Vakalagi 20 - KITABU KITAKATIFU

Vandu va Isiraeli vetegeka Kulwaana

¹ Avandu vosi va Isiraeli kutura Dani kolovega lwi ivaale kuduuka Beerisheba kolovega lwi savaalu, kandi kutura mu kivala cha Gileadi kolovega lwi vugwi vahulira umulango. Viivungikizana harara ha Mizipa.

² Aviimiliri vosi vizihiiri zia Isiraeli vaali ho mu lmuganda gwa vandu va Nyasaye, kandi vaali ho avasikari 400,000 avagendaa ku virenge.

³ Ing'inga yene yeyo, avandu va Benjamini vahulira ndi vandu va Isiraeli vandi vamali kwivungikiza ha Mizipa. Avandu va Isiraeli vateva kovooleri kuli makuva yaga gekoleka.

⁴ Mundu wi ihiiri ya Levi wu mukali weve yaali niyitiiywi yavavolera, “Inzi harara nu mukali wandaviika kwazia Gibea mukivala cha Benjamini kogona yo.

⁵ Avasaza va Gibea vaza konyenya ma ni vakumbiriza inyumba vudiku. Venya vaanziti; mu vwiyangu vwene yivwo, vonogonyia mukali wange, ma nakuza.

⁶ Ndaavugura umuviri gwigwe ningotemaganyia mu vidonye, ma ninduma ekedonye chagwo kuvuli ihiiri ya Isiraeli kuli ziveeye komi na mbiri. Avandu yava vakoli ikindu ikidamanu kandi kitaduukanaa hagati hiitu.

⁷ Munyi hano vosi muveeye vandu va Isiraeli. Kunyala kokolaki?”

⁸ Avandu vosi vasingira harara nivavoora, “Umundu woosi oveeye hano, sialilana yengo weve mba. Ave amenyi mu lihema anoho munyumba.

⁹ Yaga nigo agakuziiza kola. Kulakuba ikura kumanya avandu vamanya vazie kulwaana vandu va Gibea.

¹⁰ Ikidieli chi likomi cha vasaza mu Isiraeli valaleta ichukulia chu kutumikira mu liihi, na avandi valazia kulwaana Gibea ku lihiolo lia vamali kokora mu Isiraeli.”

¹¹ Maku avandu vosi mu Isiraeli viivungikizana harara kulwaana ilidaala zana.

¹² Izihiiri zia Isiraeli ziatuma vatumwa mu ihiiri ya Benjamini nivavoora, “Ni mahiolo ki yaga gamumali kokora?

¹³ Kalunu mukohe avandu valumindi va Gibea yavo, kuduuki kuviita kunangwa kutulizi ikivi mu Isiraeli.” Navuzwa avandu va Benjamini vachaya agavavoolerwa na vandu va Isiraeli vandi.

¹⁴ Kandi vandu va Benjamini vivungikizana ha Gibea kutura mumadala gaavo kulwaana vandu va Isiraeli vandi

¹⁵ Avandu va Benjamini vavungiza avasikari 26,000 kutura mu madaala gaavo mu lidiku liene yilio avaari ni vivavi kumeeda ku vasaza 700 avatovolwa avamenyaa mu Gibea.

¹⁶ Mu yava vosi vaatovolwa avandu mia saba avalwaaniraa imikono mimosi. Vuli mulala kuvo yaali anyala kulasa iliisu lilala numugoye nilisingiiyi vugira kulihononokiza.

¹⁷ Isiraeli ni tavaliziiyi mu ihiiri ya Benjamini, yavungiza avasikari 400,000 avukulwaana.

Uvulwani na vandu va Benjamini

¹⁸ Avandu va Isiraeli vazia havundu hukusigamira Yahova ha Bezeli, kandi nivateeva Nyasaye, “Hiiri ki idukanaa kwingilira vandu va Benjamini kutanga?” Yahova yativura, “Ihiiri ya Yuda.”

¹⁹ Kunangwa vandu va Isiraeli vatanga logendo mugamba gwalonda ku ma ni vazia kolomba hokososa ahimbi ni lidaala lia Gibea.

²⁰ Avandu va Isiraeli vazia kwingilira vandu va Benjamini mu vulwani navo valohiza vasikari vulahi mu vwiyangu vwavo vwiliihi ha Gibea.

²¹ Iliihi lia Benjamini liatura mu lidaala, kandi nivakiri kwira vaali niviiti 22,000 zia vasikari va Isiraeli.

²² Navuzwa avandu va Isiraeli vidinyia kuli lwambiri nivelohizi havundu harara heere havaali nivelohizi lidiku liukutanga.

²³ Avandu va Isiraeli vazia nivalilira Yahova kuduuka hamugorova, kandi nivamuteeva, “Gakuduukiraa kwilane muvulwani kulwaane vandu va Benjamini avaveeye avamwavo viitu?” Yahova yavavolera, “Tuli muzie kuvalwaana.”

²⁴ Maku vandu va Isiraeli visunda ahimbi ha vandu na Benjamini lidiku lia kaviri.

²⁵ Ing'inga yiyi lwa Avabenjamini vaatura Gibea kuuza kulwaana vandu va Isiraeli, Benjamini yita avandu 18,000 va Isiraeli avaari nivaavugura amigizu gu vulwani.

²⁶ Maku vandu va Isiraeli, avandu vosi, vanigira ha Bezeli niviikuuraa. Vahonga yo nivikaye imbiri wa Yahova vugira kali kulia ichukulia kuduuka hamugorova. Vahaanira Yahova kihanwa chukusambwa kandi kihanwa chi murembe.

²⁷ Avandu va Isiraeli vazia koteeva Yahova. Mu madiku yago Lisandugu lia Malago ga Nyasaye liali ha Bezeli.

²⁸ Finiasi mwana wa Eliaza waali naveeye umulindi walio. Vateva Yahova, “Gaduukanaa kunyi kutuli kuzia kulwaana avaamitu vandu vi hiiri ya Benjamini kandi, anoho koleke?” Yahova yativura navoora, “Muvalwaane. Mugamba ndamuha uvuguuti.”

²⁹ Kunangwa vandu va Isiraeli vaviika avasikari ahivisu ahimbi na Gibea.

³⁰ Kumadiku galondekanaa gavaga, avandu va Isiraeli vasulunguta kuzia mu vulwani ku na vandu va Benjamini na valohiza vasikari vaavo mu vwiyangu vuduukana kulwaana lidaala lia Gibea kuli vaakora maziambiri.

³¹ Avandu va Benjamini vaza kulwaana, navo vaatura ichova kutura mu lidaala. Kuli maziambiri, vatanga ukwita vandu va Isiraeli valala mu kiguti, kunzira izizaa Bezeli kandi kunzira izizaa Gibea. Avandu va Benjamini vita vandu va Isiraeli himbi salasini.

³² Avandu va Benjamini vavoola, “Kuvaguuti kuli maziambiri.”

³³ Navuzwa vandu va Isiraeli liirana inyima nukwivungikizana ha Balitamari, vandu va Isiraeli vaatura vwangu havaali nivivisi imadioli wa Gibea.

³⁴ Avandu 10,000 avaatovolwa kuvudukiru vwavo kutura mu Isiraeli yoosi vingilira Gibea, nu uvulwani vwali vululu ligali. Avandu va Benjamini sivamanya vaveeye ahimbi kudivizwa mba.

³⁵ Yahova yakola vandu va Isiraeli kuguuta avandu va Benjamini avandu va Isiraeli vita vandu va Benjamini 25,100 lidiku yilio,

³⁶ kandi vandu va Benjamini vamanya ndi vamali kuguutwa. Umuganda munene gwi liihi lia vandu va Isiraeli gwisuunda inyima kutura ku vandu va Benjamini kigira vaali ni lisuuvira mu vandu vaali nivivisi ahimbi ha Gibea.

Avandu va Isiraeli vaguuta

³⁷ Avandu yava vaatura havaali nivivisi nivanyagura kuzia kolovega lwa Gibea; vaasalana mu lidaala nu kwita vuli mundu.

³⁸ Umuganda munene gwi liihi lia vandu va Isiraeli harara na vandu vaali nivivisi himbi ha Gibea vaali nivaviiki ho ikimanyiru. Lwavaalora ililesi linene liu mwochi nilitura mu lidaala,

³⁹ vandu va Isiraeli vaali mu kiguti chu vulwani vatangiza iliihi. Kuduuka ing'inga yiyi, vandu va Benjamini vaali nivakiita vandu va Isiraeli salasini. Avandu va Benjamini vevoolera, “Yee, kumali kuvaguuta vuzwa kuli maziambiri.”

⁴⁰ Maku ikimanyiru chaloreka; ililesi liu mwochi liatanga koloreka kutura mu lidaala. Avandu va Benjamini viikivuka wavatuli nivagenya kolola ilidaala liosi nilihiizaa.

⁴¹ Maku avandu va Isiraeli vavagirung'ana, na vandu va Benjamini vaali nu vuti vonene ligali kigira vamanya vaali ahimbi kudivizwa.

⁴² Visunda inyima kutura ku vandu va Isiraeli kandi ni virukira mu kiguti, navuzwa sivahononoka mba. Vaanyoolerwa hagati hu muganda munene gwiliihi na vandu vaali nivaturaa mu lidaala nukudivizwa.

⁴³ Avandu va Isiraeli vagumira umusigu, kandi vugira kososa, vavakunga kuduuka ivugwi wa Gibea, nukuviita.

⁴⁴ Avasikari 18,000 avasaza vuvulwani valoli vandu va Benjamini viitwa.

⁴⁵ Avandu vandi viiruka ni vazia mukiguuti kuduuka ku Lwanda lwa Rimoni. Avandu va Benjamini izielefu zitano viitirwa kuzinzira. Avandu va Isiraeli valondelera ligali avaari nivatigaaye kuduuka ha Gidomu, nukwita avandu izielefu ziviri.

⁴⁶ Avandu va Benjamini 25,000 viitwa lidiku yilio, vosi ndio avasikari avaluviriri.

⁴⁷ Navuzwa avandu 600 vanyaliza kohononoka mukiguuti kuduuka ku Lwanda lwa Rimoni, kandi vamenya mu mieli gine.

⁴⁸ Avandu va Isiraeli viirana ku vandu va Benjamini avatigara nivaviita vosi avasaza, avakali harara na vana, kali imitugu. Vasamba amadara goosi gavanyoolaa.