Vakalagi 15 - KITABU KITAKATIFU

Livaanza lia Samusoni ku vandu va Filisitia

¹ Ing'inga niyaakavita, mu madiku gukuvuna ingano, Samusoni yazia kuluuta umukali weve nekememe chi imburi. Nayavoolera baba wu mukali weeve, “Leka nzingili ivuliri wu mukali wange.” Navuzwa baba wu mukali uyu siyamuvugilira mba.

² Baba wu mukali yamuvolera, “Inzi ndaaganaganyia ndi ivi wamusinyikira ligali; ku ndaamanya nimuhaana ku musingiliri woovo. Kali ndio, amwavo weve muke aveeye niligondo lilahi kuvita. Yaanza umuvuguli muvogono vwu mukaana munene.”

³ Samusoni yavoola, “Ing'inga yinu sindavalizilwa mu goosi aganzizaa kokora ku vandu va Filisitia mba!”

⁴ Maku yatura nazia kugumira ivivwi 300. Yahambanyia imikira je vivwi viviri viviri najivoha harara ma najihambiza muliru.

⁵ Maku yahambiza umuliru ku mikira manavilakura kuzia mu milimi jingano ya vandu va Filisitia. Munzira yiyi, yasamba ingano iyaali ni yaageswa ni yindi yaali nikikiri kogeswa, harara ni milimi ja Mizeituni.

⁶ Hene yaho vandu va Filisitia vateva, “Nivwaha umali kokora yaga goosi?” Navavoola, “Ni Samusoni, kigira baba wu mukaana weve kutura Timuna yavugula umukali weve wa yaaserera, ma namuhaana ku mulina wamusingilira mu keserero.” Vandu va Filisitia vaatura ni vazia nivasamba umukali uyu harara na baba weve.

⁷ Kandi Samusoni yavavolera, “Niiva nindio mukoraa, kuduuka ndungizi kisaalia kumunyi, ndakamala kokora ndio, ndazia.”

⁸ Yavingilira ni zinguru ziosi, niyiita vandu avanyingi. Maku yamanya nazia komenya muluhangaywa lwulwanda lwa Etamu.

Samusoni Yaguuta vandu va Filisitia

⁹ Avandu va Filisitia valomba hokososa mu Yuda, nivalwana ilidaala lia Lehi.

¹⁰ Avandu va Yuda vavateeva, “Kigira ki mukulwaana?” Vavativulira, “Kuuzi kugumira Samusoni kuduuki kumukora aga oyo yakokolera.”

¹¹ Avandu 3,000 va Yuda vazia mu luhangaywa mu lwanda ha Etamu, vavoolera Samusoni, “Siwamanya vandu va Filisitia vaveeye avamihi viitu? Kigira ki okokoleeye ndi?” Na Samusoni yavativulira navoora, “Mbakoleeye vuzwa agayavo vangoleeye.”

¹² Vamuvolera, “Kuuzi hano kuduuki kukugumila.” Na Samusoni yavavolera, “Munzisuhili ndi munyi aveene simulanzita mba.”

¹³ “Gaveeye malahi,” vavoola “Kulakovoha vuzwa, na kukuhiri ku vandu va Filisitia vene yavo. Sikulakwita kunyi aveene mba.” Kunangwa vamuvugura, nivamuvoha ni migoye imihia giviri, nu kumutuliza mu luhangaywa lwu lwanda.

¹⁴ Lwa yaduuka ha Lehi, vandu va Filisitia vaza wayaali nivanyagura, nivamuhanzukila. Nonoho yanyoora izingulu zia Yahova, na yakalanyia imigiye javaali nivavoheye amakono geege, nijifanaa kuli uluvusi lusambiywi mu muliru.

¹⁵ Maku yanyoora ikigumba chu lusaya chibunda iyaali nikuzi. Yinama hasi nakedola, na yita avandu 1,000 nacho.

¹⁶ Samusoni yimba: “Ndiita avandu elefu ndala, ni kigumba chu lusaya lwi bunda; kigumba chu lusaya lwi bunda Inzi ndaavavungiza mu vitumi.”

¹⁷ Lwinyima yasiuva ikigumba chu lusaya zana. Havundu hamakuva yaga gekolekeraa, halangwa Ramazi Lehi.

¹⁸ Maku yamanya naahulira uvuluhu uvunyingi, na yalanga Yahova navoora, “Ivi wamba iliguuta linene yili; Gaduukanaa nguzi kigira uvuluhu kandi ngumilwi na vandu va Filisitia yava, avatamanyi Ivi?”

¹⁹ Maku Nyasaye yafudula iliriina mwilova ha Lehi, kandi amazi gaturaa mu. Samusoni yaanwa amazi ma natanga kuhulira vulahi. Ikisinuchi zana yicho chalangwa Hakore. Ikisinukiru zana yiki kikiri ha Lehi kuduuka kalunu.

²⁰ Samusoni yamiha ihiiri ya Isiraeli ku mihiga sirini lwa vandu va Filisitia vamiihanga ikivala yicho choosi.