Vahebraina 6 - KITABU KITAKATIFU

¹ Kunangwa, gendi kwisundi imbiri kuduuka ku migizu gu vuduukiru nakoleke inyima amigizu gukutanga gu Vukristayo. Kutatema kandi musingi gwi lieganira kutura ku miyinzi midamanu, nu gwi lisuuvira mu Nyasaye mba;

² kandi gwa migizu gi libatiza na gi livikwa ku makono mba; nagilisimuguka lia vakuzu kandi likalagirwa lie mihiga ni mihiga.

³ Gendi kokole yaga niiva Nyasaye avugiliraa.

⁴ Ni vudinyu kwilanyia vandu viganira mu lieganira kandi, vandu vamala kumanya vulavu vwa Nyasaye, kandi vamala konyoora kihanwa chu mwigulu. Yava ni vandu vamala konyoora Roho Mutakatifu.

⁵ Vamala kumanya vulahi vwi likuva lilahi lia Nyasaye, ni zinguru zie zing'inga ziza;

⁶ Niiva valeka lisuuvira liavo, ganyala kunyalika ndi kandi kuvilanyia vahia vaduuki kwiganira? Vavambaa Mwana wa Nyasaye, kandi kumuleganyira havulavu lwa viirana kokora vwoni.

⁷ Nyasaye agasizaa lirova linwezaa imbura ikubaa kazozo kulio, kandi limeraa vitagwa ni zinguza ziveeye novokoonyi ku yavo avalilimaa; linyoola uvugasu vwa Nyasaye.

⁸ Navuzwa niiva lilamera amafa ni ikayongo anoho indiva ya matagalu siliveeye novokoonyi, kandi liveeye ahimbi kulaamwa na Nyasaye. Mu keheri chalio lilakasambwe nu muliru.

⁹ Navuzwa kali nikomolomaa kuli ndi avaamitu vayaanze viitu, koveeye ni lisuuvirizwa linene ku liiva lienyu. Kumanyi vulahi ndi mumali konyoora uvugasu vulahi voveeye vwo vohonyi vwinyu.

¹⁰ Nyasaye siaveeye vugira vulungi mba! Sialivilira miyinzi jinyu ja mwakora, anoho vuyanzi vwinyu vwa mwalolekiza kuye novokoonyi vwa mwaha vandu va Nyasaye kandi mu kihaanaa ku Avakristayo vache vinyu, ma mukizizagiliraa kokoonya Avakristayo vache vinyu.

¹¹ Lienya lietu linene liveeye ndi, sa mulala ku munyi alolekizi vugulu vwivwe kuduuka ku keheri, chu vuduukiru vwi lisuuvirizwa lienyu.

¹² Kunangwa sikwenyaa munyi muve vagata, navuzwa muve kuli yavo avasuuviraa kandi vaveeye viikuziri, kandi ndio vanyoore yivio via Nyasaye amali kusuuviriza.

Lisuuvirizwa lia Nyasaye ni lieligali

¹³ Lwa Nyasaye yalomba lisuuvirizwa lilie ku Aburahamu, yalomba liesuuha akole icha yaali naasuuvirizi. Kigira sihaali nu munene kuvita oyo mwene, yatumikira lieta lilie liene lwa yalomba liesuuha lilie.

¹⁴ Yavoola, “Ngusuuvirizaa ligali ndi, ndakugasiza kandi ndakuha visukululwi vinyingi.”

¹⁵ Aburahamu yaali mwikuziri, kandi ndio yanyoora icha Nyasaye yamusuuviriza.

¹⁶ Lwa vandu visuha, vatumikiraa lieta lia oyo oveeye munene kuvita ye, kandi liesuuha lidinyirizaa makuva gavooleywe, ma liheriza amahangari.

¹⁷ Kandi, Nyasaye yatovola kutwekiza lisuuvirizwa lilie ni liesuuha. Nandio yamanyia havulavu yavo valinyoola miandu ndi amakuva geege sigaveeye niligirung'ana, maku yavika liesuuha hagati haavo.

¹⁸ Kunangwa koveeye ni vindu viviri; lisuuvirizwa ni liesuuha ivitanyala kugirung'ana, kandi Nyasaye avula kovora vovehi kulio. Kunangwa kunyi avakumali konyoora mirembe naye kuzuvwa ligali kugumiri vudinyu lisuuvirizwa liviikiywi imbiri wiitu.

¹⁹ Koveeye ni lisuuvirizwa yili kuli itiiru yi mioyo jietu. Lisuuvirizwa lizizaa kuduuka ku vwali inyima wisuka yi Litembeli liu mwigulu.

²⁰ Yeso yitaa kwingira mu, mu vogono vwitu, kandi umali kuva musaalisi munene mihiga ni mihiga kolondekana novolohizi vwu vusaalisi vwa Melikizedeki.