na ivisukulurwi vivio. Umali kokohonyia kutura ku vandu va Midiani.”

²³ Gidioni yavativulira, “Inzi sindava umwami winyu mba, kali umwana wange si alamwamiiha mba. Yahova niye waza amwamihi.”

²⁴ Navuzwa yaazizagilira kovora, “Nyenya koteeva munyi ikindu kilala. Vuli mulala ku munyi alaanzilanyila izimingili ziumumatui ziamwa vugula kutura muvulwani.” (Avamidiani kuli avandu vandi avamenya mu ligendanyama vaali ni zimingiri zie zahabu ziumumatui.)

²⁵ Ma vativura nivavoora, “Kulava nuvuyanzi kukuha.” Navo vaala inguvu, na vuli mundu yavika ku izimingili zia yaali natulizi muvulwani.

²⁶ Uvuliduhu vwi zimingiri ziu mumatui zie zahabu ya Gidioni yanyoora vwali ahimbi izikilo sirini, na uvuliduhu vwe migasa, iminyororo ju mumang'oti harara ni zinguvu zia zambarau zia avami va midiani viivikaa, anoho imisibi ja vavoha mumang'oti gi zing'amia ziavo.

²⁷ Gidioni yalomba ikimanyiru chi zahabu ma naakiviika mu lidaala lilie lia Ofura. Avaisiraeli vosi valeka Nyasaye nivasigamira ikimanyiru yiki. Yigu gwaali umutego ku Gidioni na vinyumba yeeye.

²⁸ Nandio, Midiani yaguutwa imbiri wa Isiraeli. Ikivala chaali nu vweremerizi ku mihiga arubaini kuduuka lwa Gidioni yakuza.

Likuza lia Gidioni

²⁹ Ma Gidioni mwana wa Joashi yirana yengo weve kandi namenya yo.

³⁰ Gidioni yaali na vana vayaayi sabwini, kigira yaali na vakali avanyingi.

³¹ Kandi yaali nu mukali wa yavika mu Shekemu uwamwivulira umuyaayi wayalanga Abimeleki.

³² Gidioni umwana wa Jaoshi yakuza mu mihiga ju vusakulu, na yateevwa mu kilindwa cha Joashi baba weve, ha Ofura lidaala lienyumba ya Abiezeri.

³³ Kunangwa lwa Gidioni yaali niyakakuza, avandu va Isiraeli valeka Yahova, nivasigamira vanyasaye va Baali; nivalomba Baali wi lilagana kuva munyasaye wavo.

³⁴ Avandu va Isiraeli vivilira Yahova Nyasaye wavo uwaali niyaavahonyia kutura vasigu vaavo vosi kutura mu zimbega ziosi.

³⁵ Kali ndio sivali ku nilisandiza ku Gidioni ku vulahi vwa yaali navakoleeye mba.