Vakalagi 12 - KITABU KITAKATIFU

Jefuza na vandu va Efuraimu

¹ Avandu va Efuraimu vetegekera uvulwani; vaambuka Mugera gwa Jorodani ni vazia Zafoni nivavolera Jefuza, “Kigira ki waasila ulwako nuzia kulwaana vandu va Amoni vugira kukulanga kuzia nivi? Kulakusambira munyumba!”

² Navuzwa Jefuza yavavolera, “Inzi harara na vandu vange kwalembana na vandu va Amoni. Ndaamulanga, navuzwa simwambavina mba.

³ Lwa ndaalora nichakavula, ndamanya ninzidinyia, nisiila ulwako, ninzia kuvalwaana; na Yahova yangoonya nimbaguuta. Kigira ki mwenya kunwaana kalunu?”

⁴ Maku Jefuza yalanga avandu vosi va Gileadi navaviika harara, ma nalwaana avandu va Efuraimu nu kuvaguuta, kigira vavoola, “Munyi vandu va Gileadi muveeye vandu viiruka kutura ku Efuraimu na Manase.”

⁵ Avandu va Gileadi valinda vwambikiru vwosi ku mugera gwa Jorodani kunangwa vaduuki kwigalira vandu va Efuraimu vavuli kwiruka. Niiva mundu wa Efuraimu woosi agerizaa kwiruka, yateeva munwa kwambuka. Avandu va Gileadi vaali vanyara koteeva, “Ivi nu mundu wa Efuraimu?” Mundu oyo niyavoola, “Awa,”

⁶ vaamanyanga vamuteeva avoole, “Shibolezi!” Navuzwa oyo niyavoola, “Sibolezi”, kigira siyaali unyala kovora vulahi mba. Maku vaamuvugura mavazia kumwitila ha vwambukilu vwu mugera gwa Jorodani. Vaakuza ku ing'inga yeyo avandu va Efuraimu 42,000.

⁷ Jefuza yamiha Isiraeli ku mihiga sita ma nakuza, na yayavirwa mu lidaala lilie yengo weeve ga Gileadi.

Ibizani, Eloni, na Abudoni

⁸ Jefuza niyakatula ho Ibizani kutura Bezelehemu yimilira vandu va Isiraeli.

⁹ Yaali na vayaayi salasini kandi avakaana salasini. Yavugilira avakaana veve kuzia izingali mu zihiiri zindi kandi naletera avayaayi veve avakali kutura mu zihiiri zindi. Yamiha vandu va Isiraeli ku mihiga saba.

¹⁰ Maku Ibizani yakuza na yayavirwa ha Bezelehemu.

¹¹ Ibizani lwa yaali niyakakuza, Eloni kutura mu ihiiri ya Zabuloni yamiha Isiraeli ku mihiga likomi.

¹² Elani yakuza na yayavirwa ha Aijaloni mu kivala cha Zabuloni.

¹³ Eloni lwa yaali niyakakuza, Abudoni umuyaayi wa Hilelei kutura Pirazoni yamiha Isiraeli.

¹⁴ Yaali na vayaayi arubaini, na visukuru vayaayi salasini, avaziraa ku zibarasi sabwini. Yamiha Isiraeli ku mihiga munane.

¹⁵ Maku Abudoni umuyaayi wa Hileli yakuza na yayavirwa ha Pirazoni mu kivala cha Efuraimu mu vigulu via vandu va Maleki.