Vakalagi 2 - KITABU KITAKATIFU

Engelosi wa Yahova ha Bokimu

¹ Engelosi wa Yahova yatura Giligali kuzia Bokimu, kandi navolera avandu va Isiraeli: “Ndaamutuliza Egebeti nimuleeta mukivala chandaalagira avababa vinyu. Ndavoora, sindivunanyia lilagana liange ni munyi mba.

² Kandi mutakalombe lilagana lindi na vandu vamenya mukivala chene yiki mba. Kuduuka mulasambula nukwononyia uvwali vwavo. Navuzwa simwahulira amalago gange mba. Nikindiki cha mukoli yiki?

³ Kunangwa mboraa ndi, sindavakunga kutura imbiri winyu mba, navuzwa ndavalomba vagwi avasigu vinyu, na vanyasaye vaavo valava mitego ku munyi.”

⁴ Lwe engelosi wa Yahova yaali niyakavoola yaga, avandu vosi va Isiraeli vatanga kulira.

⁵ Maku valanga havundu hene yaho Bokimu, na vahaanira hazana vihaanwa ku Yahova.

Likuza lia Joshua

⁶ Lwa Joshua yaali niyakalekana navo, vuli mundu wa Isiraeli yazia kuvugura kidieli chu mulimi gwa yaali ni yahevwa.

⁷ Ku ing'inga yoosi ya Joshua yaali mwoyo, avandu va Isiraeli vaatumikira Yahova; kandi lwa yaali niyakakuza vazizagilira kokora ndio lwa vanene vaali nivakiri mwoyo, avaari nivalora ivindu vinene via Yahova yaali namali kokolera Isiraeli.

⁸ Joshua umwana wa Nuni, umutumikiri wa Yahova yakuza naveeye ni mihiga miamoja ni likomi.

⁹ Vaamuyavira mu mulimi gwigwe ha Timunazi Sera, mu kivala chivigulu cha Efuraimu kolovega lwi ivaale wi kiguru cha Gaashi.

¹⁰ Likula liene yili liosi liakuza, kandi likula lialonda ku liivilira Yahova harara na gayaali niyaakolera Isiraeli.

Vandu va Isiraeli valekera kusigamira Yahova

¹¹ Maku vandu va isiraeli vaakora vwoni imbiri wa Yahova, nivatanga kusigamira vanyasaye va Baali;

¹² valeka kusigamira Yahova Nyasaye wa vaguuga vaavo, uwaali niyavaleeta kutura mu kivala cha Egebeti; vatanga kusigamira vanyasaye va vandu vaali ahimbi kuvo. Vaavinamira ni vakora Yahova kuva nu vutima.

¹³ Valeka kusigamira Yahova, nivatanga litumikira vanyasaye Vabali na Ashitarozi.

¹⁴ Kunangwa Yahova yaali nu vutima ovonene ligali ku Isiraeli, na yavahana mu makono ga vanuuri avavanuula. Yaleka avasigu vaavo vosi ahimbi navo kuvavita ni zinguru, na ndio vandu va Isiraeli vadaka kuli vanyara kwikinga aveene.

¹⁵ Vuli ing'inga lwavaziizaa muvulwani, Yahova yaavehoneraa ligali, vuzwa kuli yaali niyavavoolera. Vaali nu vudinyu vunyingi.

¹⁶ Ma Yahova yahaana aviimiliri ku Avaisiraeli avavakingaa kutura ku yavo avadamanu.

¹⁷ Navuzwa vandu va Isiraeli sivahulira vakalagi vaavo mba. Sivali vasuuvirifu ku Yahova mba navuzwa vaasigamira vanyasaye vandi. Avaguuga vaavo valonda amalago ga yahova, navuzwa ilikula lihia liivilira kolola ndio.

¹⁸ Vuli ing'inga lwa yahova yahaana vakalagi ku vandu va Isiraeli, yakonya vakalagi yava vave nivo avahonyia vandu kutura ku vasigu vaavo madiku goosi gavalange vakalagi; kigira Yahova yalange ni zimbavasi kuvo lwavanyoolaa uvusaliru ni lidambizwa kutura ku vasigu vaavo.

¹⁹ Navuzwa lwu mukalagi yalange niyakakuza, vandu va Isiraeli viirana muzinzira ziavo ziukusigamira vanyasaye vandi kali kuvita lwambiri. Vaali vanyara kusigamira vanyasaye vandi mavasuura koleka izinzira ziavo zindamanu.

²⁰ Kunangwa Yahova yaali nu vutima ovonene na vandu va Isiraeli, nokovoora, “Avandu yava imali kuvunanyia lilagana liange lia ndaalaga vaguuga vaavo. Kigira vavuli kumbulira aga Inzi,

²¹ sindavakungila izihiiri zikiri mu kivala kinu lwa Joshua yakuza mba.

²² Ndatumikira zihiiri ziene yizi kwenyeleriza nukumanya niiva vandu va Isiraeli yava valonda zinzira ziange kuli avaguuga vaavo vaakora.”

²³ Kunangwa Yahova yaleka zihiiri yizio zitigale mu kivala yicho na siyavugilira Joshua kuziguuta mba; kandi siyakuunga avandu zana vwangu lwa Joshua yakuza mba.