Vahebraina 9 - KITABU KITAKATIFU

¹ Lilagana liu kutanga liali namalago gu kusigamira Nyasaye, kandi havundu hatakatifu hukusigamira Nyasaye mu lirova.

² Lihema liumbakwa liali niving'oze viviri. Mu keng'oze chukutanga chaali na havundu ichova chalangwa Havundu Hatakatifu. Mu keng'oze yicho, mwaali mu ni kinaara kandi emesa numugadi Mutakatifu.

³ Inyima wi Isuuka yu kukinga ya kaviri haali ni Lihema lialangwa Hatakatifu Ligali.

⁴ Mu Lihema yimwo mwaali mu nuvwaali vwi zahabu vwu kusambira ku kimuli kandi mwaali mu ni Lisandugu lie Lilagana liakunikwa ni zahabu. Lisandugu yilio liali mu nijuba yizahabu nayo yaali mu nimaana, kandi ni imbimbu ya Haruni yasivuka amatu, ni Vibaho viamagina viviri via malago gang'odwa ku.

⁵ Igulu wi Lisandugu lia malago yilio haali ho ni vilombe vie zimbaha vimanyiaa uvukumi vwa Nyasaye vialangwa “vakerubi”, na zimbaha ziavo ziakunika havundu hi zimbavasi, hu vwoni vwasaamihirwa. Navuzwa kalunu sieveeye ing'inga yu kwivaala ivindu viosi muvutambi mba.

⁶ Vindu yivi viamala kolohizwa kuli ndi: Avasaalisi vingira mu Lihema liu kutanga lie chova vuli lidiku kokora vutumwa vwavo;

⁷ navuzwa Musaalisi Munene yenyine niyie yingiraa mu Lihema liakaviri liu mugati. Yakola ndio ing'inga ndala vuzwa ku muhiga. Yingiraa mu na masahi, aga yahaana ku Nyasaye kigira oyo mwene, kandi kigira vwoni vwa vandu vaakora vugira kumanya.

⁸ Roho Mutakatifu yigizaa havulavu kuturana ku lilohiza yili ndi, inzira yu kwingira mu Lihema liu mugati haveeye Hatakatifu Huvutakatifu ikikiri kwigulwa, ku lohono lwi Lihema lie ichova likisingiyi ho.

⁹ Yaga gaveeye kelolero chi ing'inga ya kalunu. Mulugano zisadaka ni visiuviliru vie zinyama viahaanwa ku Nyasaye siviali vinyala kokora mwoyo gwa uyu usigamiraa kuva mudukiru mba;

¹⁰ Kigira vindu yivi viosi viveeye vuzwa ku lugano lwi viukulia, viukunwa, kandi lietakasa lie zing'ano ziosi. Yaga goosi gaveeye malago gichova vuzwa, gatumika kuduuka lwa Nyasaye aliviikaho liiva lihia.

Amasahi ga Yeso

¹¹ Kristo umali kuuza kuli Musaalisi Munene wi vindu vilahi vimali kuva hano. Lihema lia atumikaa mu liveeye linene ligali, kandi liveeye liduukiru. Lihema yili silialombwa na makono gavandu, agaveeye kovora, siliveeye lie lilombwa lie lirova yili mba.

¹² Lwa Kristo yavitira mu lihema kandi niyingira, kuduuka Hatakatifu ligali lulala kandi lwokoheleriza, siyavugula masahi gi zimburi na gi zigiriki kugahaana kuli visiuviliru mba; navuzwa, yavugula masahi geege mwene kandi umali konyolera kunyi ovohonyi vwi mihiga ni mihiga.

¹³ Amasahi gi zimburi na gi zigiriki kandi ligoke lie vimoli viukusambwa viuhwa ku vandu vaveeye vadamanu kolondekana numwima gwi vindu yivi vivatakaasa nukutulizaho uvudamanu vwavo kolondekana numwima.

¹⁴ Kigira yaga gaveeye agiligali masahi ga Kristo galakola miyinzi minene ligali. Kuvitira mu Roho wi mihiga ni mihiga, yihaana mwene kuli kihanwa kiduukiru ku Nyasaye. Amasahi geege galakatakase zing'anagani ziu mu mioyo jietu kutura ku miima jitaduukanaa kunangwa kuduuki kutumikira Nyasaye oveeye mwoyo.

¹⁵ Kigira yaga, Kristo niyie olohizaa lilagana lihia, kunangwa yavo ava Nyasaye amali kulanga vaduuki konyoora vugasu vwi mihiga ni mihiga, vwa Nyasaye yavasuuviriza. Yaga ganyala kokolwa kigira likuza limali kuva ho; ilivohololaa avandu kutura mu mahiolo gavakolaa lwa lilagana liukutanga liali nilikikiri ho.

¹⁶ Nihava nihaveeyeho ni lilagana lie miandu, likuza lia uyu waleeta lilagana zana kuduuka live ho.

¹⁷ Kigira lilagana lie miandu siliveeye ni zinguru lwu mundu wa lilomba aveeye mwoyo mba; Iiveeye vuzwa ni zinguru inyima wi likuza lilie.

¹⁸ Kunangwa, lilagana liu kutanga siliali linyala kutwekizwa vugira masahi kusunduka mba.

¹⁹ Kutanga Musa yalandizira avandu vosi malago goosi kuli galohizwa mu Lilaga. Maku navugura masahi gi zigiriki na gi zimburi, nagazuganyia harara na mazi, kandi naguuha ku kitabu chi Lilaga kandi niyuha ku vandu vosi, natumikira ameyo galombwa ku visara nuvwoya vwakanyu.

²⁰ Yavoola, “Yaga na Masahi gi lilagana lia Nyasaye yamulaga mulonde.”

²¹ Munzira ndala nzere yuuha masahi yago kandi ku Lihema Litakatifu kandi ku viju viosi vitumikaa mu Lisigamira Nyasaye.

²² Kolondekana ni Lilaga, ahimbi vindu viosi vitakaswa na masahi, kandi uvwoni vusamiifwa vuzwa niiva masahi gasunduliywi.

Kristo Ahonyia vwoni vwa vandu

²³ Vindu yivi viveeye vuzwa kuli liiva lie vindu vieligali viu mwigulu viaduukanaa vitakaswe kuli ndio. Navuzwa vindu viu mwigulu viene viduukana visiuviliru vilahi ivivita yivi ligali.

²⁴ Kristo si yingira Havundu Hatakatifu halombwa na makono ga vandu, ahaali kuli liiva lia hiligali mba. Yingira mwigulu mwene, mwa kalunu asingiraa imbiri wa Nyasaye kigira kunyi.

²⁵ Musaalisi Munene wa Vayuda yingiraa Havundu Hatakatifu ligali vuli muhiga na masahi gi zinyama. Navuzwa Kristo siyingira mu, ukwihaana mwene haali kanyingi mba;

²⁶ galava ndio, ngano Kristo yaali yakasaliyi haali kanyingi kutura lirova nililombwa. Mu vogono yivwo kalunu lwi zing'inga ziesunda ko keheri, umali kololeka lulala vuzwa kandi lwu kumaliriza, kutuliza vwoni kuvitira mu liehaana mwene kuli kisiuviriru.

²⁷ Mundu woosi kuduuka akuzi lulala vuzwa, kandi lwinyima aduuki kukalagirwa na Nyasaye.

²⁸ Mu liiva lilala liere Kristo kandi yahaanwa lulala kuva kisiuviriru kusamiiha uvwoni vwa vandu vanyingi. Ku ing'inga ya kaviri sialiloleka kusamiiha vwoni mba, navuzwa kohonyia yavo avamulindiliraa.