Vahebraina 5 - KITABU KITAKATIFU

¹ Vuli Musaalisi Munene atovolwa na Nyasaye kutura mu vandu veve, kandi aviikwa kutumikira Nyasaye mu vogono vwavo, aduuki kuhaana visiuviliru kandi vihaanwa kigira vwoni vwavo.

² Kigira oyo mwene aveeye mudedekere mu zinzira zinyingi, anyala kwikuzira no vohoma vwosi ku yavo avataveeye nilimanya navakolaa vudamanu.

³ Kigira oyo mwene aveeye mudedekere, gamudukira ahaane visiuviliru kigira vwoni vwivwe mwene, kandi kigira vwoni vwa vandu.

⁴ Sihaveeyeho nu mundu wivuguliraa umwene luyali lwu kuva musaalisi munene mba. Samulala gamudukira Nyasaye amutovole kuli yatovola Haruni.

⁵ Kandi ndio, Kristo siyenenehiza nukwivugulira mwene uluyali lwu kuva musaalisi munene mba. Navuzwa Nyasaye yamuvolera, “Ivi oveeye Mwana wange; kalunu inzi mali kugwa Baba woovo.”

⁶ Kandi yavoola havundu handi, “Ivi ulava musaalisi mihiga ni mihiga, mu vusaalisi ku lugano lwa Melikizedeki.”

⁷ Mu limenya lilie ku lirova, Yeso yahaana lisaala ni ligoonya kandi namaliga manyingi ku Nyasaye, waali unyala kumuhonyia kutura mu likuza. Nyasaye yamuhulira kigira yaali mugoosi kandi musuuvirifu.

⁸ Kali niiva yaali Mwana wa Nyasaye, navuzwa yiiga kuhulira Nyasaye kuvitira mu vusaliri vwivwe.

⁹ Lwa yakolwa muduukiru, yagwa uvutangiliru vwo vohonyi vwi mihiga ni mihiga ku yavo vosi avamuhulira nukumutia.

¹⁰ Nyasaye yamutovola kuva Musaalisi Munene ku lugano lwu vusaalisi vwa Melikizedeki.

Lieganihiza ku Lirana inyima mu Lisuuvira

¹¹ Koveeye na makuva manyingi gokovoola ku makuva yaga, navuzwa ni vudinyu kumwivaalira kigira si muveeye vangu kumanyiriza nukuhulira ligali mba.

¹² Ing'inga yaveeye ho indambi ya gaduukanaa munyi muve avigizi, navuzwa munyi mukiri ni lienya mundu amwigizi amigizu gu kutanga agiligali ga makuva ga Nyasaye. Mugwiyi avenyaa kunwa maveere mu vogono vwu kulia viukulia vidinyu.

¹³ Mundu woosi ukinwa maveere akikiri mwana mudoto, utaveeye ni limanya mu makuva gu vulungi nu vudamanu.

¹⁴ Navuzwa chukulia kidinyu, ku lovega lundi, keveeye cha vandu vakulundu, kuvitira mu limanya liavo lia viinaliza, avanyala kwavukanyia hagati hu vulahi nuvudamanu.