Vahebraina 7 - KITABU KITAKATIFU

¹ Melikizedeki uyu yaali Mwami Munene wa Salemi, kandi Musaalisi wa Nyasaye Oveeye munene. Lwa Aburahamu yaali niyirana kutura mu vulwani vwa yaguutira mu avami vane, Melikizedeki yagana naye kandi namugasiza,

² na Aburahamu naye naamuha kidieli chi likomi chi vindu viosi via yaali navio. Kivuni chukutanga chi Lieta Melikizedeki keveeye “Mwami Munene wuvulungi”, kandi kigira yaali Mwami wa Salemi, lieta lilie liveeye kovora, “Mwami wi Mirembe.”

³ Siaveeyeho na vang'oda baba anoho na mama weve mba anoho mulala ku vaguuga veve mba; livulwa lilie anoho likuza lilie silimanyikani mba. Aveeye kuli Mwana wa Nyasaye; alava musaalisi mihiga ni mihiga.

⁴ Kunangwa, muhenze mulole kuli mundu uyu yaali munene. Aburahamu, guuga wiitu wamanyikana ligali, yamuha kidieli chi likomi ku vindu via yalaanya muvulwani.

⁵ Yava avaatura ku kisukururwi cha Levi, avaveeye vasaalisi, valagwa ni Lilaga kuvugura kidieli chi likomi kutura ku vandu va Isiraeli, agaveeye kovora, kutura ku vandu vaavo vene; kali niiva avandu vaavo vene vaatura ku kisukururwi cha Aburahamu.

⁶ Melikizedeki siyaali kisukururwi cha Levi mba, navuzwa yasolola kidieli chi likomi kutura ku Aburahamu kandi namugasiza, umundu wanyoola lisuuvirizwa lia Nyasaye.

⁷ Navuzwa silinyala kuhayahayizwa ndi uyu ugasizaa aveeye munene kuvita uyu ugasizwa mba.

⁸ Kolovega lwa vasaalisi, kidieli chi likomi kesololwa vuzwa na vandu vakuzaa; navuzwa kolovega lwa Melikizedeki, kidieli chi likomi, chasololwa na uyu oveeye mwoyo, kuli Mang'oda Matakatifu gavoora.

⁹ Mulala anyala kovora ndi, lwa Aburahamu yaatuliza kidieli chi likomi, Levi wa visukululwi veve vaavugura kidieli chi likomi; yatungaa kidieli chi likomi kandi.

¹⁰ Levi yaali nakikiri kwivulwa ing'inga ya Aburahamu guuga weve yagana na Melikizedeki.

Yeso aveeye kuli Melikizedeki

¹¹ Niiva vulungi vwanyooleka kuvitira mu vusaalisi vwi ihiiri ya Levi, avandu va Isiraeli vahevwa Lilaga. Sihaveeyeho ni lienya umusaalisi wu lugano Lundi kuuza kolonda Melikizedeki, nataveeye uza inyima wa Haruni mba.

¹² Lwi ing'inga yuvusaalisi igirunga'anywa, kuduuka lilaga nalio ligirung'anywe kandi.

¹³ Mwami wiitu wivindu yivi vivoolwa kuye, aveeye wihiiri yindi, kandi sihaveeyeho nu mundu wundi kutura mu ihiiri yeeye watumika kuli musaalisi ku vwali mba.

¹⁴ Gamanyikanaa vulahi ndi Mwami wiitu yiivulwa kutura mu ihiiri ya Yuda; kandi Musa siyavoola ku kindu choosi ku ihiiri yiyi lwa yamoloma kigira vasaalisi mba.

Musaalisi wundi kuli Melikizedeki

¹⁵ Amakuva yaga gamali kumanyikana vulahi ligali; musaalisi wundi umali kololeka oveeye kuli Melikizedeki.

¹⁶ Siyakolwa musaalisi kolondekana na malago kandi miima ja vandu, navuzwa kuvitira mu zinguru zie livamwoyo litahera mba.

¹⁷ Mang'oda Matakatifu gavoora, “Ivi ulava musaalisi mihiga ni mihiga ku lugano lwu vusaalisi vwa Melikizedeki.”

¹⁸ Lilaga likulu lia Musa liukutanga liatulizwa ho, kigira liali lidedekere kandi litanyala kokoonya kindu.

¹⁹ Lilaga lia Musa siliali linyala kokora kindu choosi kuva kidukiru mba. Navuzwa kalunu mu vogono vwalio, lisuuvirizwa lilahi ligali kuvita, limali kuhaanwa lia kunyala kuvitira mu, ma kwisundi ahimbi ku Nyasaye.

²⁰ Komeeda ku geene yago, haveeyeho ni liesuuha lia Nyasaye. Sihaaliho ni liesuuha kuli yili lwa vandu vandi vakolwa avasaalisi.

²¹ Navuzwa Yeso yakolwa musaalisi munzira yi liesuuha lwa Nyasaye yamuvolera, “Mwami umali kolomba lisuuvirizwa liu kwisuuha kandi sialagirung'anyia zing'anagani zizie mba: ‘Ivi ulava Musaalisi mihiga ni mihiga.’ ”

²² Kigira liesuuha yili, Yeso umali kuva kihambiliru chi lilagana lilahi kuvita.

²³ Koveeye ni liavukana lindi: Vaali ho na vasaalisi navuzwa sivali vakanyali kuzizagilira ni miyinzi jaavo mba kigira likuza.

²⁴ Navuzwa Yeso ahindiraa mihiga ni mihiga, kandi miyinzi jije kuli musaalisi sijihelerizana kutura kuye kuzia ku wundi mba.

²⁵ Kandi ndio anyala, kalunu na kazozo, kohonyia yavo avaazaa ku Nyasaye kuvitira muye, kigira aveeye mwoyo mihiga ni mihiga, kandi avasaaliraa ku Nyasaye kazozo.

²⁶ Yeso niyie Musaalisi Munene ukuduukaa mu lienya lietu. Aveeye mutakatifu; utaveeye nuvudamanu, anoho vwoni muye; utaveeye nimbala mba, umali kwahulwa kutura ku voni, kandi wanenehizwa igulu ligali.

²⁷ Siaveeye kuli avasaalisi vanene vandi mba; siyenyekaa ahaane visiuviliru kigira uvwoni vwivwe mwene kutanga, ma kandi kigira uvwoni vwa vandu mba. Yakola yaga lwa yahaana kisiuviriru kilala, lulala vuzwa kigira viosi, lwa yihaana mwene.

²⁸ Lilaga lia Musa litovolaa avandu vataveeye vadukanu kuva avasaalisi vanene; navuzwa lisuuvirizwa lia Nyasaye lia yakola kuliesuuha, liaza inyima wi Lilaga, limali kotovola Mwana, umali kokolwa muduukiru mihiga ni mihiga.