Vakalagi 7 - KITABU KITAKATIFU

Gidioni Yaguuta vandu va Midiani

¹ Lidiku lilala Gidioni na vandu veve vavuuka mugamba zuri ni vazia kwivungizana ha Kisinukiru cha Harodi, amahema ga vandu va Midiani gatuungwa mulivoona ivaale wa mahema ga Gidioni ahimbi ni kiguru cha More.

² Yahova yavolera Gidioni, “Avandu voveeye navo navanyingi ligali Inzi singuvugilira vanyoore uvuguuti ku vandu va Midiani mba. Valaganagana nivo avatumikiyi uvunyingi vwavo ku vandu va Midiani. Kandi sivalamba lizominya kali hakuzu.

³ Kulwayago, ulandiziri avandu vosi nivahulira, uvavoolere ndi, ‘Umundu woosi unyala kuva naveeye nuvuti yiirane yengo kutura mu kiguru cha Gileadi.’ ” Avandu izielefu sirini na mbiri viirana yengo na avandu izielefu likomi vaatigara.

⁴ Kandi Yahova yavolera Gidioni, “Avandu vakikiri avanyingi ligali, vahiri mu mazi. Nyenya mbageliziri wene yeyo kigira ivi. Ningovolera umundu uyu uduukani kuzia nivi, kuduuka alazia. Na ningovolera umundu uyu siaduukani kuzia nivi, sialazia mba.”

⁵ Gidioni yaahira avandu mumazi, na Yahova yamuvolera, “Yavukanyia umundu woosi ugamulaa amazi nu lulimi lwilwe kuli imbwa, kutura ku vandu vosi avasigamaa hasi ku vaduuki kunwa amazi.”

⁶ Kunangwa avandu vaagamuraa amazi nivatumikira amakono gaavo vaali miatatu; avandu vandi vosi vasigama hasi ukunwa amazi.

⁷ Yahova yavolera Gidioni, “Ndatumikira avandu miatatu avaagamula amazi kuli zimbwa kulwana vandu va Midiani. Avatigaaye vosi viirane wavatuli.”

⁸ Kunangwa Gidioni yavolera vandu va Isiraeli vosi viirane yengo nitali vandu miatatu avagingaa ivindu viuvulwani ni visiriva. Hokososa ha vandu va Midiani haali mulivoona indangu wa hokososa wa vandu va Isiraeli.

⁹ Vudiku vulala vwere yivwo, Yahova yalaga Gidioni, “Singira na usulunguti kutangiza iliihi, kigira Inzi mali kuviika vandu va Midiani mu makono googo.

¹⁰ Navuzwa niiva utiiyi kusulunguta, ulasulunguta hokososa haavo harara na Pura, umutumikiri woovo.

¹¹ Ulahulira gavavoraa, na gene yago galakuha uvuluviliri kuvalwaana.” Kunangwa Gidioni nu mutumikiri weve Pura vasulunguta kuduuka ku lwako lwa hokososa humusigu.

¹² Avandu va Midiani, Maleki harara na avandu vi zihiiri ziu mwigendanyama vaaloreka kuva vanyingi mulivoona kuli izisigi, na vaali ni zing'amia izinyingi kuli umuyeka kulujinga lwinyanza.

¹³ Lwa Gidioni yaduuka mulivoona zana, yahulira umundu navolera uwache amalooto gayaali naaloti. Yavoola, “Ndoti ndi umugadi gwi ingano gugwiyi hagati hokososa ha vandu va Midiani, ma ni gogomagoma, niguduya ilihema. Ilihema zana liavunikana kandi niligwa hasi.”

¹⁴ Maku umulina weve yamutivulira navoora, “Yiki ni kivavi cha Gidioni, umwana wa Joashi, umusaza wa vandu va Isiraeli, kigira Nyasaye umali kuhaana vandu va Midiani harara na hokososa hoosi mumukono gwigwe!”

¹⁵ Lwa Gidioni yahulira kigira amalooto gu mundu uyu, ni kivuni chago, yavika malu geege haasi nasigamira Yahova. Maku yamanya niyiirana ku vandu va Isiraeli, navavoolera, “Vuchi! Yahova umali kuhaana ku munyi iliguuta ku liihi lia vandu va Midiani!”

¹⁶ Yagavula avandu veve miatatu mu viduma vivaga, ma nahaana ku vuli mundu ikisiriva harara ni inyingu enzere neveeye mu no lomemo lwu muliru.

¹⁷ Yavavolera, “Lwa nduuka ku lwako lwa hokososa lwa vandu va Midiani mumbenze kandi mukore kuli ngolaa.

¹⁸ Lwa Inzi ni kiduma change kukuba ivisiriva vietu, munyi kandi mulakuba ivisiriva vienyu harara kundulu kwa hokososa haavo kandi muhanzuki no kovora, ‘Mulwaaniri Yahova kandi mulwaaniri Gidioni.’ ”

¹⁹ Gidioni harara ni kiduma cha vandu miamoja, yaduuka ku lwako lwa hokososa vudiku hagati nivukikili kuduuka vudiku hagati lwa va lindi vahia vaali nivakasamuula. Maku vandu va Isiraeli vaakuba ivisiriva, kandi nivatanyia izinyingu ziavaali nivagumiyi mumakono gaavo.

²⁰ Ni ividuma vindi viakola ndio kandi vosi vagumira izimemo ziavo mumukono mulungi, ma vosi nivahaanzuka, “Vulwani vwa Yahova kandi vulwani vwa Gidioni!”

²¹ Vuli mundu yetegeka hayaviikwa ku lwako lwa hokososa, kandi liihi lia vandu va Midiani liosi lianyagura; vaakuba izikwiri niviruka.

²² Lwa vandu va Gidioni vaali nivakikuba ivisiriva, Yahova yakola vasigu vosi avaari mu hokososa nivatanga kulwaana aveene na vene ni vivavi viavo. Viiruka kuzia kolovega lwa Zarezani kuduuka Bezishita, kali kuduuka mu lidaala lia Abeli-mehola ahimbi Tabazi.

²³ Kunangwa avandu kutura mu ihiiri ya Nafutali, Asheri, kandi zimbega ziombi zia Manase valangwa kuuza kolondelera vandu va Midiani.

²⁴ Gidioni yatuma avatumwa mukivala choosi chivigulu cha Efuraimu kovora, “Sulunguti muzie, kulwaana vandu va Midiani. Mulindi Mugera gwa Jorodani, kandi no togera twosi kuduuka Bezibara, kwigalira vandu va Midiani vavuli kwambuka.” Avasaza va Efuraimu valangwa harara nivigalira Mugera gwa Jorodani no togera kuduuka Bezibara.

²⁵ Vagumira vimiliri vaviri va vandu va Midiani, avaalangwa Orebu na Zebu; viitira Orebu ha Lwanda lwa Orebu, na Zebu ha Kiminiru chi Waini cha Zebu. Vazizagilira kukunga vandu va Midiani ni valeta mutwi gwa Orebu na Zebu ku Gidioni uwaali naveeye ulwene yilwo ivugwi wu Mugera gwa Jorodani.