Vakalagi 21 - KITABU KITAKATIFU

Avakali ku Ihiiri ya Benjamini

¹ Lwa vandu va Isiraeli vaali nivivungikizi ha Mizipa visuha nivavoora, “Sigaduukana mulala hagati hiitu ahaane umukaanaweeve azie lukali ku ihiiri ya vandu va Benjamini mba.”

² Kunangwa avandu va Isiraeli vazia Bezeli nivikara yo imbiri wa Nyasaye kuduuka ha mugolova. Vaalira nivasioma vululu ligali nivavoora,

³ “Yahova Nyasaye wa Isiraeli, kigira ki yaga negekoleka? Kigira ki ihiiri ya Benjamini eveeye ahimbi kogota kutura mu Isiraeli?”

⁴ Umugamba gwalonda ku avandu vavuuka kale kandi nivumbaka uvwali, ma nivahaana ivihaanwa viu kusambwa harara ni vihaanwa viu mirembe.

⁵ Avandu va Isiraeli vateva, “Nivwaha kutura mu zihiiri ziosi zia Isiraeli uvuli kuuza mu livugana lia Yahova ha Mizipa?” Kigira vaali nivisuhizani ndi umundu woosi uvula kuuza Mu livugana imbiri wa Yahova ha Mizipa gamudukira akuzi.

⁶ Avandu va Isiraeli vavelerera vamwavo vaavo avandu vinyumba ya Benjamini nivavoora, “Kalunu Isiraeli imali kogotiza ndala ku zihiiri ziayo.”

⁷ Vavoola, “Kokora ndi kwanyoora avakali vakunyala kuha avasaza va Benjamini avamali kutigala yava? Kwayisuha imbiri wa Yahova ndi sikunyala kuvaha kali mulala ku vakana viitu mba.”

⁸ Lwa vateva niiva avandu vaveeye ho kutura mu zihiiri ziosi zia Isiraeli uvuli kuuza mu livugana ha Mizipa, vanyoola ndi umundu woosi siyaatula Jabeshi mu Gileadi mba;

⁹ Lwa valanga amita ga vandu vuvulwani, sihaaliho nu umundu kali mulala kutura Jabeshi wahugira mba.

¹⁰ Livugana liatuma avandu avaluviriri ligali 12,000 namalago ndi, “Muzie kwiita vuli mundu mu Yabeshi harara na vakali kandi avana.

¹¹ Mwiti avasaza vosi, kandi vuli mukali utaveeye umugima.”

¹² Vanyoola vakali avagima vang'erere zimia zine hagati ha vandu mu Jabeshi, na vavaleeta mu hokososa ha Shilo eveeye mu kivala cha Kanaani.

¹³ Maku ilivugana liosi liatumana makuva ku vandu va Benjamini avaari nivivisi mu Lwanda lwa Rimoni kandi nivavugirizana kolekera uvulwani.

¹⁴ Avandu va Benjamini viirana, na vahevwa avakaana va Jabeshi avavaavula kwita. Navuzwa avakaana yava sivali vanyara kugavulwa mavaduukiri avasaza vosi mba.

¹⁵ Avandu vavererera vandu va Benjamini kigira Yahova yaali naavunanyi uvuhambani vwi zihiiri zia vandu va Isiraeli.

¹⁶ Kunangwa vimiliri vu muganda vavoola, “Sihaveeye ho na vakali vandi mu ihiiri ya Benjamini mba. Kunyala kokora ki kuduuki konyoora avakali kuhaane ku vasaza vatigaye yava?

¹⁷ Sigaduukana Isiraeli egotizi ndala ku zihiiri ziayo likomi na ziviri mba. Kuduuka konyoole inzira yokohononokizira mu ihiiri ya Benjamini.

¹⁸ Navuzwa sikunyala kuvaha avakaana viitu kuli avakali mba, kigira kwamala kuviika ikilaamo ku mundu vosi uvugilira ihiiri ya Benjamini koleta mulala ku vakana viitu.”

¹⁹ Maku vavoola, “Lilia lia vuli muhiga lia Yahova ha Shilo liveeye himbi.” Shilo eveeye ivaale wa Bezeli, isavaalu wa Lebona, kandi ivugwi winzira eveeye hagati muhanda ogoveeye hagati ha Bezeli na Shekemu.

²⁰ Vavoolera vandu va Benjamini, “Muzie kwivisa mu milimi je mizabibu

²¹ ma muhenze. Lwa vakana va Shilo vaza kuvina, vuli mulala ku munyi muturi mu milimi ji mizabibu, na mwivuguliri vakali kuzingulu kutura mu vakana zana yavo, ma mwiluki navo kuduuka mu kivala cha Benjamini.

²² Niiva vababa anoho avavozo vaavo valaleta amahangari munyala kuvavoolera, ‘Mwaza leki komenye navo vave avakali viitu, kigira sikwavavugula mu vulwani kutura kumunyi mba. Na kigira simwavahaana kukunyi, simulavalizwa kuva na mahiolo mu livunaga lilago lienyu mba.’ ”

²³ Avandu va Benjamini vaakora ndio, vuli mulala yivugulira umukali kutura mu vakana avaari nivavina ha Shilo nukumuginga kuzia naye. Maku viirana mukivala chavo, nivumbaka amadara gaavo vuhia, nivamenya mu.

²⁴ Ing'inga yene yeyo avandu va Isiraeli avatigara vaatura nivirana yengo ku zihiiri ni zinyumba ziavo, na vuli mulala ku imiandu jije umwene.

²⁵ Mu madiku yago umwami siyaali mu Isiraeli mba; vuli mundu yakola agamuyanzizaa umwene.