Vakalagi 6 - KITABU KITAKATIFU

Gidioni

¹ Avandu va Isiraeli vaakora uvwoni imbiri wa Yahova, kandi Yahova yaleka avandu va Midiani vavamiihi ku mihiga saba.

² Avandu va Midiani vaali ni zinguru kuvita vandu va Isiraeli, na kigira ageene yaga, vandu va Isiraeli vivisa mu zimbanganywa na havundu handi muvigulu nu muviguuti.

³ Lwa vandu va Isiraeli vataga ivitagwa mu milimi jaavo, vandu va Midiani na vandu va Maleki, harara na vandu vu muchangalangwe vaza ku vingilira.

⁴ Vamenya mukivala nukwononyia ivitagwa mu milimi ja vandu va Isiraeli kuduuka mu lovega lwa Gaza. Vaavugura amagondi gaavo goosi, izing'ombe ni zisukiri, nukuvaleka aveere.

⁵ Vaza ni mitugu jaavo harara na mahema gaavo nivafaana kiduma chi zisigi. Izing'amia ziavo harara naveene ziali izitanyara kuvalizwa. Vingira mu kivala yicho nivachononyia ligali.

⁶ Avandu va Midiani vaakora vandu va Isiraeli kugwa avadaka kuduuka lwa vanira Yahova avakoonye.

⁷ Lwa avandu va Isiraeli vaali ni ku Yahova kigira Midiani,

⁸ Yahova yavatumira umuporofeti uwavoola, “Yaga nigo ga Yahova, Nyasaye wa Isiraeli avoora: Inzi ndaamutuliza Egebeti kutura mu kivala chu vutumwa.

⁹ Ndaamuhononokiza kutura mu makono ga vandu va Egebeti, kandi kutura mu makono ga vandu avamudambizaa, ma nimbakunga kutura imbiri winyu, kandu ndaavugura imilimi jaavo nimuha.

¹⁰ Ndaamuvolera ndi, Inzi mbeeye Yahova Nyasaye winyu; vanyasaye va Amori, avamumenyaa hagati haavo mba. Navuzwa simwahulira agange mba.”

¹¹ Maku engelosi wa Yahova yaza mu lidaala lia Ofura niyikara mumusaala gwa Joashi, umundu wihiiri ya Abiezeri. Umwana weve Gidioni yaali nahuuraa ingano havundu ahivisu hukukamululira iwaini kigira siyenya vandu va Midiani vamanye ahuuraa ingano mba.

¹² Engelosi wa Yahova yaloleka ku Gidioni na amuvoleraa, “Yahova aveeye nivi, mundu muluviliri kandi mundu wuvunyali.”

¹³ “Navuzwa umwami,” Gidioni yativura, “Niiva Yahova aveeye harara ni kunyi, kigira ki yaga goosi gaakoleki ku kunyi? Iviokogenyia zana viveeye hai ivia vaguuga viitu vaakovolera ulwavavoora: ‘Yahova siyakutuliza Egebeti? Navuzwa kalunu Yahova umali kukwivilira, ma okoleki mu makono ga vandu va Midiani.’ ”

¹⁴ Maku Yahova yamulaga, “Tula nauzie nizinguru zizio ziosi, uduuki kohonyia vandu va Isiraeli kutura mu makono ga vandu va Midiani. Na Inzi umwene ngutumaa.”

¹⁵ Gidioni yativura navoora, “Navuzwa Yahova, Inzi nyara kohonyia ndi Isiraeli? Vandu vi inyumba yange vavura zinguru mu ihiiri yoosi ya Manase, kandi Inzi simanyikani kali mu vandu vi nyumba yange mba.”

¹⁶ Yahova yamutivulira, “Unyala kokora ndio kigira Inzi ndakokonya. Uladiviza vandu va Midiani kuli udiviza umundu mulala.”

¹⁷ Gidioni yativura navoora, “Niiva uyanziziywi ninzi, mbe ikimanyiru chukumanyia ndi oveeye Yahova.

¹⁸ Mwaza utatula hano mba, Inzi ngogonya, kuduuka lwangoletela ikihaanwa che chukulia.” Yahova yativura namuvolera, “Ndalinda kuduuka lwavirana.”

¹⁹ Kunangwa Gidioni yazia munyumba nadeeka ekememe chimbuli, natumikira uvusie zikilo likomi na ndala ninusu vutazugaani mu namamera okolomba mugadi. Yavika inyama zana mungungi; ma naviika umuunyu gwayo munyingu nukuhilira engelosi wa Yahova hamusaala.

²⁰ Engelosi wa Yahova yavolera Gidioni, “Vugula mugadi gutaveeye mu na mamera harara ninyama, na uguviiki ku lwanda, ma uzuki ku umunyu.” Gidioni yakola ndio.

²¹ Maku engelosi wa Yahova yavugula imbimbu nadiira esonga yayo kuviukulia zana; ulwene yilwo umuliru gwaaduka kutura mulwanda, nigusamba ivukulia zana viosi. Maku engelosi wa Yahova yamuleka vugira kumanya.

²² Maku Gidioni yaamanyiriza ndi uyu yaali engelosi wa Yahova; na Gidioni yavoola, “Oh, Yahova Nyasaye, Inzi mali kolola engelosi moni na moni.”

²³ Navuzwa Yahova yamuvolera, “Umurembe gove harara nivi; utatia, kigira siulakuza mba.”

²⁴ Gidioni yumbakira Yahova uvwali hazana yaho, navulanga “Yahova aveeye umurembe.” Kuduuka kalunu, uvwali zana vukikiri ha Ofura, ovoveeye vwa vandu va Viezeri.

²⁵ Uvudiku yivwo Yahova yavolera Gidioni, “Vugula ijiriki ya baba woovo, ijiriki yakaviri eveeye ni mihiga saba, ma usambuli uvwali vwa Baali, uvwa baba woovo aveeye navwo, na otemagiri hasi munyasaye Ashera, wikikali ahimbi nu vwali zana;

²⁶ na wumbakiri Yahova Nyasaye woovo uvwali ku lwanda yilu mu lilohiza lilahi lia magina; na ulavugula ijiriki yakaviri nukugihaana kuli kihanwa chukusambwa; nizingu ziukusambira zilatula ku misaala ja otemagi jiumunyasaye ulangwa Ashera.”

²⁷ Kunangwa Gidioni yavugula avandu likomi mu vatumikiri veve, naakora kuli Yahova yamuvolera; kunangwa yaali natiiyi avandu vinyumba ya baba weve, kandi vandu vi lidaala yilio; siyaali anyala kusambula mbasu mba; yasambula vudiku.

²⁸ Avandu vilidaala vavuuka mugamba mumavwevwe nivanyoora uvwali vwa Baali harara ni vifananyi cha Ashera, viombi vivunagiywi, ni ijiriki ya kaviri imali kusaambirwa ku vwali vuhia uvwumbakiywi.

²⁹ Vateevana aveene na vene, “Nivwaha unyala kuva naakori yaga?” Lwa vaali nivenyereriza no koteveleriza vavoola, “Ni Gidioni mwana wa Joashi umali kokora yaga.”

³⁰ Maku avandu vi lidaala vavoolera Joashi, “Leeta umwana woovo aduuki kukuza, kigira yaakotemanyia nukusambula uvwali vwa Baali nikifananyi cha Ashera.”

³¹ Navuzwa Joashi yavolera vosi avamuhangalizaa, “Munyi muveeye kolovega lwa Baali? Mundu oveeye kolovega lwa Baali alakuza nivukiri kucha. Niiva Baali ni nyasaye, muleke mwene yikingi. Maku muvooleraa uvwali vwivwe nivwo vumali kusambulwa!”

³² Kutura ulwene yilwo, Gidioni yamanyikana kuli Jerubali kigira Joashi yavoola, “Leka Baali mwene yikingi mwene; uvwali vwivwe nivwo vwasambulwa.”

³³ Ing'inga yeyo vandu va Midiani, Maleki, harara ni zihiiri zindi ziumwigendanyama, ziamanya niziivungizana, nivambuka Jorodani, nivamenya, mu livona lia Jezireeli.

³⁴ Roho wa Yahova yaza ku Gidioni, ma nakuba ikisiliva kulanga avasaza vi ihiiri ya Abiezeri vamulonde.

³⁵ Yatumana kandi avatumwa mu kivala choosi cha Manase navateeva vamulonde. Yatumana avatumwa kandi kuzihiiri zia Asheri, Zabuloni na Nafutali; na vaza kuhambana naye.

³⁶ Maku Gidioni yavolera Nyasaye, “Niiva ulasoola Isiraeli nu mukono gwange kuli ovooye,

³⁷ mbikaa inguvu yu vwoya yi ligondi koloze lwakuhuuliraa ku ingano; niiva iliime lilava kunguvu yuvwoya yiyi mugamba mu mavwevwe, maku ndamanya ndi Ivi ulandumikira kosoola Isiraeli.”

³⁸ Kunangwa, ageene yaga nigo agaakoleka. Ulwa Gidioni yavuka mugamba kale naakamulura inguvu yu vwoya vwi ligondi, amazi gaturaa mu ibakuli indala.

³⁹ Maku Gidioni yavolera Nyasaye, “Utaluha ninzi mba, navuzwa umbugiliri ndeve vuzwa lulara lweng'ine: Leka ngelizi vuzwa kandi lulala nindumikiraa inguvu yu vwoya vwi ligondi yiyi. Ing'inga yiyi nyenya inguvu yuvwoya zana kalunu eve inyumu vuzwa, na hasi haiviikwa have ahaziliru.”

⁴⁰ Uvudiku yivwo, Nyasaye yakola malala meere. Umugamba gwalonda ku, inguvu yuvwoya yaali inyumu, navuzwa hasi hayaviikwa haali ni lime.