Vahebraina 12 - KITABU KITAKATIFU

¹ Kunangwa, kigira, kukumbiriziywi nikiduma kenene cha valolekizi, gendi kuviiki halovega misigo josi miliduhu jinyala kukwigalira kandi vwoni vuhandaa kukunyi vudinyu ligali, kandi gendi kunyaguli mu ligerana liviikiywi imbiri wiitu nuvwikuziri.

² Gendi kohenze ku Yeso mutangizi kandi muduukizi wilisuuvira lietu, kutura mu litanga kuduuka ku keheri; kigira uvusangari vwali nivuvikiywi imbiri weve, yikuzira ku musalaba, nachaya zisoni zie likuza na yikaye ha mukono mulungi gwendeve yu vwami vwa Nyasaye.

³ Muganagane ligali ku ga Yeso yavitira mu; kuli yikuzira ku lihing'ana linene kutura ku vandu voni. Kulwayago mutaluha kandi mutakuzi mioyo jinyu mba.

⁴ Mu lihandalala kuguuta vwoni, mukikiri kulwaana nukuhingira vwoni kuduuka ku kika chu kwitwa;

⁵ Mumali kwivilira amakuva gukumuruviriza ga Nyasaye amolomaa ku munyi kuli avana veve? “Mwana wange, utalegeriza mwami lwa ahaanaa mageri mba. kandi utakuzaa mwoyo lwa akogondokeraa mba.

⁶ Mwami ahaanaa mageri ku sa mulala wa ayaanza; ahaanaa mageri ku vosi avavugiliraa kuva vana veve.”

⁷ Mwikuziri ku vusaliri kuli mwikuziraa ku mageri kutura ku baba. Nyasaye amukoleraa ndio kuli vana veve. Sihaveeyeho nu mwana wavula konyoora mageri kutura ku baba weve mba.

⁸ Navuzwa mutahevwe amageri kuli vana veve vandi vosi, muveeye avana vi indasimba.

⁹ Nakali ndio, gakuduukiraa kutie baba viitu lwahaana amageri; kunyalandi kwegehiza Baba wiitu wu mu Roho makove mwoyo.

¹⁰ Avababa viitu vakuha mageri ku ing'inga ngekeeke kuli vayaanza. Navuzwa Nyasaye akohezaa amageri kuduuki kuva avasangi mu vutakatifu vwivwe.

¹¹ Lwa kohevwa amageri goosi ku ing'inga ya kalunu, gaveeye agokovereriza, sigali gukukuyaanziza mba. Navuzwa lwinyima yavo avamali kwigizwa namageri kuli yaga vanyoola kihanwa chi mirembe ji livamwoyo liu vulungi.

Amigizu nilieganihiza

¹² Kunangwa gingi igulu makono ginyu gamali kuluha kandi mulungikizi amaru ginyu gamali kodedekera.

¹³ Muzizagiliri kogenda kuzinzira zinungi, kunangwa kerenge chaalema kivuli kufogoya, navuzwa mu vogono yivwo kehonywe.

¹⁴ Mugerizi ligali kuva ni mirembe na avandu vosi, kandi mugerizi komenya liiva litakatifu kigira siaveeyeho nu ulilola mwami nataveeye nu vutakatifu mba.

¹⁵ Mwilindi ku lirana inyima kutura ku zimbavasi zia Nyasaye. Mutaleka mulala ku munyi ave kuli kitagwa kilulu ichakaviruka ma chaleeta uvudinyu, ni sumu yacho mba.

¹⁶ Muhenze vulahi, gase alava ho nu mulala ku munyi oveeye ni kifavwi chovoheyi anoho uvula kutia Nyasaye kuli Esau, wagamana uvulungi vwivwe kuli muyaayi munene ku chukulia.

¹⁷ Lwinyima, kuli mumanyi yenya konyoora uvugasu zana kutura ku baba weve, navuzwa yasuulwa, kigira siyaali unyala konyoora vwiyangu vwu kwiganira nukugirung'anyia aga yakola mba, kali niiva yenya uvugasu yivwo namaliga.

¹⁸ Munyi simuuzi kuli avandu va Isiraeli vaza, ku cha munyala kudiira ku, ku kiguru cha Sinai chakaa muliru, ku kisundi, ku lilesi limwamu, kandi ku kihuzuzi,

¹⁹ nukumwoyo gwikisiliva, kandi ku liyoga liu mwoyo. Lwa vandu va Isiraeli vahulira mwoyo zana vagoonya Musa ndi vatahulira likuva lindi kandi mba,

²⁰ kigira sivali vanyara kwikuzira lilaga kuvo iliavoola, “Kali niiva inyama idiira ku kiguru kuduuka ilaswe magina ikuze.”

²¹ Havundu yaho haali hukutihiza ligali, kuduuka kali Musa navoora, “Kandi mbeeye nuvuti.”

²² Mu vogono yivwo, munyi mumali kuuza ku Kiguru cha Ziyoni, kandi ku lidaala linene lia Nyasaye oveeye mwoyo, Jerusalemi yumwigulu, harara ni zielefu zie zingelosi zialio.

²³ Mumali kuuza mu livugana linene liuvusangali lia vandu va Nyasaye avatanga kwivulwa, avamita gaavo gang'odwa mwigulu. Mumali kuuza ku Nyasaye oveeye mukalagi wa vandu vosi, nu ku mioyo ja vandu vakolwa valungi.

²⁴ Mumali kuuza ku Yeso umuhambanyi wililagana lihia, kandi ku masahi guufa agasuuvirizaa vindu vilahi ligali kuvita masahi ga Habili.

²⁵ Muhenze vulahi, mutasuula kuhulira uyu omoloma. Yavo avasuuraa kuhulira wahaana likuva litakatifu kutura ku Nyasaye ku lirova, sivalahona mba. Kunyi kulahona ndi nikwiyahula kutura ku omoloma kutura mwigulu!

²⁶ Mwoyo gwigwe gwa degeriza lirova ing'inga yeyo, navuzwa kalunu umali kukusuuviriza ndi, “Ing'inga yindi kandi sindadegeriza lirova lienyine, navuzwa ligulu kandi.”

²⁷ Likuva yili, ing'inga yindi kandi, limanyia havulavu ndi ivindu vialombwa na Nyasaye viosi viladegerizwa, kandi vilakatulizwi ho, kunangwa vindu vitanyala kudengeyizwa vilakatigale.

²⁸ Kunangwa, gendi kusandizi kigira konyoora uvwami vutanyala kodengeyizwa. Gendi kusandizi ma kusigamiri Nyasaye munzira yu ku muyaanziza, niliegehiza nuvuti ligali,

²⁹ kigira Nyasaye wiitu aveeye muliru gusambaa nukudiviza ligali.