Vahebraina 1 - KITABU KITAKATIFU

Likuva lia Nyasaye kuvitira mu Mwana weve

¹ Mu zing'inga zia kale, Nyasaye yavolerana na vaguuga viitu haali kanyingi muliiva lugano lugano kuvitira mu vaporofeti.

² Navuzwa mu madiku gu kumaliriza yaga umali kovolerana ni kunyi kuvitira mu Mwana weve wayatovola kuva mwene vindu viosi mu limalirika, kandi kuvitira muye yalomba ligulu ni lirova.

³ Amanyia ovong'ereng'anu vwu vukumi vwa Nyasaye kandi liiva lieligali lia Nyasaye mwene, kulinda ligulu ni zinguru zie likuva lilie. Niyakamara konyoora uvusamiihi vwu vwoni vwa vandu, yikala mwigulu ha mukono mulungi gwa Nyasaye, oveeye Zinguru Zinene.

Ovonene vwu Mwana wa Nyasaye

⁴ Mwana yamanya naakolwa kuva Munene kuvita zingelosi, kuli lieta lia Nyasaye yamugulika liveeye linene ligali kuvita agaavo.

⁵ Nyasaye si yavoolela ku zingelosi, “Ivi oveeye Mwana wange; lero inzi mali kugwa Baba woovo?” Anoho si yavoola ku engelosi woosi, “Inzi ndava Baba weve, naye alava Mwana wange?”

⁶ Navuzwa lwa Nyasaye yaali ahimbi kutuma Mwana weve wukutanga mu lirova, yavoola, “Zingelosi vosi va Nyasaye kuduuka vamusigamiri.”

⁷ Navuzwa ko zingelosi, Nyasaye yavoola ndi, “Nyasaye akolaa zingelosi veve kuva zimbuza kandi avatumikiri veve kuva lumemo lwu muliru.”

⁸ Navuzwa ku Mwana, Nyasaye yavoola, ndi: “ O, Nyasaye, Uvwami vuvwo, vulahindira mihiga ni mihiga! Wamiihaa avandu vovo nu vulungi.

⁹ Ivi uyanzaa vulungi na udunyiraa uvudamanu. Yicho nicho kigira Nyasaye, Nyasaye woovo, umali kokotovola nu kukuvaka maguta, kandi umali kuhaana ku ivi uvusangari vwu luyali voveeye vonene kuvita avache vovo.”

¹⁰ Yavoola kandi, “Ivi Mwami, mulitanga walomba lirova liosi kandi walomba ligulu na makono googo.

¹¹ Viosi viladiva, navuzwa ivi ulatigala uhindiri mihiga ni mihiga; viosi vilakunguha kuli zinguvu!

¹² Ivi ulavilinga kuli likoti, vilagirung'anywa, kandi kuli inguvu. Navuzwa ivi oveeye mulala mwere kazozo, kandi livamwoyo liilio sililava ne keheri mba.”

¹³ Navuzwa nivwaha ku zingelosi, wa Nyasaye yavolera; “Yikala ha mukono gwange mulungi, kuduuka mbiki avasigu vovo kuva kituva chi virenge vivio.”

¹⁴ Kunangwa zingelosi nivwaha? Vaveeye vatumwa vatumikira Nyasaye, kandi vatumwa na Nyasaye, kuzia kokonya avandu vaadukana vanyoore vohonyi.