Vakalagi 10 - KITABU KITAKATIFU

Tola

¹ Lwa Abimeleki yaali niyakakuza, Tola umwana wa Pua, umwisukulu wa Dodo, yaza kohonyia Isiraeli. Yaali kutura mu ihiiri ya Isakari, na yamenya ha Shamiri, mu kivala chi vigulu cha Efuraimu.

² Yaali umwami wa vandu va Isiraeli ku mihiga sirini na tatu. Lwa yakuza yayavirwa ha Shamiri.

Jairo

³ Lwa Tola yaali niyakakuza, Jairo kutura mu Gileadi yaali umwami. Yamiha ku mihiga sirini na mbiri.

⁴ Yaali na vayaayi salasini avaari ni zibarasi salasini. Vaali na madaala salasini mu kivala cha Gileadi, agakilangwa madaala ga Jairo kuduuka kalunu.

⁵ Lwa Jairo yakuza nayavirwa ha Kamoni.

Jefuza

⁶ Avandu va Isiraeli vaakora uvwoni imbiri wa Yahova lwa vasigamira vanyasaye va Baali kandi Asitate, harara na vanyasaye va Sidoni, Moabu, Amoni na vanyasaye va Filisitia. Vivilira Yahova nivaleka kumusigamira.

⁷ Kunangwa Yahova yaali nu vutima ovonene na vandu va Isiraeli. Yavaleka ku guutwa na vandu va Filisitia harara na vandu va Moni.

⁸ Ku mihiga komi na nane vadambiza vandu va Isiraeli ligali avaamenyaa mu kivala cha vandu va Amori ivugwi wu mugera gwa Jorodani mu Gileadi.

⁹ Avandu va Amoni vaambuka mugera gwa Jorodani kulwaana izihiiri zia Yuda, Benjamini, na Efuraimu. Isiraeli yaali mu vudinyu harara ni lidambizwa linyingi.

¹⁰ Maku vandu va Isiraeli vanira Yahova nivavoora, “Kwakora vwoni imbiri woovo, kigira kwaleka Ivi Yahova wiitu nukusigamira vanyasaye va Baali.”

¹¹ Yahova yavavolera, “Avandu va Egebeti, Mori, Moni, Filisitia,

¹² Sidoni, Maleki, kandi Moni vamudambiza maziambiri, na mwanzanira. Simwalola nimumuhonyia?

¹³ Navuzwa munyi mwanzivilira, kandi nimwilana kusigamira vanyasaye vandi, na kalunu Inzi sindamukonya kandi mba.

¹⁴ Tuli muzie kwanira vanyasaye vamwatovola. Muleke vanyasaye vene yavo vamukonye lwa muduuka mu vudinyu.”

¹⁵ Navuzwa avandu va Isiraeli vavoolera Yahova, “Kwakora vwoni. Kola gauyaanza, navuzwa mwaza, okohonyie kalunu.”

¹⁶ Valeka vanyasaye vaavo vageni, nivasigamira Yahova; naye yanyangana kigira lidambizwa lia vandu va Isiraeli.

¹⁷ Maku iliihi lia vandu va Amoni lietegekera uvulwani, nilitura nililomba hokososa ha Gileadi. Avandu va Isiraeli vivungikiza harara nivatura nivaaza komenya ha Mizipa mu Gileadi.

¹⁸ Hene yaho vandu va Isiraeli na vimiliri vaavo vateevana aveene ku vene, “Nivwaha unyala kukwimilira mulilwana vandu va Amoni? Umundu okola ndio, alava umwimiliri wa vosi mu Gileadi.”