Vakalagi 18 - KITABU KITAKATIFU

Mika harara ni hiiri ya Dani

¹ Mu madiku yago umwami siyaali mu Isiraeli mba. Ihiiri ya Dani yenya imiandu ji milimi jaavo aveene kigira sivali nivanyoora ku umulimi gwosi hagati ha vandu va Isiraeli mba.

² Kunangwa vandu va Dani vaatovora avandu vatano avaluviriri kutura mu zinyumba ziosi zie hiiri ma nivavatuma kutura mu madaala ga Zora na Eshitaoli na malago kuzia kutunyiriza ikivala. Avandu yava vosi vaatura mu vuli ihiiri. Lwa vaduuka mu kivala chivigulu cha Efuraimu, vamenya munyumba ya Mika.

³ Lwa vaali munyumba yiyi, vamanyiriza ilitivura lia makuva gu muyaayi kutura mu ihiiri ya Levi yamoloma, na vazia kuye nivamuteeva, “Okolaa ki hano? Nivwaha uwakoleta hano?”

⁴ Yativura navavoolera, “Mbeeye nu mupango ni lilohiza na Mika undungaa kumutumikira kuli umusaalisi weve.”

⁵ Vamuvolera, “Mwaza teeva Nyasaye niiva kulagenda vulahi kologendo lwiitu.”

⁶ Umusaalisi yativura navoora, “Mutahendi mioyo jinyu mba; Yahova alamulinda ko logendo lwinyu.”

⁷ Kunangwa avandu vatano yava vaatura ni vazia mu lidaala lia Laishi. Valora kuli avandu uwene yeyo vaali nivamenyi mu mirembe kuli vandu va Sidoni. Vaali avandu vu murembe kandi avachiling'anu, vugira ililembana hagati haavo; vaali nivindu viosi viavenyaa. Vamenya ihale kutura ku vandu va Sidoni, na sivali ku nuvuhambani vwosi na vandu vandi mba.

⁸ Lwa vandu vatano yava viirana Zora na Eshitaoli, avandu vaali nivatigaye yengo vavateeva agavaali nivanyooye wavaziza.

⁹ Vavativulira nivavoora, “Hambi kuzie kulwaana kivala cha Laishi. Kumali kolola ikivala, kandi keveeye ligali kigunamu. Mutikala vuzwa hano mba; koli vwangu! Tuli muzie kuvugura mu kivala yicho.

¹⁰ Lwa muduuka yo, mulanyola avandu ndi zana sivahendaa mwoyo kigira ikindu choosi mba. Keveeye ikivala ekenene ligali; kandi keveeye na vuli kindu chu umundu anyala kwenya ave nacho, na Nyasaye umali kukihaana ku munyi.”

¹¹ Maku vandu miasita kutura mu ihiiri ya Dani nivaveeye niviugi vaatura Zora na Eshitaoli, vetegeka kulwaana.

¹² Vazia nivamenya hokososa imadioli wa Kiriazi-Jearimu mu kivala chi Ivuyuda. Yiki nicho kigira havundu hene yaaha nihalangwa Hokososa ha Dani kuduuka kalunu.

¹³ Vazizagilira nivaduuka munyumba ya Mika mu kivala chi vigulu cha Efuraimu.

¹⁴ Maku avandu vatano avaari nivazia kutunyiriza kivala ichakumbiriza Laishi vavoolera avalina vaavo, “Mwamanya munyumba ndala ku ziveeye hano yizi kifananyi chavazwa ku musaala nacho chavakwa ifeza? Harara ni Kisibao kindi koveeye mu. Muganaganaa gakuduukiraa kokole ki?”

¹⁵ Kunangwa viingira muinyumba ya Mika nu muyaayi wi hiiri ya Levi yamenya nivamuteeva kuli azizagiliraa.

¹⁶ Ulwene yilwo avandu vi liihi kutura mu ihiiri ya Dani vaali nivasingiyi mu kirivwa nivetegeki kulwaana.

¹⁷ Avatunyirizi vatano yava viingira munyumba nivavugura kifananyi chifeza harara ni kisibao lwu umusaalisi yaali ha kirivwa na vasikari miasita vu vulwani.

¹⁸ Lwa vandu yava viingira munyumba ya Mika nivavugura kifananyi, kisibao harara ni viju vindi viukusigamira, umusaalisi yavateva, “Mukoraa ki?”

¹⁹ Vamuvolera, “Chiring'ana, utavoola kindu mba. Hamba kuzie nivi ove umusaalisi kandi umukonyi wiitu. Nivulahi ivi ove umusaalisi wi hiiri ndala ya vandu va Isiraeli kuvita kuva umusaalisi wu mundu mulala.”

²⁰ Yaga gakoraa umusaalisi kuva nu vuyanzi ligali, maku yavugula vifananyi nalonda avandu va Dani.

²¹ Vatanga ologendo, ma nivaviika avana vaavo ni mitugu harara ni vindu viavo viosi imbiri.

²² Lwa vaali nivakagenda logendo lutambi kutura kunyumba ya Mika, Mika yalanga avatende veve ni vavalondelera. Vavanyoola nukuvahanzukira.

²³ Avandu kutura Dani vagirung'ana nokoteeva Mika, “Ni mang'ana ki? Kigira ki okolondeleraa ni numuganda munene kuli yigu?”

²⁴ Mika yativura navoora, “Muvuguyi vanyasaye va ndalomba, kandi umusaalisi wange ma mutangi logendo! Sindigaye ku ni choosi mba.”

²⁵ Avandu va Dani vamuvolera, “Vwakaveeye vulahi niiva siulavoola kindu choosi mba; nigataveeye ndio, avandu yava valava nu vutima na valakulwaana. Ivi harara na vandu vinyumba yooyo mulakuza.”

²⁶ Avandu va Dani vazizagilira no logendo lwavo. Mika lwayaalola vaveeye vandu vizingulu kumuvita, yamanya niyiirana yengo.

²⁷ Maku vaavugura ivindu via Mika yalomba harara nu musaalisi weve ni vazia kuduuka mu kivala cha Laishi kulwaana avandu vaali nivamenyi wene yeyo mu mirembe. Vavingilira ni kivavi nukusamba ilidaala liavo.

²⁸ Sivali nu mundu waali anyala kuvasoora mba, kigira vamenya ihale kutura mu kivala cha Sidoni kandi sivali ku nu vwiko na vandu vandi vosi mba. Lidaala yili liali mu livona ahimbi Bezirehobu. Avandu vihiiri ya Dani vumbaka ilidaala yilio vuhia, nivamenya mulio.

²⁹ Vaagirung'anyia ilieta lia Laishi nivalilanga Dani, iliali lia guuga wavo Dani uwaali umwana wa Yakobo.

³⁰ Avandu vihiiri ya Dani velombera vifananyi viukusigamira ha Janazani, umwana wa Gerishomu uwaali umwisukulu wa Musa, yatumika kuli umusaalisi ku avandu va Dani kandi ivisukulurwi vivie viatumika kuli avasaalisi vaavo kuduuka lwa vaahirwa mu vuhambi mukivala ekegeni.

³¹ Vazizagilira kutumikira vifananyi via Mika yaali niyalomba ku ing'inga yoosi yi Lihema liu kusigamira mu Nyasaye liali ha Shilo.