Vakalagi 1 - KITABU KITAKATIFU

Izihiiri zia Yuda na Simioni zilwaanaa vandu va Kanaani

¹ Lwa Joshua yaali niyakamara kukuza, Avandu va Isiraeli vateva Yahova, “Ni hiiri ki inyala kukwimilira muliizia kulwana Avakanaani?”

² Yahova yativura, “Ihiiri ya Yuda ilamwimilira kutanga; Inzi mali kuhaana kivala yicho mumakono gave.”

³ Kunangwa avandu va Yuda vavoolera avandu va Simioni, “Hambi kuzie ni munyi mu kivala chakwahevwa, kuduuki kulwaana vandu va Kanaani harara ni munyi. Maku kulazia ni munyi mu kivala cha mwahevwa.” Kunangwa ihiiri ya Simioni, yazia muvulwani harara navo.

⁴ Maku vandu va Yuda vatanga vulwani, na Yahova yaguutira vandu va Kanaani harara na Perizi; na vita avandu izielefu likomi ha Bezeki.

⁵ Vanyoola Adonibezeki wene yeyo, na vaamulwaana, kandi vaguuta vandu va Kanaani na vandu va Perezi.

⁶ Navuzwa Adonibezeki yiruka, navo vamulonda ma nivamugumira, na vamanya nivamutema videte vivie vinene harara ni vino vivie vinene.

⁷ Adonibezeki yavoola, “Avami sabwini ni vatemeeywi videte viavo vinene, ni vino viavo vinene vamali kolola madanye isi wemesa yange; Nyasaye umali kongolera aga ndavakolera.” Vamuhira Jerusalemi ma nakuzira yo.

Ihiiri ya Yuda Yaguuta Jerusalemi na Heburoni

⁸ Avandu va Yuda valwana Jerusalemi nivaligumira; vita avandu valio ni kivavi ma nivasaamba lidaala zana.

⁹ Lwinyima, avana va Yuda vazia kulwana vandu va Kanaani avamenyaa mu kivala chi vigulu, mu kivala chumu kolovega lwi isavaalu, nu mulivona.

¹⁰ Vaatura ni vazia kulwaana vandu va Kanaani avamenyaa mu lidaala lia Heburoni ilialangwa Kiriazi Ariba. Wene yeyo, vita izihiiri zia Sheshai, Ahimani harara na Talimai.

Ozinieli Yaguuta Lidaala lia Debiri

¹¹ Kutura heene yaho, vandu va Yuda vazia kwingilira avandu va Debiri. Kale Debiri yalangangwa Kiriazi Seferi.

¹² Na Kalebu yavoolera mulala kuvo, “Uyu wingilira Kiriazi Seferi nukuliguuta, ndamuha umukana wange Achisa ave umukali weve.”

¹³ Ozinieli mwana wa Kenazi, amwavo wa Kalebu umuke, yaguuta lidaala yilio; naye yamuha Achisa kuva umukali weve.

¹⁴ Lidiku lie keserero, Ozinieli yagoonya Achisa asave baba weve umulimi. Achisa yika kutura ku isukiri yeeye, na Kalebu yamuteeva ichayenyaa.

¹⁵ Achisa yamuvolera, “Nyenya ombe uvugasu; kigira waimba umulimi mwumu isavaalu, ulamba kandi ivisinukiru via mazi.” Kunangwa Kalebu yamuha ivisinukiru vieluhia kandi viendangu.

Uvuguuti vwi zihiiri zia Yuda harara na Benjamini

¹⁶ Ivisukulurwi viu Mukeni, guuga wa Musa, vazia kutura Jeriko mu lidaala lie misaala ja makindu, harara na vandu va Yuda, kuzia Muligendanyama lie Vuyuda, iliveeye kolovega lwi savaalu, ahimbi na Aradi; na vazia komenya hagati ha vandu vamaleki.

¹⁷ Kunangwa avandu va Yuda vazia na avandu va Simioni, ni vingilira vandu va Kanaani avamenyaa mu lidaala lia Zefazi, na vaavadiviza vosi ligali. Vaagulika lidaala liene yili Horima.

¹⁸ Avandu va Yuda vaaguuta Gaza harara ni kivala chavo, Ashikeloni harara ni kivala chavo, kandi Ekironi ni kivala chavo.

¹⁹ Na Yahova yaali na vandu va Yuda. Kandi vavanyaga ikivala chi vigulu, navuzwa vaatamika kukunga yavo avaamenyaa mu livona kigira vaali na magare gi kivia.

²⁰ Kunangwa vahaana Heburoni ku Kalebu, kuli Musa yaali naavalagi. Yakunga zihiiri zivaga zi visukululwi via Anaki kutura yo.

²¹ Navuzwa avandu va Benjamini vaatamika kukunga vandu va Jebusi avamenyaa mu Jerusalemi; na vandu va Jebusi vakemenyi harara na avandu va Benjamini mu Jerusalemi kuduuka lidiku lia kalunu.

Izihiiri zia Efuraimu na Manase ziaguuta Bezeli

²² Ihiiri ya Efuraimu na Manase vingilira lidaala lia Bezeli na Yahova yaali navo harara.

²³ Ihiiri ya Efuraimu na Manase yatuma avaluuti vazie kuluuta Bezeli. Ilieta lie lidaala lilalangwa Luzi.

²⁴ Lwa avaluuti valora umundu natura mu lidaala zana vamuvolera, “Mwaza kumanyie inzira yingira mu lidaala yili, na sikulakusaliriza mba.”

²⁵ Naye yavamanyia ikirivwa chingilaa mu lidaala, navo vosi avaamenyaa mu viitwa ni kivavi, navuzwa umundu oyo harara na viko veve sivadivizwa mba.

²⁶ Mundu oyo yatura nazia mu kivala cha vandu va Hiti ni yumbaka ilidaala, naaligulika Luzi; yili nilio ilieta lialio kuduuka kalunu.

Avandu avaavura kukungwa na vandu va Isiraeli

²⁷ Kunangwa ihiiri ya Manase sivali vanyara kukunga avandu vamenya Bezishani, Tanaki, Dori, Ibuleamu Megido, harara nu tudaala twali ahimbi kugo; kigira vandu va Kanaani vazizagilira komenya mukivala yicho.

²⁸ Lwa vandu va Isiraeli vaali nivakava ni zinguru kuvita lwambiri, vaniga vandu va Kanaani kokora miyinzi kuzingulu, navuzwa sivali vanyara kuvakunga vosi mba.

²⁹ Avandu vi ihiiri ya Efuraimu sivali vanyara kukunga vandu va Kanaani avaamenyaa mu lidaala lia Gezeri mba; na vandu va Kanaani vazizagilira komenya harara navo.

³⁰ Avandu vi ihiiri ya Zabuloni sivali vanyara kukunga avandu vamenya mu madaala ga Kituroni kandi Nahalali mba, na vandu va Kanaani vazizagilira komenya harara navo, nivanigwa kuyinzilira vandu va Isiraeli.

³¹ Avandu viihiiri ya Asheri sivali vanyara kukunga avandu vamenya mu madaala ga Ako, Sidoni, Ahilabu, Achizibu, Heliba, Afeki na Rehobu.

³² Avandu va Asheri avamenyaa na avandu va Kanaani kigira sivavakuunga mba.

³³ Avandu vi ihiiri ya Nafutali sivali vanyara kukunga avandu vamenya mu madaala ga Bezi-shemeshi na Bezianazi mba. Navuzwa avandu va Nafutali vahaana kuvo havundu hokomenya hagati ha vandu va Kanaani, navuzwa vayinzilizwa imiyinzi jukunigwa.

³⁴ Avandu va Amori vaniga avandu vihiiri ya Dani komenya mu kivala chivigulu, na sivavavugilira kuuza komenya mukeleremo mba.

³⁵ Avandu va Amori vazizagilira komenya ha Aijaloni, Shalubimu, nu mu Kiguru cha Heresi, navuzwa zihiiri zia Efuraimu na Manase ziazizagilira kuvamiiha, nukuvaniga kuvayinzilira.

³⁶ Ulwako lwa vandu va Amori lwaavitiara mu Lung'afa lwa Akurabimu, ivaale wa Sela.