Vakalagi 13 - KITABU KITAKATIFU

Liivulwa lia Samusoni

¹ Avandu va Isiraeli vaakora vwoni imbiri wa Yahova, na Yahova yaleka vandu va Filisitia kuvamiiha ku mihiga arubaini.

² Ing'inga yeyo, umundu yaali ho uwalangwa Manoa kutura mu lidaala lia Zora wihiiri ya Dani. Umukali weve yaali nakikiri kwivura ku umwana.

³ Engelosi wa Yahova yaloleka ku mukali uyu namuvolera, “Ukikiri kwivura ku avana, navuzwa vwangu, ulaheliza na ulivuula umwana umuyaayi.

⁴ Wilindi na utanwa iwaini anoho amalwa, anoho kulia ichukulia chagaywa mba;

⁵ Lwu umuyaayi woovo ava niyakivulwa, utakavege iliisu lilie mba kigira kutura lidiku lialakivulwi, alakavikwi halovega kutumikira Nyasaye kuli Munaziriti. Alakatange imiyinzi jo kohonyia vandu va Isiraeli kutura ku vandu va Filisitia.”

⁶ Maku umukali uyu yazia navolera umusaza weve, “Umundu wa Nyasaye yaazi kuinzi, na yaali wukutihiza ligali, naaloleka kuli engelosi wa Nyasaye. Inzi simuteevi watuli mba, naye siamboleye ilieta lilie mba.

⁷ Navuzwa amboleeye ndi ndaheriza nukwiivura umwana muyaayi. Amboleeye mburi kunwa iwaini anoho amalwa kandi mburi kulia ichukulia chagaywa, kigira umwana zana alaviikwa halovega mu vutumiki vwa Nyasaye kuli Munaziriti kutura munda kuduuka lidiku lialikuza.”

⁸ Manoa yasaala ku Yahova, navoora, “O, Yahova vugilira umundu wa Nyasaye wautumi yaaze kandi kukunyi aduuki ku kovoolera cha kulakakole lwu umwana muyayi alivulwa.”

⁹ Nyasaye yakola aga Manoa yaali nateevi, na engelosi yirana ku mukali lwa yaali niyikaye mu kiguti, navuzwa Manoa umusaza weve siyaali ho mba.

¹⁰ Umukali uyu yanyagura vwangu navolera umusaza weve, “Umundu waza ku hano lidiku lindi ololeki ku inzi kandi.”

¹¹ Manoa yasingira nalonda mukali weve, na yaduuka ku mundu zana namuvolera, “Ivi nu umundu waamolomi ku mukali uyu?” Umundu zana yavoola, “Yee ninzi.”

¹² Manoa yavoola, “Lwa makuva googo galiloleka kuva giligali, umuyaayi zana aliva wa luganoki mulimenya lilie, na gamuduukira akole ki?”

¹³ Engelosi wa Yahova yavoola, “Umukali woovo kuduuka akole aga inzi muvooleye goosi.

¹⁴ Siaduukanaa kulia kindu choosi kitulaa ku muzabibu; kandi atanwa iwaini, anoho amalwa, anoho ikindu choosi chagaywa mba. Gaduukanaa akole goosi agaamali kumuvolera.”

¹⁵ Manoa siyamanya ni Engelosi wa Yahova mba, nayamuvoolera, “Mwaza utazia ulwene yilu mba. Linda kokodekere ekememe chimbuli.”

¹⁶ Navuzwa Engelosi yavolera Manoa, “Niiva ndaguunza, sindalia ichukulia chiinyu mba. Na niiva wenyaa kokelomba, mulakisamba kuli kihanwa chu kusambwa ku Yahova.”

¹⁷ Manoa yamanya nateeva Engelosi, “Lieta liilio ni vwaha, kuhaana uluyali ku ivi makuva yaga galakekoleke?”

¹⁸ Engelosi wa Yahova yamuvolera, “Kigira ki oteeva kumanya lieta liange? Ni lieta liokogenyia.”

¹⁹ Manoa yavugula ekememe chimbuli harara ni kihanwa chu vuswage na haanira ku vwali vwu lwanda ku Yahova okolaa gokogenyia.

²⁰ Lwolomemo lwali nilwaakaa nilunzia mwigulu, engelosi wa Yahova yaazira mu lomemo lwu vwali zana; Lwa Manoa nu mukali weve vagelora vaagwa hasi mamumama.

²¹ Engelosi wa Yahova siyaaloleka ku Manoa nu mukali weve kandi mba. Maku Manoa yamanya ndi ololi engelosi wa Yahova.

²² Manoa yavolera umukali weve, “Ligali kuziiza kukuza kigira kumali kolola Nyasaye!”

²³ Navuzwa mukali yativulira Manoa namuvolera, “Niiva Yahova yenyangi akwiti, siyaali anyala kuvugilira ivihaanwa vietu mba; kandi siyaali unyala kukumanyia ivindu yivi viosi mba, anoho akovolere ivindu kuli yivi viosi ku ing'inga yiyi mba.”

²⁴ Maku umukali weve yivula umwana umuyaayi naamulaga Samusoni; nu umwana yaaviluka, kandi Yahova yamugasiza.

²⁵ Kandi zinguru zia Yahova ziatanga kuyinzira muye nu lwa yaali hagati ha Zora na Eshitaoli hokososa ha Dani.