Vakalagi 19 - KITABU KITAKATIFU

Mundu wi hiiri ya Levi nu Mukali Muviika

¹ Mu madiku yago lwa Isiraeli yaali nitaveeye nu mwami, yaali ho nu mundu kutura mu ihiiri ya Levi uwamenyaa mu kivala chivigulu cha Efuraimu. Yavugula umukana kutura Bezelehemu yi Vuyuda kuva umukali weve muviika kwivikira weve.

² Navuzwa umukali uyu yasinyikira umusaza uyu, na yamuleka niyiirana ku baba weve mu Bezelehemu, kandi namenya yo imieli jine.

³ Maku umusaza uyu yamanya natura nalonderera mbula alamugonya yirane komenya naye. Yavugula umutumikiri weve ni zibarasi ziviri. Umukali zana yamuhira munyumba ya baba weve, na baba weve lwa yalora umundu uyu, yaamwingiriza nu vuyanzi vunyingi.

⁴ Baba wu mukali yamugoonya atange komenya yo, na yavugilira kuva yo ku madiku gavaga. Valia, nivanwa kandi nivagona yo.

⁵ Mugamba gwi lidiku lia kane, vavuuka kale nivetegeka kutanga logendo. Navuzwa baba wu mukali uyu yavolera mundu wi ihiiri ya Levi, “Tanga ulindi onyoore ichukulia. Ulanyora zinguru ma uzie.”

⁶ Avasaza vaviri yava viikara nivalia kandi nivanwa harara. Maku baba wu mukali yamuvolera, “Mwaza gona hano ma ove nuvuyanzi.”

⁷ Mundu wi hiiri ya Levi yasingira atuli, navuzwa baba wu mukali yamugoonya agone yo uvudiku vundi.

⁸ Mugambazuri ku lidiku lia katano, umusaza zana yaatanga logendo na baba wu mukaana yavoola, “Mwaza lia kindu. Tanga ulindi kuduuka mbasu.” Ku avasaza vaviri yava valia harara.

⁹ Lwu mundu uyu harara nu mukali weve, uyu nu mutumikiri weve vaatura kuzia, baba wu mukaana yamuvoola, “Henza umugolova guduuki. Gona hano uvudiku vwa kalunu vudiku vuduuki; gona hano uvuki kuva mu vusangali. Mugamba unyala kuvuuka ni vukikiri kale ma utange ologendo lwu kuzia yengo.”

¹⁰ Navuzwa umusaza uyu yasura kogona yo ma navugura umukali, izibarasi ziviri harara nu mutumikiri weve, natanga logendo kandi yaduuka havundu kolovega Lundi lwa Jebusi.

¹¹ Vwali ni vwachira lwa vaduuka ahimbi Jebusi, nu umutumikiri yavolera mundu uyu, “Mwaza, hamba kwevete mu lidaala lia vandu va Jebusi yili kogone mu.”

¹² Mutumikiri weve yamuvolera, “Sikunyala kweveta mu lidaala litaveeye lia vandu va Isiraeli mba; navuzwa kulavita makuzie mu lidaala lia Gibea.”

¹³ Maku yavolera umutumikiri weve, “Hamba kwisundi ahimbi ni lidaala lia Gibea anoho Rama, makogone yo.”

¹⁴ Vavita Jebusi kandi nivaziizagilira no logendo lwavo. Iliuva liali niliyeraa lwavaduuka mu lidaala lia Gibea mu kivala chi ihiiri ya Benjamini.

¹⁵ Veeveta nivingira kuzia kogona mu. Viingira mu lidaala ma nivikara aha vandu vosi, vaavitilanga, navuzwa kali sihaali ho nu mundu kali mulala uwavagenihiza munyumba yeeye kogona mba.

¹⁶ Lwa vaali nivaveeye ahene yaho, umusakulu yaavitira ho nivinukaa kutura mu mulimi. Yaali umundu wamenyaa Gibea, navuzwa yengo weve wukutanga yaali mu kivala chivigulu cha Efuraimu. Avandu vandi vosi ahene yaaho vaali avihiiri ya Benjamini.

¹⁷ Lwu musakulu uyu yahenza, yalora umundu wokologendo niyikaye ahene yaho, na yamuteeva, “Muturaa hai?”

¹⁸ Mundu uyu yamuvolera, “Kutura Bezelehemu yi Vuyuda, na kalunu kuziiza yengo, mugati mwe kivala chi vigulu cha Efuraimu. Avula ho umundu ukuvuguyi kogona munyumba yeeye.

¹⁹ Koveeye nu vunyasi niviukulia vie zibarasi zietu. Kandi mbeeye ni waini ni chukulia chu mukaana mutugwa woovo harara nu mutumikiri wange. Koveeye na vuli kindu cha kwenyaa.”

²⁰ Umusakulu zana yavoola, “Mugenihiziywi hango hange! Ndamulinda; simunyala kogona kuluhia mba.”

²¹ Kunangwa yavavugula naavahira yengo weve, kandi nalihiiza zibarasi ziavo. Avageni veve visavaa ivilenge viavo kandi nivalia ichukulia.

²² Lwa vaali nivisangaliza, nonoho avasaza vi kifavi cho voheyi kutura mu lidaala vakumbiriza inyumba yeyo ma nivatanga kuduyu muliango. Vavoolera umusakulu, “Tuliza umundu musaza wingiyi munyumba yooyo kuduuki kogona naye.”

²³ Navuzwa umusakulu yazia ichova navavoolera, “Awa valina vange! Mwaza! Mutakola kindu kidamanu kuli yiki mba. Kigira musaza uyu nu mugeni wange, mutakoli kuye kindu kuli yiki mba.

²⁴ Heenzi mulole mbeeye nu mukaana wange umugima harara nu mukali muviika wu musaza uyu. Leka mbaleete ichova. Koli choosi chamwenyaa navo. Navuzwa mutakoli kindu kitaduukanaa yiki ku musaza uyu mba!”

²⁵ Navuzwa avandu yava sivenya kuhulira agu umusakulu uyu mba. Umusaza uyu yamanya nalasa ichova umukali weve na vandu yava vamuvugura. Avandu yava vamwonogonyia nukumukolera goosi amadamanu uvudiku vwosi kuduuka ni vucha, ma mu mavwevwe vamuleka nazia.

²⁶ Mugamba kale, umukali uyu yaza naagwa hamuliango gwu musakulu zana. Yaali nakikiri ho lwu umbasu gwaavala.

²⁷ Umusaza weve yavuka umugamba yigwo, na lwa yigula umuliango niyenyaa kuzizagilira no logendo lwilwe, yanyoora umukali muviika uyu naagwiyi imbiri winyumba na makono geege nigadiiyi ku muliango.

²⁸ Yamuvolera, “Singira. Hamba kutange logendo.” Navuzwa mukali uyu siyativula kindu. Yavugula mukali uyu namuviika ku barasi yeeye natanga logondo kuzia yengo weve.

²⁹ Lwa yaduuka yengo, yingira munyumba navugura umuvano. Yavugula mukali uyu namutemaganyia mu vidonye kominambiri. Yaahira vuli kedonye ku vuli ihiiri ya Isiraeli.

³⁰ Vuli mundu walolaa ividonye yivi yavoola, “Ikindu kuli yiki kikiri kuhulirika anoho kokoleka ku kutura vandu va Isiraeli nivatura Egebeti! Kuduuka kokole ku ikindu kigira amang'ana yaga! Kunyala kokora ki?”