Vakalagi 4 - KITABU KITAKATIFU

Debora na Baraka

¹ Lwa Ehudi yakuza, vandu va Isiraeli vaakora vwoni imbiri wa Yahova kandi.

² Kunangwa Yahova yavaleka nivaguutwa na Jabini, mwami wa Kanaani uwamihaa lidaala lia Hazori. Mwimiliri wiliihi lilie yaali Sisera, uwamenyaa ha Haroshezu Hagoimu.

³ Jabini yaali na magare miatisa gi kivia, na yamiha avandu va Isiraeli nu vululu kandi ni zinguru ku mihiga sirini. Maku vandu va Isiraeli vanira Yahova avakoonye.

⁴ Debora, umuporofeti mukali waali mukali wa Lapidozi, yaali umuklagi wa Isiraeli ing'inga yene yeyo.

⁵ Yikala mu musaala gwi likindu lia Debora hagati ha Rama na Bezeli, mukivala chivigulu cha Efuraimu. Avandu va Isiraeli vazaa kuye vaduuki kukalagirwa.

⁶ Lidiku lilala yatumana Baraka, mwana wa Abinoamu kutura Kedeshi mu kivala cha Nafutali, na amuvoleraa, “Yahova, Nyasaye wa Isiraeli akulagaa ndi, ‘Vugula avandu izielefu likomi kutura mu zihiiri zia Nafutali na Zabuloni, ma uvatumi ku Kiguru cha Tabori.

⁷ Ndaleta Sisera, umwimiliri wi liihi lia Jabini, kukulwaana ha Mugera gwa Kishoni. Alava na magare harara na vandu vu vulwani, navuzwa ndakuguutira.’ ”

⁸ Maku Baraka yativura navoora, “Ndazia niiva ulazia ninzi, navuzwa nutazia ninzi, sindazia mba.”

⁹ Debora yativura navoora, “Ligali ndazia harara nivi; nitali uvukumi sivulava harara nivi mulogendo lulwo mba, kigira Yahova alahaana Sisera mu mukono gwu mundu mukali.” Maku Debora yaatanga logendo kuzia na Baraka kuzia Kedeshi.

¹⁰ Baraka yalanga zihiiri zia Zabuloni na Nafutali ni vazia Kedeshi, na vandu izielefu likomi vaamulonda. Debora yazia naye.

¹¹ Ing'inga yene yeyo Heberi Mukeni yaali niyumbaka lihema lilie himbi na Kedeshi ha Zananimu. Yaali niyaang'anya kutura ha Vakeni vandi vamenya, kutura ku avana va Hobabu, umukwasi wa Musa.

¹² Lwa Sisera yahulira ndi Baraka umali kuzia ku Kiguru cha Tabori,

¹³ yalanga amagare gi kivia miatisa, harara navandu veve vosi, naavatuma kutura Haroshezu Hagoimu kuzia ku Mugera gwa Kishoni.

¹⁴ Ma Debora yavolera Baraka, “Tula zia! Yahova aveeye harara nivi! Kalunu umali kukuha iliguuta lia Sisera.” Maku Baraka yasulunguta kutura mu Kiguru cha Tabori harara ni liihi lilie lia vandu izielefu likomi.

¹⁵ Lwa Baraka yavingilira iliihi lilie, Yahova yagoyanya Sisera harara magare geege goosi, harara namahi geege. Sisera yatura mu ligare lilie, niyiruka.

¹⁶ Baraka yalonda iliihi yili kuduuka Haroshezu Hagoimu, niliihi lia Sisera liosi liadivizwa. Mundu kali mulala siyaatigala mba.

¹⁷ Sisera yiruka kuduuka mu lihema lia Jaeli, mukali wa Heberi Umukeni, kigira Umwami Jabini wa Hazori yaali umulina wa vandu vinyumba ya hazori.

¹⁸ Jaeli yatura nazia kwaganira Sisera, namuvolera, “Yingira mu.” Naye yaamufuuma ni suka.

¹⁹ Sisera yamuvolera, “Mwaza mbe amazi nwi; mbeeye nu vuluhu.” Jaeli yakunura ikimuga cha maveere, naamuha naanwa, kandi naamufuuma.

²⁰ Maku Sisera yamuvolera, “Singira ha muliango gwilihema, niiva umundu woosi alaza koteeva niiva mbeeye mu, umugaye.”

²¹ Sisera yaali naluhi ligali, nayaatanga kogona. Maku Jaeli yavugula inyundu harara ni kivambo chi lihema, naanyenyeka, nazia naduuka hayaali naagoni, ma namwiita lwa yamuduya ni kivambo ku mutwi gwigwe nikifudulanyia kuduuka hasi mumalova.

²² Lwa Baraka yaza niyenya Sisera, Jaeli yatura nazia kumwaganira, namuvolera, “Hamba hano! Ndakumanyia umundu wawenyaa.” Yingira mu na Jaeli, kandi yanyoora Sisera naagoni hasi nakuzi, ni ikivambo chi lihema nikifudulanyi umutwi gwigwe kuduuka mumalova.

²³ Lidiku yilio Nyasaye yaguuta Jabini mwami wa Kanaani imbiri wa vandu va Isiraeli.

²⁴ Avandu va Isiraeli vameedeka zinguru kuduuka lwavadiviza Jabini mwami wa Kanaani.