Vakalagi 14 - KITABU KITAKATIFU

Samusoni nu Mukaana kutura Timuna

¹ Lidiku lilala Samusoni yasulunguta kuzia mu lidaala lia Timuna nalora yo umukana Mufilisitia.

² Samusoni yirana yengo navolera baba weve na mama weve, “Mali kolola umukana Mufilisitia kutura Timuna wanyaanziziywi naye. Muturi muzie kondetera. Nyenya muvuguli ave mukali wange.”

³ Navuzwa baba weve na mama weve vamuteeva, “Kigira ki wenyaa koleta umukali kutura mu vandu va Filisitia avatamanyi Nyasaye? Siunyala konyoora umukana kutura munyumba yitu yene anoho hagati ha vandu viitu vosi?” Samusoni yavolera baba weve, “Zia ondetere kigira yaakumala kunyaanziza.”

⁴ Nitali baba weve na mama weve sivamanya ni Yahova wakola yaga mba, kigira Yahova yenya uvwiyangu vwukulwaana vandu va Filisitia. Ing'inga yeyo vandu va Filisitia vaali nivamihaa Isiraeli.

⁵ Kunangwa Samusoni yasulunguta mu Timuna harara na baba weve na mama weve. Lwavaali nivavitira mu vizabibu uwene yeyo, Samusoni yahulira umwana wi simba nafuumaa.

⁶ Nonoho, Samusoni yahulira zinguru zia Yahova ni zimwizuuyi, na yatandulanyia isimba zana yeyo mu vidonye kuli umundu anyala kutandulanyia kememe chimbuli, kali niiva siyaali nichugi mu mukono gwigwe. Navuzwa siyavolera aviivuli veve chayaali naakori mba.

⁷ Maku yazia komoloma ku mukaana, na yayaanziza Samusoni ligali.

⁸ Amadiku nigakavita makekeeke, Samusoni yirana yo koleta umukana uyu. Lwa yaali kunzira yeveta hayaleka isimba yayaali ni yiiti. Yegosa konyoora ikisaganyi chi zinzuki harara nu vwuki munyama zana.

⁹ Yavugula uvwuki mu makono geege nagenda nalia. Yaahilira ku baba weve na mama weve. Valia ku, navuzwa Samusoni siyavavoolera ndi avutulizi mu isimba yakuza mba.

¹⁰ Baba weve yingira hango hanga mukaana. Samusoni yalomba iliilia linene kigira nindio avasoleri vakora amadiku gene yago.

¹¹ Ulwa vandu valora yaga vaamuletera avalina salasini vave nivagunzaa naye.

¹² Samusoni yavavolera, “Nyenya muvoolere ulugano; niiva munyala kombolera nu kunzivaalira ulugano yilu mu madiku saba agiliilia yili, ndahaana ku vuli mulala winyu vidonye salasini vie zinguvu.

¹³ Navuzwa nimutambolera nu kunzivaalira mu madiku saba agiliilia yili, ku nimunyi mumanye mumbe izisuuka salasini ni zinguvu salasini.” Maku vamuvolera, “Kovolere ulugano lulwo. Kwenya kuluhuliri.”

¹⁴ Maku yavavolera “Ichukulia chatura mu uyu uliizaa; ni ikindu ekenoru chatura muye.” Amadiku gavaga gaavita nivakikiri kuhaana amativuli gu lugano.

¹⁵ Lidiku liakora gane vavoolera mukali wa Samusoni, “Ogonye musaza woovo aduuki kukuvuulira cha uvubara aduuki kukuvuulira cha ulugano lovoolaa; nigataveeye ndio kulakusamba nu muliru, ivi harara ninyumba ya baba woovo. Ivi nu musaza woovo mukogenihizi kunangwa muduuki kukunyaga viakoveeye navio. Sigaveeye ndio?”

¹⁶ Mukali wa Samusoni yazia kuye nalira, navoora, “Ivi siwainyanza mba! Waisura! Oteevi avalina vange ulugano na siomboleye ku amativuli galwo mba!” Samusoni yavoola, “Henza, kali ngikiri kovoolera ku baba wange na mama wange mba. Kigira ki ngovolere?”

¹⁷ Mukali wa Samusoni yalira kumadiku saba goosi agiliilia. Navuzwa ku lidiku lia saba Samusoni yamuvolera amativuli gulugano zana, kigira yamuniga kuvita kegero. Umukali uyu yavolera vandu va Filisitia.

¹⁸ Lidiku lia Saba, Samusoni nakikiri kwingira ivuliri, avasaza vi lidaala yilio vamuteeva, “Ni kindiki ekeveeye ekenoru kuvita uvwuki? Kandi ni kindiki ekeveeye ni zinguru kuvita isimba?” Samusoni yavativulira navoora, “Mulavula kulimira eng'ombe yange erori yange, simwali mulanyala kwivaala ulugano lwange mba.”

¹⁹ Nonoho izingulu zia Yahova ziamwizula nasulungutaa mu Ashikeloni, niyiita avasaza salasini, navatuliza izinguvu ziavo, nazihaana ku vasaza vaativura ulugano. Agene yaga nigakavita, yirana yengo wa baba weve naasinyiki ligali.

²⁰ Umukali uyu yahaanwa ku uyu uwaali umulina wasingilira Samusoni mu keserero.