Vakalagi 5 - KITABU KITAKATIFU

Ulwimbu lwa Debora na Baraka

¹ Lidiku liene yilio Debora na Baraka mwana wa Abinoamu vimba ulwimbu yilu:

² Yahova yizominywi! Avandu va Isiraeli vaali nilienya kulwaana; avandu viituliza aveene.

³ Muhuliri munyi avamihi! Mutegize amatu munyi vimiliri! Inzi ndimbira Yahova zinyimbu zindahi; Inzi ndimbira Yahova ilizominywa, Nyasaye wa Isiraeli.

⁴ Yahova, lwa watura mu vigulu via Seiri, lwa waatura mu kivala cha Edomu, lirova liadegera, niimbura yakuba kutura mu vwerefu. Yee, mazi gasunduka kutura mumalesi.

⁵ Ivigulu viadegera imbiri wa Yahova wa Sinai, imbiri wa Yahova, Nyasaye wa Isiraeli.

⁶ Mu madiku ga Shamugari, mwana wa Anazi, mu madiku ga Jaeli, zimbalabala ziali vugira avandu, na avagendi vageenderaa ku kundulu.

⁷ Amadara ga Isiraeli gamenya vugira avandu, lwa yaza, Debora, waza kuli mama mu Isiraeli.

⁸ Lwa vandu va Isiraeli vaatovora vanyasaye vageni uvulwani vwaduuka mu virivwa via madaala manene, sihaaliho nikuuti anoho litimu vialoleka mba, ku vandu zielefu arubaini.

⁹ Umwoyo gwange goveeye na aviimiliri vu vulwani vwa Isiraeli, harara nayavo avituliza aveene, Yahova yizominywi!

¹⁰ Mulandizi amakuva munyi avaniina ku zibarasi zindavu, munyi avikalaaku visero, kandi munyi avaadukana kogenda kunzira.

¹¹ Huliri! Imiganda jeliyoga ahimbi ni vidaho gimolomaa kigira liguuta lia Yahova, iliguutalia vandu va Isiraeli. Maku avandu va Yahova vasulunguta kutura mu madaala gaavo.

¹² Yimilira, Debora, yimilira! Yimilira! Yimba ulwimbu! Yimilira! Singira, Baraka mwana wa Abinoamu, yimilira vandu vumali kugumira!

¹³ Maku avasuuvirifu vasulunguta nivaaza ku aviimiliri vaavo; avandu va Yahova vaza kuye nivetegeki kulwana!

¹⁴ Vaatura Efuraimu ni vazia mu kivoona inyima wihiiri ya Benjamini na vandu veve. Aviimiliri vu vulwani vasulunguta kutura Makiri, mimiliri kutura Zabuloni.

¹⁵ Aviimiliri va Isakari vaza na Debora, yee, Isakari yaza kandi Baraka ndio, kandi vamulonda mulivoona. Navuzwa ihiiri ya Rubeni yaagavukana; sivali nuvuha kuuza mba.

¹⁶ Kigira ki nivatigara inyima na magondi? Kuhuliriza kuli avayi valangiriza iviayo viavo? Gaveeye giligali ndi ihiiri ya Rubeni yaagavukana; sivali nuvuha kuuza mba.

¹⁷ Ihiiri ya Gadi yamenya ivugwi wa Jorodani, ni ihiiri ya Dani yamenya mu zimeri. Ihiiri ya Asheri yamenya kulujinga lwi inyanza; vamenya vuzwa ku lujinga.

¹⁸ Navuzwa avandu va Zabuloni na Nafutali vaviika livamwoyo liavo muvuhimwa vwu vulwani.

¹⁹ Ha Tanaki ahimbi na mazi ga Megido, avami vaza nivalwana; avami va Kanaani valwaana, navuzwa sivavugula ifeza mba.

²⁰ Izing'ereng'ani zialwaana kutura mu vwerefu; lwa ziageendaa mu vwerefu, zialwaana Sisera.

²¹ Umugera gwa Kishoni gwavakurura niguvahila - Umugera gwa Kishoni ugwanyaguraa umuriviti Inzi ndisunda imbiri nizinguru!

²² Maku zibarasi ziaza ni zinyaguraa, niziseena izimbagayu ziazio hasi.

²³ “Engelosi wa Yahova yavoola, alaamwe Merozi; ikilaamo, ikilaamo kuyavo avamenyaa yo. Sivaaza kokonya Yahova mba, hambi kuli avuvulwani kumulwaniri.”

²⁴ Ku vakali vosi, oveeye ningavi ni Jaeli, umukali wa Heberi, Umukeni uwizingavi kuvita avakali vandi vamenya mu mahema.

²⁵ Sisera yateeva amazi, navuzwa yamuha amaveere; yamuletera amaguta ga maveere kubakuli indahi.

²⁶ Yavugula kivambo chi lihema mukono mulala, inyundu yukuyinzilira mumukono gundi; yakuya Sisera naamwatanyia mutwi; yaamufudulanyia umutwi gwigwe.

²⁷ Sisera yinama havirenge vivie, yagwa ma naagona ho yagwa havirenge via Jaeli yagwa hasi, nakuza.

²⁸ Mama wa Sisera yahenzera mu lidirisia; yahenzelera inyima mu mwanzu. “Yateeva, kigira ki iligare lilie likikiri kuduuka? Kigira ki izibarasi zizie zichelevi kwirana?”

²⁹ Avikikali vache vovogeri vaamutivulira, numwene yeemolomela navoora,

³⁰ “Veyenyela vuzwa vindu viukugumira nukugavurana, umukana anoho vaviri ku vuli mundu wuvulwaani, izinguvu zia Sisera ziuvuguli vonene, iziaviikwa amangirinya zimbega ziosi ziayaandetelaa.”

³¹ Avasigu vovo vakuze ndio, O, Yahova, navuzwa avalina vovo vang'ereng'ane kuli iliuva! Ni mirembe jaaliho mu kivala ku mihiga arubaini.