Vahebraina 13 - KITABU KITAKATIFU

¹ Muzizagiliri kuyaanzana aveene naveene kuli avaamitu Vakrisitayo.

² Mwizurizi kwingiriza avageni mu zinyumba zienyu. Mu likora ndio vaali ho avalala vingiriza zingelosi nivatamanyi.

³ Mwizurizi yavo avaveeye muvuhambe, kuli avamuvoheywi harara navo. Mwizurizi yavo avakubaa kivi kuli musaliraa navo.

⁴ Lisererana kuduuka live nuluyali ku vandu vosi, kandi gaduukiraa avasaza na vakali vave avasuuvirifu mulala ku wache kazozo. Nyasaye alakakaragiri vadamanu kandi yavo avakolaa ovoheyi.

⁵ Mutava niliiva liu kuyaanza mabese mba, navuzwa muvugiliri vindu via muveeye navio. Nyasaye umali kovora, “Inzi sindamwivilira mba.”

⁶ Kunangwa leki kuluviliri, ma kovoole, “Mwami aveeye mukonyi wange; sindatia mba. Mundu alangola ki?”

⁷ Mwizurizi aviimiliri vinyu va maziambiri, avamwilwazira likuva lia Nyasaye. Muganagane ligali kuli vamenya kandi kuli vaakuza, mwigi kutura ku lisuuvira liavo.

⁸ Yeso Kristo aveeye mulala mwere, mugolova, kalunu kandi kuduuka mihiga ni mihiga.

⁹ Mutahunzulanywi yiyi nayiyi kutura kunzira yuvulungi na migizu mageni gi zing'ano ziosi mba. Ni vulahi konyoora zinguru ziu mu mwoyo kutura ku zimbavasi zia Nyasaye, na sigaveeye ku lilonda amalago ni viukulia mba, yavo avalonda malago yago, sigavakonya mba.

¹⁰ Avasaalisi vatumikaa havundu ha Vayuda vasigamira, sivaveeye nuvunyari kulia ku visiuviliru via vahaana ku vwali vwitu mba.

¹¹ Musaalisi Munene Wavayuda yaleeta amasahi gi zinyama Havundu haveeye Hatakatifu ligali kugahaana kuli kisiuviriru chu vwoni; navuzwa miviri ji zinyama jasaambirwa ichova wa ahokososa.

¹² Kigira yaga Yeso kandi yakuzira ichova wi lidaala linene aduuki kutakasa avandu kutura muvwoni na masahi geege mwene.

¹³ Kunangwa kalunu gendi kuzie kuduuki kuye ichova wa hokososa ma kusange mu linyegwa lilie.

¹⁴ Kigira hano mu lirova sikoveeye nilidaala linene lihindiraa mba; kulindiliraa lidaala linene lizaa.

¹⁵ Gendi kuvitiri mu Yeso, kuhaane ku Nyasaye kisiuviriru chi lizominya lietu kazozo, agaveeye kovora, kisiuviriru kihaanangwa ni minwa jiyama lieta lilie kuli Mwami.

¹⁶ Mutivilira kokora vulahi kandi kokonyana aveene naveene, kigira yivi nivio visiuviliru viyanziza Nyasaye.

¹⁷ Muhuliri aviimiliri vinyu, kandi mwegehizi ku malago gaavo. Valinda kazozo vugira lisosa, kigira kuduuka valahaane ku Nyasaye makuva gu vutumiki vwavo. Nimuvahulira, valakola miyinzi jaavo nuvusangali; nigataveeye ndio, valajikola novovereri, nandio sigalava novokonyi ku munyi mba.

¹⁸ Muzizagiliri kukusaalira. Kololaa ndi koveeye ni zing'anagani ziu mu mwoyo zindahi, kigira kwenyaa kokole agaveeye malungi kazozo mu vindu viosi.

¹⁹ Kandi mugoonyaa ligali nu mwoyo gwosi kusaala ndi Nyasaye aduuki kunziranyia ku munyi vwangu.

Lisaala liu kumaliriza

²⁰ Nyasaye umali kusimugukiza Mwami wiitu Yeso Kristo kutura mu vakuzu, oveeye Mwayi Munene wa magondi kigira lisundula lia masahi geege agadinyirizaa lilagana lie mihiga ni mihiga.

²¹ Nyasaye wi mirembe amukole muve avadukiru mu vindu viosi vilahi via mwenya, kunangwa muduuki kokora uvulariri vwivwe; kandi kuvitira mu Yeso Kristo akole mu kunyi imbiri weve. Uvukumi vove kuye mihiga ni mihiga. Amini.

Amakuva gukumaliriza

²² Ng'onyaa munyi avaamitu vange, muhulirizi nu vwikuziri ku likuva lie lizuvwa yili, kigira ibarwa ya mung'odeye yiyi sieveeye indambi mba.

²³ Nyaanzi ku mumanyia ndi amiitu wiitu Timateo umali kovoholorwa kutura muvuhambe. Niiva alaza hano vwangu, ndaaza naye lwa nanzizi yaho kumulora.

²⁴ Haani mirembe ku viimiliri vinyu vosi, harara na vatakatifu vosi. Avamwavo vinyu mu Kristo kutura Italia vahaani mirembe kumunyi.

²⁵ Zimbavasi zia Nyasaye zive ni munyi mwosi. Amini.