Vakalagi 11 - KITABU KITAKATIFU

¹ Jefuza, umuluviliri wu vulwani, kutura Gileadi yaali umwana wu mukali mulaya;

² Baba weve yalangwa Gileadi. Gileadi, yaali na vayaayi vandi vayiivula nu mukali weve, na ulwavaviluka, vakunga Jefuza kutura hango haavo. Vamuvolera, “Onyoora ku imiandu josi kutura ku baba wiitu mba; oveeye umwana wu mukali wundi.”

³ Jefuza yiruka kutura ku avamwavo veve nazia komenya mu kivala cha Tobu. Uwene yeyo, yahambana nu muganda gwa vayaayi vadamanu.

⁴ Ing'inga yaduuka lwa vandu va Isiraeli vaali mu vulwani na vandu va Amoni.

⁵ Lwayaga gekoleka, aviimiliri va Gileadi vazia koleta Jefuza kutura mu kivala cha Tobu.

⁶ Vamuvolera, “Hamba na ukwimiliri kuduuki kulwaana vandu va Amoni.”

⁷ Navuzwa Jefuza yavavoolera, “Mwasuura ligali, kuduuka lwamwangunga kuzingulu kutura munyumba ya baba wange. Kigira ki muuzi ku inzi kalunu lwa mwakanyoola uvudinyu?”

⁸ Vavoolera Jefuza, “Kwiranaa ku ivi kalunu kigira kwenya uzie ni kunyi na ukulwaanili vandu va Amoni ma kandi wimiliri avandu vosi va Gileadi.”

⁹ Jefuza yavavolera, “Niiva mulanzilanyia yengo kulwaana vandu va Amoni, ma Yahova ambe iliguuta, ndava umwami winyu.”

¹⁰ Vaamuvolera, “Kunyi kuvugiliiyi. Yahova nu muloli wiitu.”

¹¹ Jefuza yazia harara na vimiliri va Gileadi, kandi avandu vamukola kuva umwimiliri wavo, kandi umwami wavo. Jefuza yativura ilienya lilie ha Mizipa imbiri wa Yahova.

¹² Maku Jefuza yatuma avatumwa ku mwami wa Amoni, navoora, “Mulembanaa ni kunyi kigira ki? Kigira ki mwingiyi mu kivala chiitu?”

¹³ Umwami wa Amoni yavolera avatumwa va Jefuza, “Lwa vandu va Isiraeli vaatura mu Egebeti, vaavugura ikivala change kutura ku Mugera gwa Arinoni kuduuka ku mugera gwa Jaboku, kandi mugera gwa Jorodani. Kuduuka mwilanyie ikivala chene yiki mu mirembe.”

¹⁴ Jefuza yiranyia avatumwa veve ku mwami wa Amoni

¹⁵ na mativuli yaga: “Sigaveeye giligali ndi vandu va Isiraeli vaavugura ikivala cha Moabu anoho ikivala cha Amoni mba.

¹⁶ Yaga nigo agekoleka: Lwa vandu va Isiraeli vaatura Egebeti, vavitira mwigendanyama kuduuka kunyanza Inzakanyu, nivaduuka Kadeshi.

¹⁷ Maku vaatuma avatumwa ku mwami wa Edomu nivamuteeva avavuguliri kuvitira mu kivala chiche. Navuzwa umwami wa Edomu yasura kuvavitiza. Kandi vateva umwami wa Moabu avavugiliri kuvitira mu kivala chiche. Navuzwa umwami wa Edomu yasura kuvavitiza. Kandi vateva umwami wa Moabu avavugiliri vavitiri mu kivala chiche nasuura. Avandu va Isiraeli vamenya ha Kadeshi.

¹⁸ Maku vazizagilira nivavitira mwigendanyama kovodong'ana ikivala cha Edomu kandi ikivala cha Moabu, kuduuka lwa vaza kolovega lwivugwi lwa Moabu, kolovega Lundi lwu Mugera gwa Arinoni. Valomba hokososo navuzwa sivambuka mba.

¹⁹ Maku vandu va isiraeli vaatuma avatumwa kuzia ku Sihoni, umwami wa Heshiboni, nivamuteeva avugiliri vavitiri mu kivala chiche kuzia mukivala chavo.

²⁰ Navuzwa Sihoni yasura kuvavugilira. Yamanya navungiza iliihi lilie harara, nivalomba hokososa ha Jahazi, ma nivingilira Isiraeli.

²¹ Navuzwa Yahova, Nyasaye wa Isiraeli, yaguutira Isiraeli Sihoni harara ni liihi lilie. Avandu va Isiraeli vaavugura imiandu josi ja vandu va Amori avaari nivamenyi mu kivala yicho.

²² Vaavugura ikivala cha vandu va Amori choosi kutura ku Arinoni nekeveeye isavaalu, kuduuka ku Jaboku neveeye ivaale, kandi kutura ku mwigendanyama iliveeye ivugwi wu mugera gwa Jorodani kolovega lwi madioli.

²³ Yaali Yahova, Nyasaye wa Isiraeli, uwakungira vandu va Isiraeli vandu va Amori.

²⁴ Wenyaa wilane kogeliza kuvugura ikivala chene yiki? Unyala kuva ni vindu viosi viu munyasaye woovo. Chemoshi amali kuhaana ku ivi. Navuzwa kunyi kulava ni vindu vietu via Yahova, Nyasaye wiitu umali kukuha.

²⁵ Ivi uganaganaa oveeye umulahi kuvita Balaki umwana wa Zipori, umwami wa Moabu? Siyahing'ana ku na Isiraeli mba. Yakola ndio? Yalwana ku nikunyi?

²⁶ Ku mihiga miatatu vandu va Isiraeli vamenya mu Heshiboni na Aroeri, kandi mu madaala gaveeye ahimbi, harara na madaala gandi amanene kulujinga lwu Mugera gwa Arinoni. Kigira ki simwavugula amadara zana yaga kutura ing'inga yila yoosi?

²⁷ Awa, Inzi ngikiri kokogolera ku vudamanu vwosi mba. Ivi okolaa vudamanu lwawenya kunwaana. Yahova niye umukalagi. Alakalaga kalunu hagati ha vandu va Isiraeli na vandu va Amoni.”

²⁸ Navuzwa umwami wa Amoni siyaalola ku ikivuni mu makuva ga Jefuza mba.

²⁹ Maku Roho wa Yahova yaza ku Jefuza. Jefuza yaavitira Gileadi na Manase, ma niyiirana Mizipa mu Gileadi kandi nazia mu Amoni.

³⁰ Jefuza yalomba lilagano na Yahova navoora, “Niiva ulangola mbe niliguuta ku vandu va Amoni,

³¹ ndahaana ku ivi umundu woosi utura munyumba yange wukutanga kuza kunzaganira lwanduuka kutura mu vulwani vwiliguuta ave kuli kihanwa chukusambwa. Ndahaana umundu oyo ku Ivi kuva kuli kisiuviriru.”

³² Jefuza yambuka umugera kuzia kulwaana vandu va Amoni, na Yahova yamukonya naguuta.

³³ Yavingilira kutangira ha Aroeri kuduuka ahimbi ha Minizi, amadara goosi sirini, kali kuduuka mu Abili Keramimu. Avandu avanyingi viitwa, na Isiraeli yaguuta Amoni.

Umukana wa Jefuza

³⁴ Lwa Jefuza yirana yengo ha Mizipa, umukana weve yazia kumwaganira naasievaa nakubaa ivikuli. Naye yaali umwana weve umuderwa.

³⁵ Lwa yamulora, Jefuza yatandula zinguvu zizie mu vovereri navoora, “O, mukaana wange! Ombeeye ovovereri vunyingi ligali! Kigira ki ave ni ivi udukana kondetera uvuzunu? Inzi mali kolomba lilagana na Yahova, na sinyala kwirana kuvunaga lilagana lilie mba!”

³⁶ Mukaana weve yamutivulira navoora, “Baba wange niiva wakolomba lilagana na Yahova, gaduukanaa okole ku inzi ga umali kulaga ulakola, kigira Yahova umali kukuvanzira avasigu vovo, vandu va Amoni.”

³⁷ Navuzwa mukaana yateeva baba weve, “Ngolera kindu kilala. Utange kondeka ku mieli giviri, nduuki kuzia kogendagenda na valina vange muvigulu kusioma kigira nziza kukuza ningikiri umugima.”

³⁸ Baba weve yamuvugilira kuzia, na yaamutuma imieli giviri. Yazia harara na valina veve mu vigulu kusioma kigira yaali nazizaa kukuza nakikiri konyoora umusaza, kandi nakikiri kwivura ku.

³⁹ Imieli giviri nijakavita, mukaana uyu yirana na baba weve yakola kuli vaalagana na Yahova, mukaana uyu yakuza nakikiri umugima. Kigiria yaga gwamanya nigugwa umwima mu Isiraeli

⁴⁰ ndi avakaana va Isiraeli vazizaa vuli muhiga kusioma umukana wa Jefuza mu Gileadi, madiku gane.