Vakalagi 17 - KITABU KITAKATIFU

Vifananyi via Mika

¹ Haali ho nu mundu walangwa Mika uwamenyaa mu kivala chi vigulu cha Efuraimu.

² Yavolera mama weve, “Lwu mundu yiva ividonye viefeza elefu ndala na miamoja kutura kuivi, walaama umwivi zana. Inzi mwene ndaahulira nulaamaa. Kalunu mbeeye na mabese zana yago. Ni inzi waali nindazivugura.” Mama weve yavoola, “Yahova akugasizi muyaayi wange!”

³ Yiranyia amabese zana ku mama weve, na mama weve yavoola, “Kwigalira ikilaamo kivuli kolonda muyaayi wange, kuduuka Inzi mwene mbane amabese yaga ku Yahova. Na galatumika kolomba kifananyi chukuvazwa ni chavakwa ifeza. Kalunu ndakwiranyira vidonye vie ifeza yeyo.”

⁴ Lwa yiranyira mama weve amabese, mama weve yavugula vidonye mia mbiri vie ifeza, nahaana ku muturi wi vivia naye nalomba kifananyi chukuvazwa ni kivakwa ifeza. Kifananyi zana chaviikwa mu nyumba ya Mika.

⁵ Mika yaali na havundu hehe hayazizaa kusigamira vifananyi. Yalomba vifananyi viukusigamira kandi kisifao kumuvolera aganyala kwekoleka mu madiku gimbiri, ma natovora mulala ku vayaayi veve kuva umusaalisi weve.

⁶ Madiku gene yago, vandu va Isiraeli sivali nu mwami mba; vuli mundu yakola goosi agaamuyaanzizaa.

⁷ Ing'inga yene yeyo muyaayi kutura mu ihiiri ya Levi yaali niyamenya mu lidaala lia Bezelehemu mu kivala che Vuyuda.

⁸ Yatura Bezelehemu kwenya havundu handi hokomenya. Lwa yaali naveeye kologendo yaduuka mu nyumba ya Mika mu kivala chi vigulu cha Efuraimu.

⁹ Mika yamuteeva, “Uturaa hayi?” Yamutivulira navoora, “Inzi nu mundu wi ihiiri ya Levi kutura Bezelehemu yi Vuyuda. Mbenza hanyala komenya.”

¹⁰ Mika yamuvolera, “Menya hano harara ninzi. Ulava ku Inzi kuli umukonyi kandi umusaalisi. Ndakuha ividonye viefeza likomi vuli muhiga komeeda ku zinguvu, harara ni chukulia.”

¹¹ Muyaayi uyu yaavugilira komenya na Mika. Mika yaali ku Mika kuli mulala ku avayaayi veve.

¹² Mika yamutovola kuva umusaalisi weve, naye yamenya hango ha Mika.

¹³ Mika yavoola, “Kigira kalunu mbeeye nu mundu kutura mu ihiiri ya Levi kuli umusaalisi wange, manyi vuzwa Yahova alangasiza.”