Vahebraina 2 - KITABU KITAKATIFU

¹ Kigira yaga, gakuduukiraa kugumiri vudinyu amakuva goosi agiligali ga kumali kuhulira, gase kulagotizwa.

² Uvutumwa vwahaanwa ku vaguuga viitu ni zingelosi vwa loleka kuva vwi ligali kandi mundu woosi wavula kovolonda anoho kuvuhulira, yanyoora mageri agadukanaa naye.

³ Kunyi sikunyala kohononoka kutura ku mageri yaga niiva kulasula vohonyi vonene kuli yivu mba. Mwami mwene yalandiza ovohonyi yivu kutanga kandi yavo vahulira vohonyi yivwo valolekiza ku kunyi ndi vwali vwiligali.

⁴ Ku ing'inga ndala nzere, Nyasaye naye kandi yameda lilolekiza lilie mu liavo ku likora vilolekizu kandi viokogenyia vie zing'ano ziosi ni vikolwa viezingulu, kandi ku ligavulira vandu vihaanwa via Roho Mutakatifu kolondekana nu vulaliri vwivwe.

Uyu ukwimiliraa kuduuka ko Vohonyi

⁵ Nyasaye siyaviiki zingelosi kuva kuli avamihi ku lirova lihia lizaa, lirova lia kunyi kovora makuva galio mba.

⁶ Mu vogono yivwo, kuli gamali kovoolwa havundu handi mu Mang'oda Matakatifu ndi; “O, Nyasaye, mundu aveeye ki, ivi uduuki kumwizuliza? Anoho Mwana wu mundu vuzwa, aveeye ki, ivi uduuki kumuhendera mwoyo.

⁷ Wamukola ku ing'inga ngekeeke kuva mukekeeke ku Zingelosi. Wamuvika itaji yu vukumi kandi yuluyali,

⁸ kandi wavika vindu viosi isi wi virenge vivie, aviamiihi.” Makuva yaga gaveeye kovora ndi, Nyasaye yalomba mundu ave “Mwami ku vindu viosi,” yaga gavoora havulavu vindu viosi vugira koleka kindu kali kilala. Kuli gaveeye, sikololaa mundu niyamihaa vindu viosi kalunu mba.

⁹ Navuzwa kololaa Yeso, wakolwa kuva mukekeeke ku zingelosi ku ing'inga engekeeke, kunangwa kuvitira mu zimbavasi zia Nyasaye, aduuki kukuzira avandu vosi. Kumulolaa kalunu naavikiywi itaji yu vukumi kandi yuluyali kigira uvusaliri vwi likuza lilie.

¹⁰ Vwali vulahi ndi, Nyasaye, umulombi numulindi wi vindu viosi, aduuki kokora Yeso kuva muduukiru ligali kuvitira muvusaliri, kunangwa aleete avana vanyingi kusanga mu vukumi vwivwe. Yeso niyie uvimiliraa kuduuka ku vohonyi.

¹¹ Oyo atakasaa vandu kutura muvwoni vwavo, kandi yavo avakolwa avatakase, vosi vaveeye na Baba mulala. Yiki nicho kigira Yeso nataveeye nizisoni kuvalanga avamwavo veve.

¹² Avoora ku Nyasaye, “Ndaavolera avamwavo vange icha umali kokora; ndakwizominya mu livugana liavo.”

¹³ Kandi avoora, “Ndaviika lisuuvira liange mu Nyasaye,” kandi avoora, “Mbeeye hano harara na vana va Nyasaye amali kumba.”

¹⁴ Kigira avana, kuli avalangaa, vaveeye vandu vuzwa vu muviri na masahi, kandi ndio Yeso mwene yaali kuli vo, naasanga mu liiva liavo liu muviri vuzwa. Yakola ndio kunangwa, kuvitira mu likuza lilie aduuki kudiviza Setani, oyo oveeye nizinguru zie likuza.

¹⁵ Kandi munzira yiyi yavoholora yavo vosi avaari avatugwa vu vuti vwi likuza mu livamwoyo liavo liosi.

¹⁶ Gaveeye havulavu ndi, siziveeye zingelosi avaakonyaa, navuzwa, “Akoonyaa visukululwi via Aburahamu.”

¹⁷ Kigira yaga, gamuduukira ave kuli avamwavo veve munzira yoosi, kunangwa aduuki kuva Musaalisi Munene wavo wi zimbavasi kandi wu vusuuvirifu mu vutumiki vwivwe ku Nyasaye, kunangwa aduuki kusamiiha avandu vwoni vwavo.

¹⁸ Kandi kalunu anyala kokoonya yavo avagerizwa, kigira, oyo mwene yagerizwa kandi naasalirizwa.