Vahebraina 10 - KITABU KITAKATIFU

¹ Lilaga lia Vayuda siliveeye kelolero kidukiru na kisuvirifu chi vindu vieligali viza mba, navuzwa ichiriri chi lilohiza lie vindu valahi viizaa. Visiuviliru vilala viere vihaanwa vuli muhiga. Kunangwa Lilaga linyala ndi, kuvitira mu visiuviliru yivi, kolomba avandu vaazaa ku Nyasaye kuva avadukiru?

² Ni gataveeye ndio, ngano si vialekwa kuhaanwa? Kigira niiva avandu vasigamira Nyasaye valava nivatakasiywi ligali kutura muvwoni vwavo lulala, ngano sivakaveeye niliiva liu kumanya mahiolo gaavo kandi mba, kandi visiuviliru viosi viakaheriziywi.

³ Navuzwa visiuviliru yivi vihaanwa vuli muhiga kwizuliza avandu vwoni vwavo.

⁴ Amasahi gi zigiriki na agi zimburi siganyala kutulizaho uvwoni mba.

⁵ Lwa Kristo yaali ahimbi kuuza mu lirova yavolera Nyasaye ndi: “Ivi siwenyaa visiuviliru ni vihaanwa, navuzwa umali konzetegekizira muviri.

⁶ Siuyaanzizwa ni vihaanwa visambwa vigima ku vwali anoho visiuviliru viukutuliza ho vwoni mba.

⁷ Kunangwa ndavoora! ‘Mbeeye hano kokora vulaliri vuvwo O, Nyasaye, kuli gang'odwa ku inzi, mu kitabu chi Lilaga.’ ”

⁸ Kutanga yavoola, “Ivi si wenyaa kandi siuyaanzizwa ni visiuviliru kandi ni vihaanwa, anoho vihaanwa vigima viu kusambwa ku vwali kandi visiuviliru viukutuliza ho vwoni mba.” Yavoola yaga kali niiva visiuviliru yivi viosi vihaanwa kolondekana ni Lilaga.

⁹ Maku yavoola “Mbeeye hano, O, Nyasaye, kokora uvulariri vuvwo.” Kunangwa Nyasaye atulizaa ho visiuviliru vikulu viosi, masingiriza kisiuviriru cha kaviri, nacho ni Kristo, mu vogono vwavio.

¹⁰ Yeso Kristo yatwekiza vulariri vwa Nyasaye yenya akole, kunyi kwosi kutakasiywi kutura muvwoni vwitu ku kihanwa cha yihaana chu muviri gwigwe mwene lulala kandi lwokoheleriza.

¹¹ Avasaalisi va Vayuda vosi sa mulala, asingiraa kazozo kokora ukutumika, nu kuhaana visiuviliru zana haali kanyingi; navuzwa visiuviliru yivi sivinyala kutuliza vwoni kali hakuzu mba.

¹² Navuzwa Kristo yahaana kisiuviriru kilala kigira vwoni, kisiuviriru kiduukanaa mihiga ni mihiga, kandi niyikara ha mukono mulungi gwa Nyasaye.

¹³ Kutura ing'inga yeyo, alindiliraa kuduuka lwa Nyasaye aliviika avasigu veve isi wi virenge vivie.

¹⁴ Kigira kisiuviriru kilala yavakola avadukiru mihiga ni mihiga yavo avatakaswa kutura muvwoni vwavo.

¹⁵ Kandi Roho Mutakatifu aveeye mulolekizi wiitu. Kutanga avoora,

¹⁶ “Yili nilio lilagana lia ndilomba harara navo mu madiku gaaza, Mwami Nyasaye avoora: Ndaviika malago gange mu mioyo jaavo; kandi ndang'oda mu zing'anagani ziavo.”

¹⁷ Kandi avoora, “Sindizuliza uvwoni vwavo kandi vikolwa viavo vidamanu mba.”

¹⁸ Kunangwa lwa yava vamali kusamiifwa vwoni; liveeye kovora, sihaveeyeho kandi ni lienya kuhaana vihaanwa viukutuliza uvwoni mba.

Kwisundi ahimbi ku Nyasaye

¹⁹ Kunangwa, avaamitu vange, kigira masahi ga Yeso, koveeye no vovoholore vwosi vwu kwingira Hatakatifu ligali.

²⁰ Yakwigulira inzira imbia, yi livamwoyo, kuvitira mu isuuka yu kukinga, agaveeye kovora kuvitira mu muviri gwigwe mwene.

²¹ Koveeye nu musaalisi munene ligali oveeye nuvunyari munyumba ya Nyasaye.

²² Kulwayago, gendi kwisundi ahimbi ku Nyasaye numwoyo gwiligali ni lisuuvira liu vuduukiru, nikoveeye ni zing'anagani zie mioyo jitakasiywi kutuliza mu zing'anagani zindamanu, kandi miviri ni jogiziiywi na mazi malahi.

²³ Gendi kugumiri vudinyu lisuuvira lietu vugira lihayahaya, kigira Nyasaye walomba lilagana yili aveeye musuuvirifu.

²⁴ Kandi leki kwehenderanili mioyo aveene naveene kandi mukokonyane aveene naveene muduuki kuyaanzana kandi kokora miyinzi milahi.

²⁵ Kutaleka mwimwa yigwo gwu kuvugana harara aveene naveene, kuli vandi vakora. Navuzwa mugende kudinyirizane mulala nuwache ligali, kigira kuli muloraa ndi Lidiku liu Mwami liveeye ahimbi.

²⁶ Niiva kotovola kokora uvwoni inyima wi limanya agiligali, sihaveeyeho ni kisiuviriru chatigara kutuliza vwoni mba.

²⁷ Navuzwa litigaaye ni lilindilira nuvuti likalaga lia Nyasaye nu vululu vwu muliru gulidiviza yavo vosi avahing'anaa naye.

²⁸ Mundu woosi wavula kutia Lilaga lia Musa ku likuva lia valoli vaviri anoho vavaga, kuduuka yitwi vugira livelererwa.

²⁹ Kunangwa galava ki ku mundu uchayaa Mwana wa Nyasaye? Galava ki ku okolaa amasahi gi lilagana lia Nyasaye ga mutakasaa kutura muvwoni kuva gaveeye kindu vuzwa? Galava ki ku oyo onyegaa Roho wi zimbavasi? Gamudukira ahevwe amageri malulu ligali kuvita agadukanaa naye.

³⁰ Kigira kumanya uyu uwavoola, “Kisaalia ni change, nda tunga.” Kandi uyu wavoola, “Mwami alakalagira avandu veve.”

³¹ Keveeye kindu chu kutihiza ligali kugwa mu makono ga Nyasaye oveeye mwoyo.

³² Mwizurizi kuli lwa gaali nimunyi zing'inga ziavita. Mu madiku yago inyima wu vulavu vwa Nyasaye vwali nivwakaa ku munyi, mwasalira vindu vinyingi, navuzwa simwaguutwa mba.

³³ Zing'inga zindala mwakolerwa uvudamanu kandi nimunyegwa imbiri wa vandu, na zing'inga zindi mwetegeka kuhambana harara na yavo avakolelwa kuli ndio.

³⁴ Mwasanga mu likindukizwa harara na yavo avaari mu vuhambe, kandi mwa vugilira kunuurwa vindu vienyu, kigira mu manya vulahi ndi munyi aveene muveeye ni vindu vilahi ligali kuvita, navio ni vitahera mba.

³⁵ Kunangwa mutaleki uvuruviliri vwinyu mba, kigira voletaa madanyi manene ligali.

³⁶ Gamuduukira muve nu vwikuziri, kunangwa muduuki kokora uvulariri vwa Nyasaye, kandi munyore via Nyasaye amulagaa.

³⁷ Mang'oda Matakatifu gavoora, “Itigaaye ing'inga engekeeke vuzwa, kandi uyu uzaa alaza kandi sialalindagilira mba.

³⁸ Navuzwa avandu vange valungi valava mwoyo kigira lisuuvira; niiva mulala kuvo yirana inyima, mwoyo gwange sigulamuyaanza mba.”

³⁹ Kunyi sikoveeye avandu viranaa inyima kuduuka mulidiva mba; navuzwa koveeye ku yavo avaveeye ni lisuuvira kandi vahonywa.